Psalms 86

Umkhuleko kaDavida

1Zwana, Oh Thixo, ungiphendule,
ngoba ngingumyanga ngiyaswela.
2Vikela impilo yami, ngoba ngizinikele kuwe;
sindisa inceku yakho ekuthembayo;
UnguNkulunkulu wami.
3Woba lesihawu kimi, Oh Thixo,
ngoba ngitshona ngikubiza ilanga lonke.
4Letha ukuthokoza encekwini yakho,
ngoba kuwe, Oh Thixo,
ngiphakamisela umphefumulo wami.

5Uyathethelela njalo ulungile, Oh Thixo,
ugcwele uthando kulabo abakhuleka kuwe.
6Zwana umkhuleko wami, Oh Thixo;
lalela ukukhala kwami ngicela umusa.
7Mhla ngiphakathi kokuhlupheka ngizakhala kuwe,
ngoba uzangiphendula.

8Phakathi kwabonkulunkulu kakho onjengawe, Oh Thixo;
kakulazenzo ezingalinganiswa lezakho.
9Zonke izizwe owazenzayo
zizakuza zikhonze kuwe, Nkosi;
zizaletha udumo ebizweni lakho.
10Ngoba umkhulu njalo wenza imisebenzi emangalisayo;
wena wedwa unguNkulunkulu.

11Ngifundisa indlela yakho, Oh Thixo,
ukuze ngihambe eqinisweni lakho;
ngipha inhliziyo engaxamalazanga,
ukuze ngilesabe ibizo lakho.
12Ngizakudumisa, Nkosi Nkulunkulu wami,
ngenhliziyo yami yonke;
ngizalidumisa ibizo lakho laphakade.
13Ngoba lukhulu uthando lwakho kimi;
ungenyule ekujuleni kwendawo yabafileyo.

14Iziqholo ziyangihlasela, Oh Nkulunkulu
iqembu lamadoda alesihluku lizingela impilo yami
abantu abangakunanziyo wena.
15Kodwa wena, Nkosi, unguNkulunkulu olozwelo, olobubelo,
ophuza ukuzonda, owandayo ngothando lokuthembeka.
16Phendukela ngakimi ube lesihawu kimi;
veza amandla akho ngenceku yakho,
ngisindise ngoba ngiyakukhonza,
njengokwenziwa ngumama.
17Ngipha isiboniso sokulunga kwakho,
ukuze izitha zami zisibone ziyangeke,
ngoba wena, Oh Thixo, usungisizile njalo wangiduduza.