2Cor 3 | TPZ | STEP | Eöm koman kës nem pan, emöm to taneo hah em pa nok a ma soe varih marën a vamanman a neöm, köm koman nem pan, emöm a nap vihvih? Emöm to hikta teß va nem manih po upöm teß to hi ro upöm, kee kiun o kiun to soe ka non neöm pan, emöm o teß vihvih. Me emöm to hikta iu nem a soe ka neöm pan, eöm se kiun a ma vu kiun marën a vaßaus a möm. Ahik rakah!

2 Corinthians 3

O Aposol, Ee A Nap Kiu Va Po Vatompoan Voon

1 Eöm koman kës nem pan, emöm to taneo hah em pa nok a ma soe varih marën a vamanman a neöm, köm koman nem pan, emöm a nap vihvih? Emöm to hikta teß va nem manih po upöm teß to hi ro upöm, kee kiun o kiun to soe ka non neöm pan, emöm o teß vihvih. Me emöm to hikta iu nem a soe ka neöm pan, eöm se kiun a ma vu kiun marën a vaßaus a möm. Ahik rakah! 2 Eöm koman to teß va nem manih po kiun pemöm se soe vanat a napan a ma taateß pemöm. Ka ma soe va po kiun pamëh to kiun rakah ne manih pa ma kupu pemöm, no a napan kurus se ep, pare ëh a soe to kiun non po kiun pamëh. 3 Eöm se teß vamhën rakah nem, ka napan se ep va ka no neöm manih, po kiun to taneß maß pe Kristo. Manih pa kiu pemöm ne Kristo to kiun o kiun pamëh. O kiun pamëh neß to hikta kiun voh po tah kinkiun kiun. Ahik. Eß to kiun voh o kiun pamëh manih pa Tuvuh pe Sosoenën teßteß tamoaan. Eß me to hikta kiun voh manih pa ta vös. Ahik. Eß to kiun voh manih po kupu pea ra napan.

4 Manih pe Kristo ne Sosoenën to kon voh a möm pa nok a kiu peß. Kemöm nat va e nem manih pe Sosoenën se nok a kiu peß, keß tavus vavih rakah en, 5 Oman, emöm to hikta sosoe nem pan, emöm koman to antoen e nem pa nok a kiu pamëh. Ahik. E Sosoenën koman to teß non manih pemöm, pareß heß a möm o kikis, kemöm antoen e nem pa nok a ma kiu peß. 6 E Sosoenën koman to heß a möm o kikis, kemöm onöt e nem pa tavus o teß kikiu va po vatompoan voon peß vaßpeh me a napan peß. Ko vatompoan pamëh nee to hikta kiun voh manih po Puk va po Vavaasis pe Mosës. Ahik. Eß a tah koman pa Tuvuh Vasioß. Ka soe va po Vavaasis pamëh se ip vamët en pa ma apeero teß. Ivëhkëk, a Tuvuh Vasioß to heßheß non sih o toßtoß tamoaan manih po teß.

7 A soe va po Vavaasis pe Mosës to kiun voh non pa ta vös. Ka soe pamëh to ipip vamët voh e non pa apeera napan. Ko poen ne Sosoenën to kiun o Vavaasis pa ta vös, pareß heß o Vavaasis pamëh manih pe Mosës, o Vavaasis pamëh to nö vaßpeh me en maß po maaka apuh pe Sosoenën. O maaka pamëh to tavus manih pa matan e Mosës. Ka napan va Israël hikta onöt ne a kuteß manih pa mataneah, suk o maaka pamëh to kikis vörep. Vasuksuk poß, no maaka pamëh to hikhik amamot nö e non. 8 Ivëh, ka kiu ne Sosoenën to nok manih pa heß a napan a Tuvuh Vasioß, to teß vih oah e non pa kiu vëh neß to nok voh, pa ö neß to heß e Mosës o Vavaasis peß. O kikis me o maaka apuh peß se teß tamoaan non manih pa kiu va pa heß a Tuvuh Vasioß. 9 O Vavaasis pe Mosës to vahoß en pea manih po vahutët, pareß vateen en pea pa hat, ka apeera ro en. Ivëhkëk, a kiu pamëh se keh nö me maß o maaka apuh pe Sosoenën, a, a kiu va pa nok a napan, kee tavus o teß totoopin manih pa matan e Sosoenën, eß a kiu pamëh se tavus vaßpuh oah en maß po kikis vamoaan pe Sosoenën. 10 O maaka me o kikis apuh pe Sosoenën to te vaßpeh tamoaan me e non po vatompoan voon pamëh ne Sosoenën to nok. Pareß vih oah e non po maaka me o kikis va po Vavaasis pe Mosës. Ivëh, ka kuru vaßih, eß to ep ke non pan o kikis va po Vavaasis pe Mosës to hik rakah en. 11 O Vavaasis pe Mosës to hikta se teß tamoaan non, eß to hikhik amamot nö e non. Ivëhkëk, o Vavaasis pamëh to nö vaßpeh me voh maß o kikis apuh pe Sosoenën. Ivëh, ka kuru na to nat e no po vatompoan voon teßteß tamoaan vëh, to apuh oah e non po Vavaasis pe Mosës.

12 Emöm to vaman rakah e nem, pamöm anoeh e nem po vatompoan voon pamëh se tavus vaßpuh manih pemöm, pareß teß tamoaan non. Ivëh, nemöm to hikta nanaöp suk nem a soe vamaaka o vatompoan pamëh manih pa napan. 13 Emöm hikta onöt nem a nok vamanih pa ö ne Mosës to nonok va voh non. O poen pamëh no maaka to hikta hik avoeß këh non a matan e Mosës, keß kon a ta rara, pareß kupkup en pa mataneah, pan a napan va Israël se nat ne ep po maaka se hikhik amamot nö këh non a mataneah. 14 Ka ma kokoman pa napan va Israël nun rakah ee pa soe pe Sosoenën vëh, nee to ëhëh ne to teß non po vatompoan vamoaan. Ee to hikta onöt ne a maaka in a pusun in a ma soe nee to tënan. Eß to teß va e non manih pa ta rara vëh to teß voh non manih pa matan e Mosës to sunpip non a ma kokoman pee. Ka hikta pah teß to ihan a ta rara pamëh. Manih varoe pe Kristo, ne Sosoenën to ihan këh a ma kokoman pa napan pa ta rara pamëh. 15 Ivëh, ka kuru vaßih no a napan to ëhëh ne sih o Vavaasis pe Mosës, ka ta rara pamëh to sunpip e non pa ma kokoman pee, kee hikta maaka ne a pusun in a soe pamëh. 16 Ivëhkëk, a teß vëh to panih a ma taateß hat peß, pareß suk e Sunön, e Sosoenën se ihan en pa ta rara vëh to sunpip non o kokoman nun peß. 17 Ko poen nöß to vavaato suk noß e Sunön, eöß to vavaato suk me e noß pa Tuvuh Vasioß. Ka Tuvuh Vasioß pe Sunön se keh teß non manih pa pah teß, ka hikta tah se sunpip hah non poan, ka teß pamëh tavus en a teß taihan. 18 Ea kurus to hikta teß hah me no ta tah to sunpip non a mataara, ivëh, no maaka apuh pe Sunön to nö suk maß manih pea, ka tavus va ee manih po siroak no a potan to nan non maß, keß paapa non na po upöm teß. A ma tamoaan rakah na to kokon no sih o maaka pamëh. Ko maaka pamëh papanih tamoaan nö e non pa ma taateß hat pea, ka tavus va ee manih pe Sunön. Ke Sunön koman, eß a Tuvuh to nonok va non nën.