‏ Psalms 144

Mfalme Amshukuru Mungu Kwa Ushindi

Zaburi ya Daudi.

1 ^aSifa ni kwa Bwana Mwamba wangu,
aifundishaye mikono yangu vita,
na vidole vyangu kupigana.
2 ^bYeye ni Mungu wangu wa upendo na boma langu,
ngome yangu na mwokozi wangu,
ngao yangu ninayemkimbilia,
ambaye huwatiisha mataifa chini yangu.

3 ^cEe Bwana, mwanadamu ni nini hata umjali,
Binadamu ni nini hata umfikirie?
4 ^dMwanadamu ni kama pumzi,
siku zake ni kama kivuli kinachopita.

5 ^eEe Bwana, pasua mbingu zako, ushuke,
gusa milima ili itoe moshi.
6 ^fPeleka umeme uwatawanye adui,
lenga mishale yako uwashinde.
7 ^gNyoosha mkono wako kutoka juu,
nikomboe na kuniokoa
kutoka maji makuu,
kutoka mikononi mwa wageni
8 ^hambao vinywa vyao vimejaa uongo,
na mikono yao ya kuume ni midanganyifu.

9 ⁱEe Mungu, nitakuimbia wimbo mpya,
kwa zeze yenye nyuzi kumi nitakuimbia,
10 ^jkwa Yule awapaye wafalme ushindi,
ambaye humwokoa Daudi, mtumishi wake kutokana na upanga hatari.

11 ^kNikomboe na uniokoe
kutoka mikononi mwa wageni
ambao vinywa vyao vimejaa uongo,
na mikono yao ya kuume ni midanganyifu.

12 ^lKisha wana wetu wakati wa ujana wao
watakuwa kama mimea iliyotunzwa vizuri,
binti zetu watakuwa kama nguzo zilizoviringwa
kurembesha jumba la kifalme.
13 ^mGhala zetu zitajazwa
aina zote za mahitaji.
Kondoo zetu watazaa kwa maelfu,
kwa makumi ya maelfu katika mashamba yetu;
14 ⁿmaksai wetu watakokota
mizigo mizito.
Hakutakuwa na kubomoka kuta,
hakuna kuchukuliwa mateka,
wala kilio cha taabu
katika barabara zetu.

15 ^oHeri watu ambao hili ni kweli;
heri wale ambao Bwana ni Mungu wao.