Hos 12 | NdeBEN | STEP | U-Efrayimi udla umoya; uxotshana lomoya wasempumalanga ilanga lonke andise amanga lodlakela. Wenza isivumelwano le-Asiriya, athumele amafutha e-oliva eGibhithe.

Hosea 12

1 U-Efrayimi udla umoya;
uxotshana lomoya wasempumalanga ilanga lonke
andise amanga lodlakela.
Wenza isivumelwano le-Asiriya,
athumele amafutha e-oliva eGibhithe.
2 Kulecala uThixo azalethesa uJuda;
uzajezisa uJakhobe mayelana lezindlela zakhe
aphindisele kuye mayelana lezenzo zakhe.
3 Esiswini wabamba isithende sikamfowabo;
eseyindoda wabindana loNkulunkulu.
4 Wabindana lengilosi wayehlula;
wakhala wacela umusa kuyo.
Wayifica eBhetheli
wakhuluma layo khonapho,
5 uThixo uNkulunkulu uSomandla,
uThixo yilo ibizo lakhe lodumo!
6 Kodwa kumele ubuyele kuNkulunkulu wakho;
ugcine uthando lokulunga,
umlindele kokuphela uNkulunkulu wakho.

7 Umthengisi usebenzisa izikali zenkohliso;
uthanda ukuqilibezela.
8 U-Efrayimi uyazincoma esithi,
“Nginothe kakhulu; sengiyisipatsha.
Ngenotho yami kabayikufumana ububi
loba isono kimi.”

9 “Mina nginguThixo uNkulunkulu wenu
owalikhupha eGibhithe;
ngizalenza lihlale emathenteni futhi,
njengasezinsukwini zemikhosi yenu emisiweyo.
10 Ngakhuluma labaphrofethi,
ngabatshengisa imibono eminengi
ngakhuluma imizekeliso ngabo.”

11 IGiliyadi ixhwalile na?
Abantu bakhona bakhohlakele!
EGiligali bayanikela umhlatshelo wenkunzi na?
Ama-alithare abo azakuba njengezinqwaba zamatshe
ensimini elinyiweyo.
12 UJakhobe wabalekela elizweni lase-Aramu;
u-Israyeli wasebenzela ukuthola umfazi,
njalo welusa izimvu ukuba amlobole.
13 UThixo wasebenzisa umphrofethi ekukhupheni u-Israyeli eGibhithe;
wamlondoloza ngomphrofethi.
14 Kodwa u-Efrayimi umthukuthelise kabuhlungu;
UThixo wakhe uzaliyekela liphezu kwakhe
icala lokuchitha kwakhe igazi
njalo uzaphindisela kuye ukudelela kwakhe.