Heb 1 | SNC | STEP | Guinenai, ḡaro vovoka e dabara ḡutumai Barau na peroveta tarimari ḡerina senera evaḡa-guruḡarito.

Hebrews 1

Barau ḡena guruḡa Natuna ḡenana

1 Guinenai, ḡaro vovoka e dabara ḡutumai Barau na peroveta tarimari ḡerina senera evaḡa-guruḡarito. 2 Senaḡi toma, mai ḡaro dokori ai, tu Natuna ḡenana ema vaḡa-guruḡarato. Barau na dagara mabarari tu Natuna eviniato bene ḡaunari. Ema ḡia ḡenana maki Barau na guba e tanobara eveirito. 3 Ḡia tu Barau marevana e mamana baregona evaḡa-foforiani, ema ḡia tu Barau tauḡena kavana. Ḡia ḡena guruḡa seḡukana na dagara mabarari eḡabi-taḡorini. Ḡia tauḡena na ḡera rakava ḡuriḡivaḡiri dabarana evei-ḡitakauato murinai, Barau Iaru-korokoro aroribanai ea tanu-tarito gubai.

Barau Natuna tu barego vedaurea, aneru maki evanaḡirito

4 Barau na Natuna tu etore-varaḡeato, aneru evanaḡirito. Korana tu arana eviniato maki varaḡe lelevaḡina, aneru arari evanaḡirito. 5 Korana Barau na aneru ta tu asi ekiraiato, ekirato,

“Ḡoi tu au Natugu,
toma au tu ḡoi Tamamu ai baiaḡo.”
O maiḡesi maki asi ma ekiraiato, ekirato,

“Au tu ḡia Tamanai baiaḡoni,
ema ḡia maki au Natugu ai beiaḡoni.”
6 Ema Barau na Natuna guinena tanobara ḡana ma beḡori-iaḡomaiani nai tu bekirani,

“Barau ḡena aneru mabarami na boḡono toma-rakariḡo vinia.”
7 Aneru ekiraḡirito nai tu ekirato,

“Barau na ḡena aneru eveirito iavara kavana,
ḡena vetuḡunaḡi tarimari karava emoreni noḡa.”
8 Senaḡina Natuna ekiraḡiani tu ekirani,

“Barau o, ḡoi ḡemu Vere dagina tu betanu-vanaḡi vanaḡini,
ḡemu Basileia tu ma iobukaiobukamu ḡesi oḡori-kauani.
9 Vei-iobukaiobuka tu oura-vinirini,
ma veiḡa rakavari tu asi oura-vinirini.
Moḡa lorinai, Barau o,
ḡemu Barau na maki karomu fakari ai ḡoi eḡabi-viriḡimuto,
debamu ai diḡa esisiato,
iaku na evaḡa-vonumuto.”
10 Ema ma ekiraiato, ekirato,

“Vere o, tovotovonai tu
ḡoi na tanobara oveiato,
ema guba maki ḡoi ḡimamu veiveina.
11 Ḡia tu beḡe korini,
senaḡi ḡoi tu botanuni;
mabarari dabuḡa kavana beḡe rakavani.
12 Ḡoi na koudi noḡa boiokurini,
dabuḡa kavana vetoḡari beḡe irauni,
senaḡi ḡoi vetoḡamu tu asi beirauni,
ema ḡoi ḡemu maḡuri laḡaniri maki
asi beḡe magoni.”
13 Barau na aneru ta maki asi ekiraiato,

“Aroribagu ai noma tanu,
bene iaḡo mo, ḡoi ḡevetari-vinimuni tarimari ḡoi kwakumu fanakauna dagaranai batore-taririni.”
14 Aneru mabarari tu vetuḡunaḡi iaukari moḡo, Barau na etuḡurito deikara vevaḡa-maḡuri beḡe ḡabiani tarimari vaḡa-kavari ḡana.