Heb 7 | MMX | STEP | Na leeme ne Melkisedek, gano neni loorong silok to Salem la neni lamaasa at ne Moroa i silok aleng. Neni ga ekip tangarang mi ne Abaram at laaleng ne Abaram eburu mi limixin teren digamlong boro at leesep no diga sep kepe leventaba lavaorong silok la limixin atdi; la ne Melkisedek ga lox anarong i.

Hebrews 7

Melkisedek Neni Lamaasa

1 Na leeme ne Melkisedek, gano neni loorong silok to Salem la neni lamaasa at ne Moroa i silok aleng. Neni ga ekip tangarang mi ne Abaram at laaleng ne Abaram eburu mi limixin teren digamlong boro at leesep no diga sep kepe leventaba lavaorong silok la limixin atdi; la ne Melkisedek ga lox anarong i. 2 La ne Abaram ga raba ne Melkisedek mi loxot i sev asangaun ap mo levempanga neni ga lok kaka i ap mo lavaorong silok.

Avot, lavasuun at laasen ne Melkisedek do, “Loorong silok at loklok mokmokso;” la laasen bok do loorong silok boro Salem i epovo mi levelinga xeretna, “Loorong silok at lenmila.” 3 Nedik kopmen ataklen leretere at ne temen mi nenen la leretere at lavalabat teren, la dik taxoklen i do diga visix i la ni ga met lingisa. La kerepmo Nitna ne Moroa i lok ngan ne Melkisedek, mo i nemen amisik ngan lamaasa.

4 Mina doma i do ne Melkisedek ga silok aleng. Ataklen i do neni ga silok mila ne Abaram, Temen nedi lubungmixin me Israel ga raba i mi loxot i sev asangaun ap mo levempanga ni ga lok kaka i at laaleng neni ga esep eburu mi lavaorong silok. Mo loxot ga lox avukat aleng. 5 Lenavolo i tong i do livipisik li at ne Levi mo digap kip lugugu ngan lavamaasa, dinak lok ka loxot i sev asangaun boro xa at limixin atdi, keke i do nedi axap mun livipisik li at ne Abaram. 6 Na laradi ne Melkisedek, neni goxopmen livisik li at ne Levi, ketla neni ga lok ka loxot i sev asangaun boro at ne Abaram, ni ga ruuna ka lavapaase alii boro at ne Moroa la ne Melkisedek ga lox anarong i. 7 La i ruturun aleng do lara i silok, neni na lox anarong mo lara i lixilik tin. La kerepmo ne Melkisedek ga silok ti ne Abaram. 8 La nedi limixin me Israel diga raba loxot i sev asangaun ti lavamaasa; mo lavamaasa di goxo rooro amisik, ketla ne Melkisedek nedik kopmen ataklen i do neni ga met, limixin di lok do move i rooro. 9 I epovo na tong i do ne Levi la lavamaasa melemu ren, dik lok kaka loxot i sev asangaun boro at limixin me Israel, nedi xopmen na silok ti ne Melkisedek, mila lurubuno di ne Abaram ga raba ne Melkisedek mi loxot i sev asangaun. 10 I epovo ana tong i xuren mila ap mo laaleng ne Abaram ga raba ne Melkisedek mi loxot i sev asangaun, i lok ngan ta do ne Levi mi lavamaasa melemu ren diga raba ne Melkisedek mi loxot i sev asangaun, keke i do luvutnen di goxovisi visik di.

Iesu Neni Lamaasa Ngan Ne Melkisedek

11 Limixin me Israel di goxo epovo do dina dadat basinge laxakapmek mila xopmen di goxo epovo xusu dina mu asu avukat leventaangas la levelinga at lavamaasa mo digak lok at libibinat at ne Levi; mo leventaangas, ni lavasuun at Lenavolo, ne Moroa ga raba limixin me Israel min. Kuren la limixin digak pakes ti lamaasa vetpes kusu na vot, la ba lok ngan ne Melkisedek; neni noxo lok ngan ne Aron mi lavamaasa at libibinat at ne Levi. 12 La ne Moroa ga soxolik ka Lamaasa vetpes kusu na lox adadat limixin basinge laxakapmek, kuren la neni ga lox ekun Lenavolo mi lekabus maxat, mila do tara na lox ekun leventaangas at lavamaasa, neni na lox ekun bok Lenavolo. 13 La mo Lamaasa vetpes, neni ne Iesu la neni at libibinat petpes la goxopmen tara ap mo libibinat ga ruuna ka lugugu ngan lamaasa. 14 I xasep do Leeme Silok atdik, neni at libibinat at ne Juda, la ne Moses kopmen goxo tong i do teventaba at na libibinat naba ravasu ngan lavamaasa. 15 La levelinga atnama mumu lekabus maxat i xasep aleng mila lamaasa vetpes kerekngan ne Melkisedek gara vot pam. 16 Lenavolo i tong i do, nedi mun at libibinat at ne Levi, di epovo xusu dina xip ka lugugu ngan lavamaasa. Ketla ne Iesu ga lok ka mo lugugu at langas petpes. Neni ga lok ka i mila neni ga ruuna lololos silok la kopmen taxavaxap at lorooro ren. 17 I lok ngan ne Moroa ga tong i at Lovoang Kaala, levelinga ren i lok keretna,

“Nenu unaba nemen amisik ngan lamaasa kerekngan ne Melkisedek.” ^a

18 Moroa ga vaxaxis ase Lenavolo at ne Moses mila goxopmen ta tololos teren la kopmen ta goxo epovo ri lok tooro limixin; 19 la Lenavolo xopmen goxo epovo na lox adadat limixin basinge laxakapmek. La ne Moroa ga lok li langas maxat, i lox avukat ti Lenavolo la maxeneng ap mo langas maxat, i epovo do tana xis esogo mi ne Moroa.

20 La ne Moroa ga vangpe do ne Iesu na xip ka lugugu at lamaasa, ketla ne Aron la lavamaasa melemu ren diga xip ka mo lugugu ketla goxopmen tavangpangpe at ne Moroa ridi. 21 Ketla ne Moroa ga vangpe do ne Iesu na lok ka lugugu ngan lamaasa at laaleng ne Moroa ga lok tin keretna,

“Leeme Silok ne Moroa ga vangpe vam la neni noxo lox ekun lodoxoma ren. Ni ga lok, ‘Nenu naba nemen amisik ngan lamaasa.” ^b

22 Moroa ga vangpe xerepmo, kuren la ne Iesu neni i lok ngan losoksoxoba pe ri lekabus maxat, mo i nunuan aleng ti Lenavolo.

23 Buaang atnedi lavamaasa amgomgo diga lok lugugu mila diga vekukun mi lugugu do lara ga met. 24 Ketla ne Iesu, kopmen taxavaxap at lorooro ren la kerepmo neni bak lox amisik lugugu at lamaasa. 25 Kuren la neni i epovo na lox arooro rinotno nedi di vosiga ne Moroa, mo do dina nuunu sogo at ne Iesu; mila ne Iesu naba nemen amisik saparap ne Moroa la na ngising i xusu na lok tooro di.

26 Lamaasa gomgo xerepmo i lox epovo lavakpakes atdik; luruptuvuk teren i nunuan axap, neni xopmen goxo ronga xepe levelinga at ne Moroa, goxopmen taxakapmek gak lok teren. Ap mo levenaleng neni ga nemen de at na lavatbung menemen neni goxo vubeles ti laxakapmek eburu mi limixin kapmek; la melemu ne Moroa ga lox asilox i ro vana at laxalibet. 27 Neni xopmen goxo lok ngan mo leventaba lavamaasa amgomgo, nedi xa digaplavang amisik ti laxakapmek atdi, la ti laxakapmek bok at limixin; ketla ne Iesu ga lok laplavang ti laxakapmek at limixin axap, ni ga lok legesa laplavang mun, at laaleng ni ga raba lorooro ren kusu na uu nop loklok atdik. 28 Maxeneng at Lenavolo luvuttadi diga lok lugugu ngan lavamaasa amgomgo, la lorooro atdi goxok mokso xerekngan ne Iesu. Ketla ne Moroa ga raba limixin mi Lenavolo, la melemu ni ga vangpe do ne Nitna na lok kaka lugugu at lamaasa gomgo, luruptuvuk teren nabak mokso amisik.