Phili 2 | TGG | STEP | Ke, kiiskiis kimi lo Karisito i farakrakai gam la. Famais kia i fafnen gam. Tanwa Kalkaluu i faturim la tura gam. Gam tel sinang rokap la ke gam ka famais faliu la ini gam.

Philippians 2

Keren fasabiro pes kerer arae Karisito i tel ta u

1 Ke, kiiskiis kimi lo Karisito i farakrakai gam la. Famais kia i fafnen gam. Tanwa Kalkaluu i faturim la tura gam. Gam tel sinang rokap la ke gam ka famais faliu la ini gam. 2 Pesu, in tikii sau e wolwol kimi, ma in tikii sau e matngan famais gamen finngas u usuf gam temtem tikii. In rokap sabin le in tikii sau e balmi, ke ik tikii sau e wolwol na foron foim ae gam ier isi tel u. Male gamen tel u arae, ke ian laes kanaka. 3 Gong gam tel ti tier una farokap gam keskes tom ma fal biil. Gong gam usefages foes gam tom. Isau le i rokap le temtem tikii lo gam, gamen fabiro pes gam, isi gamek lala wol tom le fal ri laumet lo gam. 4 Gam temtem tikii, gong gam wol na farokap fafis gam tom, isau le gamen wol sabin isi farokap fal.

5 In rokap le foron wolwol kimi tikii in fasih ini wolwol ke Karisito Iesu, ma in tara aragii:

6 I tom e God.
Isau le biil i wol le in pose papte kiiskiis laumet kia, isi ik fasih tura God. Biil.
7 I suaf ufu kiiskiis laumet kia,
ma ka tapiek arae nenge fafauun,
ke i pang arae nenge kaltu.
8 Ke fanu ri ka par u arae nenge kaltu,
ke ka fasabiro u
ma ka misuut lo God papang na minet kia.
Ma i met tom bae na aupaket.
9 Pesu God ka sik u una kiiskiis ae i buuii kanaka,
ma ka ta as usuf i, ae i laumet kanaka na olon foron as tikii.
10 Pesu ri tikii buuii na Kukulii,
ke na piklinbat ke na piklin nanal sabin, rik ilepul na asa Iesu,
11 ma kerme ri tikii ik fapos u le Iesu Karisito i e Kumguui,
isi God Tama kerer in kep memeh lo.

Gamen Popos arae foron Keltot

12 Pesu foron talang, arae tom gam misuut la na foron orek aunbiing ia kiis tah tura gam, ke igii sabin aunbiing biil ia kiis tura gam, ia ier le gamen famam foim rakrakai ini sokeh, una finngas u le God ka faliu ta gam. 13 Gamen liu arae, wara le God tom i foim na liu kimi, isi gamen ier isi mi na wolwol kia, ma i farakrakai gam isi gamek misuut lo.

14 Na foron tier tikii gam tel u, gong gam belbel orek ke gong gam fapue kuna, 15 isi liu kimi biil in faluuiluui ini foron sinang laulau ke biil ifasih tikas in tiu gam ini ti tier, ke gamek tapiek berberat ke God, ae biil ti tier in ger na liu kimi. Gamen popos arae foron keltot buuii na bat, aunbiing gam liu na fatpoton fanu na ulul igii, ae ri la ger, ma sinangu ri i tapak koseng rokap na sinang. 16 Ke, gamen liu arae, aunbiing gam pose fat na orek ae i mel e liu lo, isi iak laes na biing ke Karisito, le foim turan filau kiak, biil i tier foes.

17 Rokap na foim ae i la turan unune kimi i arae tunmapek usuf God. Isau male ian met, ke daung in ring arae wain na olon tunmapek ae, ian laes tura gam tikii. 18 Ma gam sabin gamen laes turang.

Timoti ke Epafroditus

19 Male Iesu Kumguui i somangat na wolwol kiak, biil in sawin, ke ian wuun Timoti usuf gam, isi in farakrakai iau ini ususe lo gam, aunbiing in fis. 20 Ma biil sabin tikas arae Timoti, ae i mel e wolwol kia una farokap gam. 21 Wara le fanu tikii ri ier isi rin farokap fafis ri tom, ma biil ri ier isi farokap foim ke Iesu Karisito. 22 Isau le gam tom gam ka usum tah le Timoti i nenge rokap na kaltu, wara le i foim turim tah turang arae nenge iun latama. Ma ka foim turim ta turang ini Rokap na Fafas. 23 Ke pesu, aunbiing sau ian usum na matngan sanih in tapiek lo iau, ia wol le ian wuun ufu usuf gam. 24 Na unune kiak lo Kumguui, ia usum le biil in sawin ke iau sabin iak la usuf gam.

25 Isau, ia wol le in rokap kanaka le ian wuun fafis Epafroditus tuaklik na asa Karisito usuf gam. I nenge tikiin foim kiak, ae i tibel ta iau na fapaket igii, ma i e talmi ae gam wuun ufu tah isi lupes iau. 26 I rokap le ian wuun fafis u, wara le i kalkal kanaka tom isi le in par gam, ma ka tatawin kanaka e wol kia, aunbiing gam ongen ta u le i sasem. 27 Tekentu tom le i sasem tah, ma fatat in met. Isau le God i mais u, ma biil i keskes sau, i mais iau sabin isi gong ia lala mamais sabin. 28 Pesu wolwol kiak ka rakrakai kanaka le ian wuun fafis u, isi gamek lala laes aunbiing gamen par u sabin, ke isi biil mang ian lala mamais. 29 I rokap le gamen somangat pes u ini laes arae nenge tualik gam na asa Kumguui. Gamen bulat lon matngan kaltu arae, 30 wara le i ta liu kia tom na foim ke Karisito, ma fatat in met. Aunbiing biil ifasih le gamen lupes iau, i ier tom le in kep sala gam na lupes iau, ma biil i lala wol na liu kia le, in met le biil.