Mic 4 | NdeBEN | STEP | Ngezinsuku zokucina intaba yethempeli likaThixo izamiswa njengenhloko phakathi kwezintaba; izaphakanyiselwa phezu kwezintaba njalo izizwe zizabekelela zisiya kuyo.

Micah 4

INtaba KaThixo

1 Ngezinsuku zokucina

intaba yethempeli likaThixo izamiswa
njengenhloko phakathi kwezintaba;
izaphakanyiselwa phezu kwezintaba
njalo izizwe zizabekelela zisiya kuyo.
2 Izizwe ezinengi zizafika zithi,

“Wozani siye phezu kwentaba kaThixo,
siye ethempelini likaNkulunkulu kaJakhobe.
Uzasifundisa izindlela zakhe,
ukuze sihambe emikhondweni yakhe.”
Umthetho uzavela eZiyoni,
ilizwi likaThixo livele eJerusalema.
3 Uzakwahlulela phakathi kwezizwe ezinengi
alamule lezingxabano zezizwe ezilamandla ezindaweni ezikhatshana.
Bazakhanda izinkemba zabo zibe yimihlathi yamakhuba,
lemikhonto yabo ibe zingqamu zokuthena izihlahla.
Isizwe asiyikuhlomela isizwe ngenkemba
loba sifundele ukulwa impi futhi.
4 Umuntu wonke uzahlala ngaphansi kwesihlahla sakhe sevini
langaphansi kwesihlahla sakhe somkhiwa,
njalo kakho ozabenza besabe,
ngoba uThixo uSomandla usekhulumile.
5 Zonke izizwe zingahamba
ebizweni labonkulunkulu bazo;
thina sizahamba ebizweni likaThixo
uNkulunkulu wethu kuze kube laphakade.

Icebo LikaThixo

6 “Ngalolosuku,” kutsho uThixo,
“ngizabutha abaqhulayo;
ngizaqoqa abathunjwayo
lalabo engabehlisela usizi.
7 Ngizakwenza abaqhulayo babe yinsalela,
abaxotshwayo babe yisizwe esilamandla.
UThixo uzababusa eNtabeni iZiyoni,
kusukela ngalolosuku kuze kube nininini.
8 Wena nqaba yokulinda yomhlambi,
wena nqaba yeNdodakazi yeZiyoni,
umbuso wakuqala uzabuyiselwa kuwe;
ubukhosi buzakuza eNdodakazini yaseJerusalema.”

9 Kungani khathesi usukhala kakhulu,
kawulankosi na?
Umeluleki wakho usebhubhile na,
ukuba uphathwe yibuhlungu obunjengowesifazane ohelelwayo?
10 Janqula ngobuhlungu, wena Ndodakazi yeZiyoni,
njengowesifazane ohelelwayo,
ngoba khathesi sekumele usuke kulelidolobho
uyehlala egangeni.
Uzakuya eBhabhiloni;
lapho ozahlengwa khona.
Khonale uThixo uzakukhulula
ezandleni zezitha zakho.

11 Kodwa khathesi izizwe
ezinengi zikujamele.
Zithi, “Kangcoliswe,
lamehlo ethu kawahawukele iZiyoni!”
12 Kodwa kabayazi
imicabango kaThixo;
kabaliqedisisi icebo lakhe,
yena obabutha njengezixha zamabele esizeni.
13 “Sukuma ubhule, wena Ndodakazi yeZiyoni,
ngoba ngizakupha impondo zensimbi;
ngizakunika amasondo ethusi,
njalo uzachoboza izizwe ezinengi.”
Uzanikela kuThixo inzuzo yabo eyatholwa ngobuqili
inotho yabo kuThixo womhlaba wonke.