‏ Psalms 37

Mwisho Wa Mwovu Na Urithi Wa Mwenye Haki

Zaburi ya Daudi.

1 ^aUsisumbuke kwa ajili ya watendao maovu,
wala usiwaonee wivu watendao mabaya,
2 ^bkwa maana kama majani watanyauka mara,
kama mimea ya kijani watakufa mara.

3 ^cMtumaini Bwana na utende yaliyo mema;
Kaa katika nchi ukafurahie malisho salama.
4 ^dJifurahishe katika Bwana
naye atakupa haja za moyo wako.

5 ^eMkabidhi Bwana njia yako,
mtumaini yeye, naye atatenda hili:
6 ^fYeye atafanya haki yako ingʼae kama mapambazuko,
na hukumu ya shauri lako kama jua la adhuhuri.

7 ^gTulia mbele za Bwana
na umngojee kwa uvumilivu;
usisumbuke watu wanapofanikiwa katika njia zao,
wanapotekeleza mipango yao miovu.

8 ^hEpuka hasira na uache ghadhabu,
usihangaike: itakuongoza tu kutenda uovu.
9 ⁱKwa maana waovu watakatiliwa mbali,
bali wale wanaomtumaini Bwana watairithi nchi.

10 ^jBado kitambo kidogo, nao waovu hawataonekana,
ingawa utawatafuta, hawataonekana.
11 ^kBali wanyenyekevu watairithi nchi
na wafurahie amani tele.

12 ^lWaovu hula njama dhidi ya wenye haki
na kuwasagia meno,
13 ^mbali Bwana huwacheka waovu,
kwa sababu anajua siku yao inakuja.

14 ⁿWaovu huchomoa upanga
na kupinda upinde,
ili wawaangushe maskini na wahitaji,
kuwachinja wale ambao njia zao ni nyofu.
15 ^oLakini panga zao zitachoma mioyo yao wenyewe,
na pinde zao zitavunjwa.

16 ^pBora kidogo walicho nacho wenye haki
kuliko wingi wa mali wa waovu wengi;
17 ^qkwa maana nguvu za waovu zitavunjwa,
lakini Bwana humtegemeza mwenye haki.

18 ^r Bwana anazifahamu siku za wanyofu,
na urithi wao utadumu milele.
19 ^sSiku za maafa hawatanyauka,
siku za njaa watafurahia wingi wa vitu.

20 ^tLakini waovu wataangamia:
Adui za Bwana watakuwa
kama uzuri wa mashamba,
watatoweka,
watatoweka kama moshi.

21 ^uWaovu hukopa na hawalipi,
bali wenye haki hutoa kwa ukarimu.
22 ^vWale wanaobarikiwa na Bwana watairithi nchi,
bali wale anaowalaani watakatiliwa mbali.

23 ^wKama Bwana akipendezwa na njia ya mtu,
yeye huimarisha hatua zake,
24 ^xajapojikwaa, hataanguka,
kwa maana Bwana
humtegemeza kwa mkono wake.

25 ^yNilikuwa kijana na sasa ni mzee,
lakini sijaona kamwe wenye haki wameachwa
au watoto wao wakiombaomba chakula.
26 ^zWakati wote ni wakarimu na hukopesha bila masharti.
Watoto wao watabarikiwa.

27 ^aaAcha ubaya na utende wema,
nawe utaishi katika nchi milele.
28 ^abKwa kuwa Bwana huwapenda wenye haki
naye hatawaacha waaminifu wake.

Watalindwa milele,
lakini uzao wa waovu utakatiliwa mbali.
29 ^acWenye haki watairithi nchi,
na kuishi humo milele.

30 ^adKinywa cha mwenye haki hutamka hekima,
nao ulimi wake huzungumza lililo haki.
31 ^aeSheria ya Mungu wake imo moyoni mwake;
nyayo zake hazitelezi.

32 ^afWatu waovu huvizia wenye haki,
wakitafuta kuwaua;
33 ^aglakini Bwana hatawaacha mikononi mwao
wala hatawaacha wahukumiwe
kuwa wakosa wanaposhtakiwa.

34 ^ahMngojee Bwana,
na uishike njia yake.
Naye atakutukuza uirithi nchi,
waovu watakapokatiliwa mbali,
utaliona hilo.

35 ^aiNimemwona mtu mwovu na mkatili akistawi
kama mwerezi wa Lebanoni,
36 ^ajlakini alitoweka mara na hakuonekana,
ingawa nilimtafuta, hakupatikana.

37 ^akWatafakari watu wasio na hatia,
wachunguze watu wakamilifu,
kuna mafanikio kwa mtu apendaye amani.
38 ^alLakini watenda dhambi wote wataangamizwa,
mafanikio yao yatakatiliwa mbali.

39 ^amWokovu wa wenye haki hutoka kwa Bwana,
yeye ni ngome yao wakati wa shida.
40 ^an Bwana huwasaidia na kuwaokoa,
huwaokoa kutoka kwa waovu na kuwahifadhi,
kwa maana wanamkimbilia.