1 Corinthians 2
E Pöl To Vatvus A Soe Suk O Vaman Pa Napan Va Körin
1Kën kea, po poen nöß to nö voh maß peöm, pa heß a soe vamaman to taneß maß manih pe Sosoenën, eöß hikta soe voh ka neöm ta soe marën a vamanman a neöm. Eöß hikta teß me noß o nat apuh. 2Suk ataeah, manih po kokoman peöß, eöß to anoe a ma meh tah pa ö nöß to teß vaßpeh me a noß neöm. Eöß to nat varoe ko noß a mët pe Ieesuß Kristo manih pa kuruse. 3Ivëh, ko poen nöß to teß vaßpeh me a noß neöm, eöß koman a hikto kikis, eöß to nanaöp e noß po kikis pe Sosoenën, paröß rikrik me e noß, suk eöß to haraß noß pan, o kikis koman peöß to kökööt pa vatvus vavih a soe peß. 4Ka ma soe vih varih nöß to vavatvus ka noß neöm, eöß to hikta vavatvus va noß manih pa teß natnat vörep, marën a vamanman a neöm. Ahik. Eöß to vatvus a soe pe Sosoenën, ka Tuvuh Vasioß to vakiu o kikis peß pa vataare a neöm a soe pamëh, eß a man. 5Eöß to nok va nën, suk eöß to iu noß pan o vaman peöm se aan manih po kikis pe Sosoenën, ko nat non aan manih po kikis va po nat pa teß.A Tuvuh Pe Sosoenën To Heß O Kokoman Vih Me O Nat Manih Pea
6Ivëh, ka napan varih to sun vakis voh ee pa taateß pe Sosoenën, ee to nat voh ee pa soe natsean apuh nemöm to vavatvus nem. Ivëhkëk, o nat pamëh nee to kon to hikta vatoe me non o nat no a napan va po oeh vëh to nat ne. Pareß hikta vatoe me non o nat pa ma teß susun varih po oeh vëh, no o kikis pee se ro këh raoe. 7A soe natsean pamëh nemöm to vavatvus nem to taneß maß manuh pe Sosoenën. E Sosoenën to hikta nok avoeß voh non o oeh vëh, pareß vateß voh en po nat, marën a vaihoß vavih a ra manuh pa vöön va kin. Ka tah pamëh to vakoaan avoeß voh e non. 8Ahik voh ta pah teß susun manih po oeh vëh to nat voh i non a pusun in a soe. Ahik. Ee se keh nat voh ne, ee hikta se öt voh ne e Sunön, a Teß vëh to avë me non e Sosoenën po maaka, ko ni in poë pa kuruse. 9Ivëh, ka pusun in a soe manih po Puk Vapenpen pe Sosoenën to soe va non manih pan,“A ma tah no matan to hikta ep voh in,
me a ma tah no tenan to hikta pënton voh,
me a ö neß to hikta tavus voh manih po kokoman pa teß,
me a ma tah kurus poë varih ne Sosoenën to vamatop voh ken pa napan varih to iu rakah ne poë.” a
10A soe va pa ma tah poë varih to teß vakoaan voh e ne, ivëhkëk, e Sosoenën to kuin a Tuvuh peß, pareß vatvus a soe pamëh manih pemöm. Suk ataeah, a Tuvuh Vasioß to ep vahik e non pa ma tah, me eß to ep non o kokoman, me a taateß pe Sosoenën vëh, to vakoaan voh non a napan. Pareß vatvus a tah pamëh manih po teß varih to iu ne poë. 11Eß to teß va non manih pan, ahikta meh teß to nat non po kokoman pa meh teß. Ahik. A tuvuh koman peß to teß non peß, to nat koman hah a non. Ivëh, ka hikta teß to nat non po kokoman pe Sosoenën. A Tuvuh koman pe Sosoenën to nat hah a non. 12Ivëh, kemöm o aposol to hikta kon voh a tuvuh no a napan va po oeh to teß me ne. Ahik. Emöm to kon voh a Tuvuh vëh to taneß maß pe Sosoenën, marën a vamaaka a ra pa ma heß vih ne Sosoenën to heß vapeo oah voh a ra. 13Emöm to vavatvus nem a ma heß poë varih. Ivëhkëk, a soe pemöm to hikta taneß maß po nat pa teß. Ahik, a Tuvuh Vasioß koman to vavaasis a möm, kemöm vavatvus nem a soe pamëh. Emöm to vavatvus nem a soe pa Tuvuh Vasioß manih pa napan no a Tuvuh Vasioß to teß non pee.
14Ivëh, ka teß to hikta teß me non a Tuvuh Vasioß, eß to kokoe e non pa ma vavaasis man pa Tuvuh pe Sosoenën, suk ataeah, eß to koman non pan, a ma vavaasis man poë varih, eß a ma vavaasis nun, pareß hikta onöt non a vamaaka raoe. Ivëhkëk, ea to kokon taneß no sih a ma vavaasis poë varih pa Tuvuh Vasioß. Ivëh, ka Tuvuh Vasioß varoe to antoen non a vaßaus a ra pa inan a ma tah pe Sosoenën. 15A teß to teß me non a Tuvuh Vasioß, a teß pamëh to onöt i non pa inan a ma tah kurus no Tuvuh Vasioß to vavaasis i non. Ivëhkëk, o teß varih to hikta teß me ne a Tuvuh Vasioß to hikta onöt ne a inan o kokoman po teß varih to teß me ne a Tuvuh Vasioß. 16A tah pamëh to teß man e non, suk o Puk Vapenpen pe Sosoenën to soe va non manih pan,
“Eteh to nat non pa ma kokoman kurus pe Sunön,
pareß antoen non a vavaasis e Sunön ta paeh tah?” b
Ivëhkëk, ea o teß va po vaman to maaka e no pa ma tah poë varih, suk o kokoman pe Kristo to teß me e non pea.
Copyright information for
TPZ