Proverbs 29

1Umuntu oqinisa intamo phezu kokukhuzwa kanengi
uzabhujiswa ngesikhatshana kungabi lokuphepha.

2Lapho kuphumelela abalungileyo abantu bayajabula;
nxa kubusa izixhwali abantu bayabubula.

3Umuntu othanda ukuhlakanipha uletha intokozo kuyise,
kodwa ohamba lezifebe utshaphaza inotho yakhe.

4Ngokubusa kuhle inkosi iyaliqinisa ilizwe layo,
kodwa leyo elihaga lezivalamlomo iyalibhidliza.

5Loba ngubani okhohlisa umakhelwane wakhe
uzendlalela umambule wokuzithiya.

6Umuntu omubi uthiywa yisono sakhe,
kodwa umuntu olungileyo angahlabela athokoze.

7Olungileyo uyawananza amalungelo abayanga,
kodwa ababi kabazidubi ngalokho.

8Izideleli zingalidunga idolobho,
kodwa abantu abahlakaniphileyo bayaludedisa ulaka.

9Nxa umuntu ohlakaniphileyo esiya emthethwandaba lesiwula,
isiwula siyatshinga sibhede kube lomsindo.

10Abadinga ukuchitha igazi bayamzonda umuntu oqotho
njalo badinga ukubulala abalungileyo.

11Isiwula siyalukhihliza lonke ulaka lwaso,
kodwa umuntu ohlakaniphileyo uyazithiba.

12Nxa umbusi elalela amanga,
zonke izikhulu zakhe ziba zimbi.

13Umyanga lomncindezeli bakanye kulokhu:
UThixo uvula amehlo abo bobabili.

14Nxa inkosi isahlulela abayanga kungelabandlululo,
isihlalo sayo sobukhosi sizaqina.

15Uswazi lokuqondisa lunika ukuhlakanipha,
kodwa umntwana oyekelwayo uhlazisa unina.

16Nxa ababi bephumelela, lesono laso siyaphumelela,
kodwa abalungileyo bazabawisa.

17Qondisa indodana yakho, izakupha ukuthula;
izaletha injabulo emphefumulweni wakho.

18Lapho okungekho khona isambulelo,
abantu badela ukuzithiba;
kodwa ubusisiwe lowo ogcina umlayo.

19Inceku kayiqondiswa ngamazwi nje wodwa,
loba izwisisa kayiyikukwenza ekutshelwayo.

20Uyambona umuntu owalazela ukukhuluma?
Kulethemba elingcono esiwuleni kulaye.

21Umuntu ototoza inceku yakhe isakhula,
leyonceku izamthwalisa nzima ekucineni.

22Umuntu othukuthelayo udala ingxabano,
kodwa lowo olicaphucaphu wenza izono ezinengi.

23Ukuzigqaja komuntu kuyamehlisa,
kodwa umuntu ozehlisayo uzuza udumo.

24Osizana lesela uyazizonda yena;
usezifungise kulo ngakho ngeke afakaze iqiniso.

25Ukwesaba abantu kuba yizithiyo,
kodwa lowo othemba uThixo uzaphepha.

26Abanengi bazama ukuzisondeza kumbusi,
kodwa ukwahlulela okuhle kuvela kuThixo.

27Abalungileyo bayabenyanya abangathembekanga;
abaxhwalileyo bayabenyanya abalungileyo.