John 11

Ukuvuswa kukaLazaro

1Kwakukhona-ke othile owayegula othiwa nguLazaro ^a weBethani ^b, emzaneni kaMariya loMarta udadewabo ^c. 2Kwakunguye uMariya owagcoba iNkosi ngamagcobo, wesula inyawo zayo ngenwele zakhe, omnewabo uLazaro wayegula ^d. 3Ngakho odadewabo bathumela kuye besithi: Nkosi ^e, khangela lowo omthandayo uyagula ^f. 4UJesu esezwile wathi: Lokhu ukugula kakusikho okokufa, kodwa kungokodumo lukaNkulunkulu ukuze iNdodana kaNkulunkulu idunyiswe ngakho ^g. 5UJesu wayebathanda-ke oMarta lodadewabo loLazaro ^h. 6Ngakho esezwile ukuthi uyagula, wasehlala insuku ezimbili endaweni lapho ayekhona ⁱ. 7Emva kwalokhu wasesithi kubafundi: Asiphinde siye eJudiya ^j. 8Abafundi bathi kuye: Rabi* ^k, amaJuda asanda ukudinga ukukukhanda ngamatshe, njalo uya khona futhi yini ^l? 9UJesu waphendula wathi: Kawakho amahola alitshumi lambili emini yini ^m? Nxa umuntu ehamba emini, kakhubeki, ngoba uyabona ukukhanya kwalumhlaba ⁿ. 10Kodwa uba umuntu ehamba ebusuku, uyakhubeka, ngoba ukukhanya kakukho kuye ^o.

11Wakhuluma lezizinto, emva kwalokhu wasesithi kubo: Umngane wethu uLazaro ^p uselele; kodwa ngiyahamba ukuze ngimvuse ebuthongweni ^q. 12Ngakho abafundi bakhe bathi kuye: Nkosi, uba elele, uzaphila ^r. 13Kodwa uJesu wakhuluma ngokufa kwakhe; kodwa bona bacabanga ukuthi wakhuluma ngokuphumula kobuthongo. 14Ngakho uJesu wasebatshela ngokucacileyo: ULazaro ufile. 15Njalo ngiyathokoza ngenxa yenu ukuthi bengingekho lapho, ukuze likholwe; kodwa asiye kuye. 16Ngakho uTomasi ^s, othiwa nguDidimusi, wathi kubafundi kanye laye: Asihambeni lathi, ukuze sife kanye laye ^t.

17Kwathi esefika uJesu, wamfica eselensuku ezine engcwabeni ^u. 18LeBethani yayiseduze leJerusalema ^v, okungaba ngamastadiyu* alitshumi lanhlanu ukusuka lapho; 19labanengi kumaJuda babefikile kuMarta loMariya, ukuze babaduduze ngomnewabo ^w. 20Ngakho uMarta, esezwile ukuthi uJesu uyeza, wayamhlangabeza ^x; kodwa uMariya wahlala endlini ^y. 21UMarta wasesithi kuJesu: Nkosi, aluba ubukhona lapha, umnewethu ngabe kafanga ^z; 22kodwa lakhathesi ngiyazi ukuthi loba yini ongayicela kuNkulunkulu, uNkulunkulu uzakunika yona ^aa. 23UJesu wathi kuye: Umnewenu uzabuya avuke. 24UMarta wathi kuye: Ngiyazi ukuthi uzabuya avuke ekuvukeni ngosuku lokucina ^ab. 25UJesu wathi kuye: Mina ngiyikuvuka ^ac lempilo ^ad; okholwa kimi, loba esefile, uzaphila ^ae; 26njalo wonke ophilayo ekholwa kimi, kasoze afe laphakade ^af. Uyakukholwa lokhu yini? 27Wathi kuye: Yebo, Nkosi; mina ngiyakholwa ukuthi wena unguKristu ^ag, iNdodana kaNkulunkulu ^ah, obezakuza emhlabeni ^ai.

28Esetshilo lokhu uMarta wasuka, wayabiza udadewabo uMariya ensitha, wathi: UMfundisi ulapha uyakubiza ^aj. 29Yena-ke esezwile lokhu, wahle wasukuma waya kuye. 30Kodwa uJesu wayengakafiki emzaneni, kodwa wayesendaweni lapho uMarta amhlangabeza khona ^ak. 31Ngakho amaJuda ayesendlini laye emduduza ^al, ebona uMariya ukuthi wasukuma ngokuphangisa ephuma, amlandela, esithi: Uya engcwabeni, ukuze akhale khona ^am.

32Kwathi uMariya, esefike lapho uJesu akhona, embona, wawela enyaweni zakhe ^an, esithi kuye: Nkosi, ngabe ubukhona lapha, umnewethu ngabe kafanga ^ao. 33Ngakho uJesu wathi embona ekhala, lamaJuda afika laye ekhala, wabubula emoyeni, wazikhathaza ^ap, 34wathi: Limbeke ngaphi? Bathi kuye: Nkosi, woza ubone. 35UJesu walila ^aq. 36Ngakho amaJuda athi: Khangelani ukuthi ubemthanda njani ^ar. 37Kodwa amanye awo athi: Lo, owavula amehlo esiphofu, ubengekwenze yini ukuthi lalo angafi ^as?

38Ngakho uJesu ebubula futhi phakathi kwakhe wafika engcwabeni ^at. Njalo lalilubhalu ^au, lelitshe libekwe phezu kwalo ^av. 39UJesu wathi: Susani ilitshe ^aw. UMarta udadewabo wofileyo wathi kuye: Nkosi, usenuka; ngoba uselensuku ezine ^ax. 40UJesu wathi kuye: Kangitshongo yini kuwe ^ay, ukuthi uba ukholwa ^az, uzabona inkazimulo kaNkulunkulu ^ba? 41Balisusa-ke ilitshe, lapho okwakulele khona ofileyo ^bb. UJesu wasephakamisela amehlo akhe phezulu ^bc, wathi: Baba, ngiyakubonga ngoba wena ungizwile. 42Kodwa mina bengisazi ukuthi uyangizwa njalonjalo ^bd; kodwa ngenxa yexuku elingiphahlileyo ngitshilo lokhu ^be, ukuze bakholwe ukuthi ungithumile ^bf. 43Esetshilo lezizinto, wamemeza ngelizwi elikhulu wathi: Lazaro, phuma ^bg! 44Wasephuma owayefile, ebotshiwe inyawo lezandla ngamalembu ^bh okuthandela isidumbu, lobuso bakhe bugoqelwe ^bi ngeqhiye. UJesu wathi kubo: Mthukululeni, limyekele ahambe ^bj.

Umphakathi uquma ukumbulala uJesu

45Ngakho abanengi kumaJuda, ababeze kuMariya ^bk bebona izinto azenzileyo uJesu, bakholwa kuye ^bl. 46Kodwa abanye babo baya kubaFarisi ^bm, babatshela izinto azenzileyo uJesu.

47Ngakho abapristi abakhulu labaFarisi ^bn baqoqa umphakathi ^bo, bathi: Sizakwenzani? Ngoba umuntu lo wenza izibonakaliso ezinengi; 48uba simyekele njalo, bonke bazakholwa kuye ^bp; amaRoma ^bq asezakuza athathe lindawo ^br lesizwe sakithi ^bs. 49Kodwa omunye wabo, uKayafasi ^bt, owayengumpristi omkhulu ngalowomnyaka ^bu, wathi kubo: Kalazi lutho lina, 50futhi kalinakani ukuthi kusilungele ukuthi umuntu oyedwa afele abantu, lokuthi isizwe sonke singabhubhi ^bv. 51Kodwa kazitsholongo lokhu ngokwakhe ^bw, kodwa engumpristi omkhulu ngalowomnyaka ^bx, waprofetha ^by ukuthi uJesu uzafela lesosizwe ^bz, 52njalo ^ca kungabi yisizwe kuphela ^cb, kodwa ukuze ^cc abuthele ndawonye ^cd labantwana bakaNkulunkulu ^ce abahlakazekileyo babe munye ^cf. 53Ngakho kusukela kulolosuku benza ndawonye icebo ukuze bambulale ^cg.

54Ngakho uJesu kabesahamba obala phakathi kwamaJuda ^ch, kodwa wasuka lapho waya elizweni eliseduze lenkangala ^ci, emzini othiwa yiEfrayimi ^cj, wasehlala khona labafundi bakhe.

55Laselisondele iphasika lamaJuda ^ck; labanengi abavela emaphandleni benyukela eJerusalema lingakafiki iphasika ^cl, ukuze bazihlambulule ^cm. 56Ngakho bamdinga uJesu, bekhulumisana bemi ethempelini besithi: Licabangani? Lithi isibili kayikuza emkhosini yini ^cn? 57Kodwa bonke abapristi abakhulu labaFarisi babekhuphe umlayo wokuthi uba ekhona owaziyo lapho akhona, akubike ukuze bambambe.