Amo 7 | NdeBEN | STEP | Nanku engakutshengiswa nguThixo Wobukhosi: Wayelungisa imitshitshi yezintethe emva kokuvunwa kwesabelo senkosi khonapho amabele esibili esakhula.

Amos 7

Intethe, Lomlilo Lentambo Yokuqondisa

1 Nanku engakutshengiswa nguThixo Wobukhosi: Wayelungisa imitshitshi yezintethe emva kokuvunwa kwesabelo senkosi khonapho amabele esibili esakhula. 2 Kwathi lapho ilizwe seziliphundlile, ngamemeza ngathi, “Thixo Wobukhosi, thethelela! UJakhobe angaphepha kanjani? Mncinyane kakhulu!”

3 Ngakho uthixo waxola.

“Akusoze kwenzakale” watsho uthixo.

4 Nanku engakutshengiswa nguThixo Wobukhosi: uThixo Wobukhosi wayememezela ukwehlulela ngomlilo; womisa ulwandle waqothula lelizwe. 5 Ngakho ngamemeza ngathi “Thixo Wobukhosi, ngiyakuncenga, ake ume! UJakhobe angaphepha kanjani na? Mncinyane kakhulu!”

6 Ngakho uThixo waxola.

“Lokhu lakho akuyikwenzakala,” kwatsho uThixo Wobukhosi.

7 Nanku angitshengisa khona: uThixo wayemi phansi komduli owawakhiwe waqonda nta ephethe intambo yokuqondisa ngesandla sakhe 8 UThixo wasengibuza esithi, “Kuyini okubonayo, Amosi?”

Ngaphendula ngathi, “Yintambo yokuqondisa.”

UThixo wasesithi, “Khangela, ngibeka intambo yokuqondisa phakathi kwabantu bami bako-Israyeli; kangisayikubaxolela futhi.

9 Izindawo eziphakemeyo zika-Isaka zizadilizwa
lezindawo ezingcwele zako-Israyeli zizachithwa;
indlu kaJerobhowamu ngizayihlasela ngenkemba yami.”

U-Amosi Lo-Amaziya

10 U-Amaziya umphristi waseBhetheli wathumela ilizwi kuJerobhowamu inkosi yako-Israyeli, wathi, “U-Amosi uceba okubi ngawe khona kanye phakathi kwako-Israyeli. Ilizwe lingeke limelane lawo wonke amazwi akhe. 11 Ngoba u-Amosi uthi:

‘UJerobhowamu uzakufa ngenkemba,
njalo impela u-Israyeli uzathunjwa,
asiwe khatshana kwelizwe lakibo.’ ”
12 U-Amaziya wasesithi ku-Amosi, “Phuma, wena mboni! Buyela elizweni lakoJuda, usebenzele ukudla kwakho khonale wenze lokuphrofetha kwakho khonale. 13 Ungaphrofithi futhi eBhetheli, ngoba le yindawo yenkosi kanye lethempeli lombuso.”

14 U-Amosi waphendula u-Amaziya wathi, “Mina ngangingasuye mphrofethi kumbe indodana yomphrofethi, kodwa ngangingumelusi, njalo ngigcina izihlahla zomkhiwa wesikhamore. 15 Kodwa uThixo wangithatha ekweluseni imihlambi yezimvu wathi kimi, ‘Hamba uyephrofetha ebantwini bami bako-Israyeli.’ 16 Ngakho-ke khathesi zwana ilizwi likaThixo. Wena uthi:

‘Ungaphrofethi kubi ngo-Israyeli,
njalo yekela ukutshumayela kubi ngendlela ka-Isaka.’
17 Ngakho-ke nanku okutshiwo nguThixo:

‘Umkakho uzakuba yisifebe edolobheni,
amadoda lamadodakazi akho azakufa ngenkemba.
Ilizwe lakho lizalinganiswa labiwe,
njalo wena ngokwakho uzafela elizweni lamaqaba.
Njalo impela u-Israyeli uzathunjwa
asiwe khatshana kwelizwe lakhe.’ ”