Job 29

Ukuzigeza KukaJobe Kokucina

1UJobe waqhubeka ngenkulumo yakhe wathi:

2“Ngiyaziloyisa lezozinyanga esezadlulayo,
lezinsuku uNkulunkulu esangilinda,
3lapho isibane sakhe sisakhanyisa phezu kwekhanda lami
ngihamba ngokukhanya kwakhe emnyameni!
4Oh, lezinsuku ngisazizwa ukuthi ngiyimi,
lapho ubudlelwano obukhulu loNkulunkulu busesendlini yami,
5lapho uSomandla eseselami
labantwabami besaphila lami,
6lapho indlela yami ifafazwe ngolaza ledwala
lingithululela impophoma zamafutha e-oliva.

7Ekuyeni kwami emasangweni edolobho
ngafika ngahlala enkundleni,
8amajaha angibona agudluka ema eceleni,
abadala baphakama bema ngezinyawo;
9amadoda ayizikhulu athula akaze akhuluma
avala imilomo yawo ngezandla zawo;
10amazwi ezikhulu ehliselwa phansi,
inlimi zazo zanamathela olwangeni lwazo.
11Loba ngubani owangizwayo wakhuluma kuhle ngami,
kwathi labo abangibonayo bangibuka,
12ngoba ngalamulela abayanga abacela uncedo,
lezintandane ezazingelamsizi.
13Indoda eyayisifa yangibusisa;
ngenza inhliziyo yomfelokazi yahlabelela.
14Ngavunula ukulunga njengezigqoko zami;
ukwahlulela ngokulunga kwaba yisembatho sami lengwane yami.
15Ngangingamehlo kwabayiziphofu
lezinyawo kwabaqhulayo.
16Nganginguyise kwabaswelayo;
ngayimela indaba yesihambi.
17Ngawephula amazinyo ababi
ngahluthuna labo ababebabambile ngamazinyo abo.

18Ngakhumbula ngathi, ‘Ngizafela endlini yami,
insuku zami zinengi njengezinhlamvu zetshebetshebe.
19Impande zami zizafinyelela emanzini,
amazolo azalala emagatsheni ubusuku bonke.
20Udumo lwami luzahlala lulutsha kimi,
idandili lami lilitsha esandleni sami.’

21Abantu babengilalela belethemba,
belindele ukwelulekwa bethule zwi.
22Nxa sekukhulume mina, kungakhulumi omunye njalo;
amazwi ami ayengena kamnandi ezindlebeni zabo.
23Babengilindela njengokulindela izulu,
bawanathe amazwi ami njengezulu lentwasa.
24Ngangisithi ngingababobothekela, bathabe bangakholwa;
ukukhanya kobuso bami kwakuligugu kubo.
25Yimi engangibakhethela ukuthi benzeni ngoba ngisanduna kubo;
ngangihlala njengenkosi phakathi kwamabutho ayo;
ngangifana lomduduzi wabalilayo.”