Psa 108 | TBG | STEP | O Kotio, te ariqaa muntuvi vauraro ti muntukaqihairo paru i vaimanta te ihi tivaqi viha ai autu tuahera karerave.

Psalms 108

Devitiva maa ihira qara ntuvatora

1 O Kotio, te ariqaa muntuvi vauraro ti muntukaqihairo paru i vaimanta te ihi tivaqi viha ai autu tuahera karerave.

2 Ho ti maraquravauvo, himpuane.

Tikitaa kulelevauvo, himpuate. Himpiqenavu ihi tivaqi viha kuari vauraqama kaariraro uru ntaarire.

3 Noravauvo, te vo vatanaa vo vatanaaka nivutaini vaiha ai autu tuaheraqi virerave.

Te vo vaiinti nahenti vainaini oru vaiha ariara ihi tivaqi virerave.

4 Are vaiinti nahenti aaqurihama nimite variarava nai uri aatarakero voqavatama vaivo. Viva maaqaahairo oru viviro, vurura naaruvaini oru ntairave.

Are nena vaiinti nahentiara noraiqaakera iriqira vi variara okarava, vivavata maaqaahairo oru viviro, vurura tonavuvano vairaqaa oru ntairave.

5 O Kotio, naaruvaihaira nena mpeqa okara vaiinti nahenti numiqairamanta tavaate.

Nena takuqi vai okarara qoqaa qovarama kaira ekaa vataini variaka tavaate.

6 Mpo, are te ai aarauna uvara irihara, tinavu ai muntukavano vai vaiinti nahentika nena kempukaqohaira ruaruama timitairaqe ho variare.

7 Mpo Kotio, are nena turuaraini vaihara maa uvara tianarave:

Te Kotika te navutaaka naatarake Sekemi vatukavata, Sukoti Uqitaini vai vataravata, rairake tenta vaiinti nahenti nimirerave.

8 Gileaativata Manasevata te una vatatantama vaivo.

Efaraimu vatavano vaireva, ti iqoka tovaqa voqaara vaivaro, Iutaa vatavano vaireva, ti avuhainaa kauru voqaarama vaivo.

9 Moapi vatavano vaireva, te namari tunti vauna tanura voqaarama vaivo.

Idomu vatavano vaireva, tentasurahunkuke aqu kauna vatavama vaivo.

Te Pirisia vataini vaiha vora ntuvaqi virerave, tianarave. Kotio, are minti tianarave.

10 Mpo Kotio, tavave ti tivita varairaqe te vaantaavuravano ututuma tai vatukaraqi ho oru virarave?

Tavave ti tivita varairaqe te oru Idomu vatanaaka naatara kararave?

11 Ho are mintiataarave. Vate maa entara are kia mintiraitira, tinavu tauvaqa utu timitera, kia tinavu iqoka vaiinti hampata vuaro.

12 Vaiintivano tinavu kahaqiarirava kia ho vairara tira, arema tinavu kahaqiraqe tenavu navutaaka ho naatara kararave, turo.

13 Kotiva tinavu mantaraini vairera, tenavu homa navutaaka naatara kaariraro viva vikaqaa aiqu ntava taanaro.