‏ Psalms 34

Sifa Na Wema Wa Mungu

Zaburi ya Daudi, alipojifanya mwendawazimu mbele ya Abimeleki, ambaye alimfukuza, naye akaondoka.

1 ^aNitamtukuza Bwana nyakati zote,
sifa zake zitakuwa midomoni mwangu siku zote.
2 ^bNafsi yangu itajisifu katika Bwana,
walioonewa watasikia na wafurahi.
3 ^cMtukuzeni Bwana pamoja nami,
naam, na tulitukuze jina lake pamoja.

4 ^dNilimtafuta Bwana naye akanijibu,
akaniokoa kwenye hofu zangu zote.
5 ^eWale wamtazamao hutiwa nuru,
nyuso zao hazifunikwi na aibu kamwe.
6 ^fMaskini huyu alimwita Bwana, naye akamsikia,
akamwokoa katika taabu zake zote.
7 ^gMalaika wa Bwana hufanya kituo
akiwazunguka wale wamchao,
naye huwaokoa.

8 ^hOnjeni mwone kwamba Bwana ni mwema,
heri mtu yule anayemkimbilia.
9 ⁱMcheni Bwana enyi watakatifu wake,
kwa maana wale wamchao
hawapungukiwi na chochote.
10 ^jWana simba wenye nguvu
hutindikiwa na kuona njaa,
bali wale wamtafutao Bwana
hawatakosa kitu chochote kilicho chema.

11 ^kNjooni, watoto wangu, mnisikilize,
nitawafundisha kumcha Bwana.
12 ^lYeyote kati yenu anayependa uzima
na kutamani kuziona siku nyingi njema,
13 ^mbasi auzuie ulimi wake na mabaya,
na midomo yake kutokana na kusema uongo.
14 ⁿAache uovu, atende mema,
aitafute amani na kuifuatilia.

15 ^oMacho ya Bwana huwaelekea wenye haki,
na masikio yake yako makini kusikiliza kilio chao.
16 ^pUso wa Bwana uko kinyume na watendao maovu,
ili kufuta kumbukumbu lao duniani.

17 ^qWenye haki hulia, naye Bwana huwasikia,
huwaokoa katika taabu zao zote.
18 ^r Bwana yu karibu na waliovunjika moyo,
na huwaokoa waliopondeka roho.

19 ^sMwenye haki ana mateso mengi,
lakini Bwana humwokoa nayo yote,
20 ^thuhifadhi mifupa yake yote,
hata mmoja hautavunjika.

21 ^uUbaya utamuua mtu mwovu,
nao adui za mwenye haki watahukumiwa.
22 ^v Bwana huwakomboa watumishi wake,
yeyote anayemkimbilia yeye
hatahukumiwa kamwe.