Matthew 20

Umfanekiso wezisebenzi zesivini

1Ngoba umbuso wamazulu ufanana lomuntu ongumninindlu ^a, owaphuma ekuseni kakhulu ukuqhatsha izisebenzi ziye esivinini sakhe ^b; 2esevumelene lezisebenzi ngodenariyo* ngosuku, wazithuma esivinini sakhe. 3Wasephuma sekungaba lihola lesithathu*, wabona abanye bemi emdangeni bengenzi lutho; 4lakulabo wathi: Yanini lani esivinini; njalo loba yini efaneleyo ngizalinika yona. Bahamba-ke. 5Wabuya waphuma sekungaba lihola lesithupha* langelesificamunwemunye, wenza njalo. 6Kwathi sekungaba lihola letshumi* lanye waphuma, wathola abanye bemi bengenzi lutho, wathi kubo: Limeleni lapha usuku lonke lingenzi lutho ^c? 7Bathi kuye: Ngoba akulamuntu osiqhatshileyo ^d. Wathi kubo: Yanini lani esivinini, njalo lizakwemukela loba kuyini okufaneleyo. 8Kwathi sekuntambama umninisivini wathi enduneni yakhe ^e: Biza izisebenzi, uzibhadale iholo, uqale ngezokucina kuze kube ngezokuqala ^f. 9Kuthe befika abaqhatshwa ngehola letshumi lanye ngulowo lalowo wemukela udenariyo. 10Njalo sebezile abokuqala bacabanga ukuthi bazakwemukela okungaphezulu; kodwa labo bemukela udenariyo ngamunye. 11Kwathi beyemukela bamsola umninindlu ^g, 12besithi: Labo abokucina basebenze ihola elilodwa, kodwa ubalinganise lathi ^h esithwele ubunzima bosuku lokutshisa ⁱ. 13Kodwa ephendula wathi komunye wabo: Mngane, angikoni; kanti kawuvumelananga lami ngodenariyo ^j? 14Thatha okwakho uhambe; ngiyathanda ukumnika lowokucina njengawe ^k. 15Kumbe angivunyelwa yini ukwenza engikuthandayo ngezinto zami ^l? Loba ilihlo lakho libi yini ^m, ngoba mina ngilungile ⁿ? 16Kunjalo-ke abokucina bazakuba ngabokuqala, labokuqala ngabokucina ^o; ngoba banengi ababiziweyo, kodwa balutshwana abakhethiweyo ^p.

UJesu ukhuluma ngokuhlupheka kwakhe

17Kwathi uJesu ^q esesenyukela eJerusalema wathatha abalitshumi lambili bebodwa endleleni, wathi kubo ^r: 18Khangelani, senyukela eJerusalema ^s, njalo iNdodana yomuntu izanikelwa kubapristi abakhulu lakubabhali; besebeyilahlela ukufa ^t, 19bayinikele ^u kwabezizwe ^v ukuze bayiyangise bayitshaye ngesiswepu bayibethele ^w; njalo ngosuku lwesithathu izabuya ivuke ^x.

UJesu ukhuza amadodana kaZebediya

20Kwasekusiza kuye unina ^y wamadodana kaZebediya kanye lamadodana akhe ^z, waguqa wacela ulutho kuye ^aa. 21Wasesithi kuye: Ufunani? Wathi kuye: Tshono ukuthi la amadodana ami amabili ahlale ^ab, enye ngakwesokunene sakho ^ac, lenye ngakwesokhohlo, embusweni wakho. 22Kodwa uJesu waphendula wathi: Kalikwazi elikucelayo. Linganatha yini inkezo engizayinatha mina ^ad, njalo libhabhathizwe ngobhabhathizo engibhabhathizwa ngalo mina ^ae? Bathi kuye: Singakwenza. 23Wasesithi kubo: Ngeqiniso lizayinatha inkezo yami, libhabhathizwe ngobhabhathizo mina engizabhabhathizwa ngalo ^af; kodwa ukuhlala ngakwesokunene sami langakwesokhohlo sami, kayisikho okwami ukuphana ngakho, kodwa kungokwalabo ^ag abakulungiselweyo nguBaba ^ah.

Ubukhulu obuqotho

24Kwathi sebezwile abalitshumi, bathukuthela ngezelamani ezimbili. 25Kodwa uJesu wababizela kuye wathi: Liyazi ukuthi ababusi bezizwe ^ai bayazibusa ngobulukhuni, lezikhulu zisebenzisa amandla phezu kwazo ^aj. 26Kodwa akuyikuba njalo phakathi kwenu; kodwa loba ngubani othanda ukuba ngomkhulu phakathi kwenu ^ak kabe yisisebenzi senu ^al; 27njalo loba ngubani othanda ukuba ngowokuqala phakathi kwenu kabe yisisebenzi senu; 28njengalokhu iNdodana yomuntu kayizanga ukukhonzwa, kodwa ukukhonza ^am, lokunika impilo yayo ibe lihlawulo ^an labanengi ^ao.

UJesu usilisa iziphofu ezimbili

29Kwathi ^ap bephuma ^aq eJeriko, ixuku elikhulu lamlandela ^ar. 30Njalo khangela, iziphofu ezimbili zihlezi endleleni, sezizwile ukuthi uJesu uyadlula, zamemeza, zathi: Sihawukele, Nkosi, Ndodana kaDavida ^as! 31Ixuku laselizikhuza ukuthi zithule, kodwa zamemeza kakhulu, zisithi: Sihawukele, Nkosi, Ndodana kaDavida ^at! 32UJesu wasesima wazibiza, wathi: Lifuna ukuthi ngilenzeleni? 33Zathi kuye: Nkosi, ukuthi amehlo ethu avuleke. 34UJesu esesiba lesihelo wathinta amehlo azo; njalo amehlo azo ahle abuya abona, zasezimlandela ^au.