1Cor 12 | TPZ | STEP | Kën kea me vameneoß, kuru eöß to iu a noß neöm se maaka vavih a ma heß pa Tuvuh Vasioß.

1 Corinthians 12

A Ma Heß Pa Tuvuh Vasioß

1 Kën kea me vameneoß, kuru eöß to iu a noß neöm se maaka vavih a ma heß pa Tuvuh Vasioß. 2 Eöm to nat voh em, pa ö ne eöm to teß moaan va voh nem, paröm tavus o teß va po vaman. Eöm to teß voh nem pa taateß popoen, ko nö vapiun voh em pa hin manih po sosoenën vapikpiuk, a ma tah to hikta onöt ne a vaato. 3 Ivëh, köß iu a noß neöm se maaka pan, a Tuvuh pe Sosoenën se keh puh non pa teß, eß hikta se veveot non e Ieesuß. Ka teß to hikta teß me non a Tuvuh Vasioß, eß me to hikta teß non o kikis pa soe pan, “E Ieesuß e Sunön”.

4 Eß to teß non a ma vu heß pa Tuvuh Vasioß, ivëhkëk, ee to taneß maß pa pah Tuvuh Vasioß ro. 5 Eß to teß non a ma vu kiu vakëkëh ne ea to nonok ke no e Sunön, ivëhkëk, eß to teß non a pah Sunön ro to teß non ne ea to kiu no peß. 6 Eß to teß vakëkëh e non a ma ö nonok kiu ava, ivëhkëk, eß a pah Sosoenën ro to heßheß kikis non a ma napan kurus, kee onöt e ne pa nok a ma kiu kurus. 7 A Tuvuh Vasioß to vavatvus vateeraß non sih o kikis peß manih pa ma papaeh teß, kee onöt e ne pa vaßaus o meoh upöm. 8 A Tuvuh Vasioß to heß a pah teß o heß kikis va pa vatvus o kokoman natsean, ka manih pa meh teß a pah Tuvuh Vasioß avoeß to heß poan o kikis pa vatvus a ma vu nat pe Sosoenën. 9 Ka manih pa meh teß a pah Tuvuh Vasioß avoeß to heß o vaman. Ka manih pa meh teß a pah Tuvuh Vasioß pamëh to heß o kikis va pa vatoß o teß. 10 Ka Tuvuh heß a meh teß o kikis va pa nok a tah vatoksean, ka meh teß pa vanënën soe, ka meh teß pa kiiki a ma vu tuvuh hat, keß a tuvuh vih, ka meh teß pa vaato pa ma meoh to, ^{▼▼Ep na po Aposol 2:4 pa ö no o heß va pa Tuvuh Vasioß to nö voh maß po aposol, kee taneo pa vaato pa ma meoh to.} ka meh teß pa ririh hah a ma meoh to poë varih. 11 Eß a pah Tuvuh Vasioß avoeß to nonok non a ma tah poë varih, ka Tuvuh vavatet non sih o iu koman peß, pataeah neß se heß papaeh manih pa teß.

Ea Kurus To Teß Va No Manih Po Pöh Sionin

12 A sionin a teß, eß a pah tah ro, ivëhkëk, eß to teß non a ma meh ö peo. Eß to teß ro e non a ma ö peo varih to nok non o sionin, a ma ö kurus poë varih to teß non o pöh sionin ro. E Kristo me to teß va non nën. 13 A ma paeh pea o Jiuß, ka ma meh o teß varih to hikta teß ne pan ee ro Jiuß. Ka ma paeh pea o teß kikiu akuk, ka ma meh o teß taihan. Ivëhkëk, ea kurus nee to pupui a ra pa pah pupui va pa pah Tuvuh Vasioß, ka tavus ee o pöh sionin manih pe Kristo. Ivëh, ke ea kon a pah Tuvuh Vasioß avoeß.

14 A sionin a teß to teß me non a ma ö peo. 15 O mon se keh soe pan, “Eöß hikta teß noß o koren, ivëh, köß hikta teß noß a meh ö va po sionin.” Ivëhkëk, eß se keh soe ro va en nën, eß to teß avoeß e non a meh ö va po sionin. 16 Ko tenan se keh soe pan, “Eöß hikta teß noß o matan, ivëh, köß hikta teß noß a meh ö va po sionin.” Ivëhkëk, eß se keh soe ro va en nën, o tenan to teß avoeß e non a meh ö va po sionin. 17 O sionin avoes se keh teß non o matan, eß to hikta onöt non a pënton. O sionin avoes se keh teß non a tenan, eß to hikta onöt non a avuh. 18 E Sosoenën to vahoß voh a ma paeh ö va po sionin vamanih pa ö neß to iu va non. 19 Eß se keh teß non a pah ö va po sionin ro to teß non, o sionin pamëh to hikta teß non o sionin. 20 Ivëh, ko sionin to teß non a ma ö peo, ivëhkëk, eß o pöh sionin ro.

21 Ko matan to hikta onöt non a soe ke o koren pan, “Eën se keh hikta teß nom, eöß a paeh se teß vavih e noß.” Ko pasun to hikta onöt non a soe ke o mon pan, eën se keh hikta teß nom, “Eöß a paeh se teß vavih e noß.” 22 Ahik, a ma ö sionin varih ne ea to koman no pan, ee to hikta teß kikis ne, ee se keh hikta teß ne, o sionin hikta se teß vavih non. Ahik rakah. 23 Ka ma ö sionin varih ne ea to koman vöknah no raoe to hat, ea to matop vavih no raoe. Ea to matop rakah no a ma ö ne ea to iu koaan no. 24 A ma ö matan vavih varih po sionin ea to hikta kupkup no. Ivëhkëk, e Sosoenën to vahoß vatös kurus voh en po sionin, ko ta voh e non pa ma meh ö va po sionin varih ne ea to haraß no pan, eße a ma tah akuk. 25 Ivëh, ka sioniira se koe a taki. E Sosoenën to iu non a ma ö vakëkëh va po sionin se matop vavih e ne pa ma meh ö va pee. 26 Ivëh, ka pah ö va po sionin se keh haraß non a kamis, a ma meh ö va po sionin se pah kamis vaßpeh e ne. Ka pah ö va po sionin se keh haraß vaeö, a ma meh ö va po sionin me se haraß vaeö ee.

27 Ivëh, ke eöm kurus rakah a sionin e Kristo, eöm papaeh to teß nem a ma ö va po sionin pamëh. 28 Komön o kum teß varih to vaman ne e Ieesuß, e Sosoenën to vateß momoaan voh o aposol, vapöök, o teß vanënën soe, vakön, o teß vavaasis. Ke Sosoenën vateß o teß nonok tah vatoksean, me o teß vavatoß teß to haraß ne a mët, me o teß va pa vaßaus o upöm teß, me o teß va pa matop a ma kiu, me o teß to vavaato ne pa ma meoh to. 29 O teß kurus hikta se tavus ne o aposol, me o teß vanënën soe, me o teß vavaasis, me o teß nonok tah vatoksean. 30 O teß kurus hikta se tavus ne o teß vavatoß teß, me o teß vavatvus soe pa ma meoh to, me o teß to ririh hah a ma meoh to. 31 Ivëhkëk, eöm se iu vamaman rakah nem a kon a ma heß apaßpuh va pa Tuvuh Vasioß.

A Taateß Iu Teß Eß O Heß Vih Oah

Kuru eöß to iu soe ka no neöm a pah taateß to teß vih oah non.