Galatians 3
A Taateß Va Pa Vatet O Vavaasis Pe Mosës, Me A Taateß Va Po Vaman
1Ke eöm varih a napan va Galesiaß, eöm o papön rakah. Emöm to soe vamaaka rakah ke voh em peöm pa pusun in a mët pe Ieesuß Kristo manih pa kuruse. Eteh to nok a neöm, ka ma kokoman peöm nun? 2Eöß to kehkeh hi a no neöm a siß pah tah, eöm kon vah vavoh in a Tuvuh Vasioß nih? Eöm kon koe kës voh a Tuvuh Vasioß manih pa ö nöm to vavatet nem o Vavaasis pe Mosës? Ahik rakah! Eöm to kon koe a Tuvuh Vasioß manih pa ö nöm to pënton a Soe Vih paröm vaman a soe pamëh. 3Eöm papön vahik kov em eh? Eöm to taneo voh maß o toßtoß voon peöm manih po kikis pa Tuvuh Vasioß. Vahvanih köm kehkeh vavih oah e nem po toßtoß pamëh manih po kikis koman peöm? 4Moaan voh no a ma punis apuh varih to tavus voh ee peöm, suk eöm to tavus o teß va po vaman. Eöß koman to hikta koman rakah noß pan, eöm se teß akuk a ma punis poë varih. 5E Sosoenën heß kës voh a neöm a Tuvuh Vasioß, pareß nok a ma tah vatoksean manih topnineöm, suk eöm to vavatet nem o Vavaasis pe Mosës? Ahik rakah, eß to nok vavoh nën, suk eöm to pënton a Soe Vih paröm vaman a soe pamëh.6O Puk pe Sosoenën to teß non a soe to soe non pan,
“E Abraham to tënan voh a soe pe Sosoenën, pareß vaman a soe pamëh.
Ivëh ne Sosoenën to pokaß suk voh poan a teß totoopin.” a
7Ivëh, köm se nat vavih rakah va nem manih pan, o pus koaß vamaman rakah pe Abraham ivarih, o teß to tënan a soe pe Sosoenën, pare vaman ne a soe pamëh. 8Moaan rakah voh ne Sosoenën to nat va e non manih pan, amot neß se pokaß a napan varih to hikta teß ne pan ee ro Jiuß o teß totoopin, suk ee se vaman pet ee pa Soe Vih. Ivëh, ne Sosoenën to vatvus suk voh a Soe Vih peß manih pe Abraham. O Puk pe Sosoenën to soe va non manih pan,
“Manih pën, ne Sosoenën se vavih a ma napan kurus.” b
9E Abraham to vaman voh e Sosoenën, ke Sosoenën vavih en peß. Keß teß me va e non manih pa napan varih to teß me ne o vaman manih pe Sosoenën, e Sosoenën se tapui me en pee.
10Ivëhkëk, e Sosoenën se vateen rakah en po teß varih to koman ne pan, a taateß va pa vatet o Vavaasis pe Mosës to antoen e non pa nok raoe, kee tavus ee o teß totoopin manih pa matan e Sosoenën. Suk ataeah, o Puk pe Sosoenën to soe va non manih pan,
“Ta pah teß se keh hikta vavatet vavih non a ma soe kurus varih,
to pet ne manih po Vavaasis pe Mosës,
e Sosoenën se vateen rakah en pa teß pamëh pa hat.
Keß se kon en po kamis.” c
11Ka meh soe me to kiun non manih po Puk pe Sosoenën to soe non pan,
“A napan varih to vaman ne e Sosoenën,
e Sosoenën se pokaß en pee o teß totoopin.
Kee se teß toßtoß tamoaan e ne.” d
Ivëh, ka soe pamëh to vataare rakah e non pea, pa hikta pah teß to antoen non a teß totoopin manih po epep pe Sosoenën, pö neß se vavatet vaviß non o Vavaasis pe Mosës. 12Ivëhkëk, a teß se keh vavatet vaviß non o Vavaasis pe Mosës, eß to hikta han non manih po vaßaus pe Sosoenën. Ivëhpëhkëk eß se posean e non pa nok a tah no o Vavaasis pe Mosës to sosoe non. Ivëh, no o Puk pe Sosoenën to soe suk va non manih pan,
“A teß vëh to vavatet vavih non a ma soe kurus varih po Vavaasis pe Mosës,
o Vavaasis pamëh se matop vavih tamoaan e non pa pop peß.” e
13O Vavaasis pe Mosës to soe va non manih pan, ea kurus rakah varih a napan, ea to hikta vavatet no sih a soe va po Vavaasis pe Mosës. Ivëh, ne Sosoenën se vateen suk a ra pa hat. Ivëhkëk, a teß vëh se voen hah a ra, ivëh e Ieesuß Kristo, eß to kon en pa tasun pea, pa ö ne Sosoenën to vateß en peß pa ma hat pea manih pa kuruse. Suk ataeah, o Puk pe Sosoenën to soe va non manih pan,
“A napan kurus varih to nohtöön ne po naon, ▼
▼“Nohtöön po naon”, Manih po Puk Lo 21:22-23 eß to soe non pan, po poen nee to ip vamët a teß suk a hat neß to nok, a sionineah nee to nohtöön po naon ovin a vapoet eah. E Pöl to sosoe va non manih pan, a kuruse pe Ieesuß to teß va non nën.
ne Sosoenën se vateß en pee pa hat.” g
14E Sosoenën to nok voh o vatompoan vamomoaan peß pen e Abraham, pareß soe ke poan, pan eß se tapui a ma napan kurus varih to teß ne po oeh. Manih pa kiu vëh ne Ieesuß Kristo to nok voh, ne Sosoenën to nok o vatompoan voon peß manih po teß varih to hikta teß ne pan ee ro Jiuß. Ivëh, ke ea kurus varih to vaman no e Ieesuß, ea se kon ee pa Tuvuh Vasioß vamanih pa ö ne Sosoenën to soe vaman vavoh.
A Taateß Pe Sosoenën To Hikta Antoen Non A Veo A Soe Vaman Peß
15Kën kea, kuru nöß to vavaato suk noß a taateß pea ra napan. Ta pah teß se koman non pan, eß se mët en, pareß kiun a soe va pa ö neß se ki vah va in a ma tah peß manih po pus koaß peß. Ivëh, ka soe neß to nok me a meh teß se tavus va en manih po vatompoan neß to nok pen a teß pamëh. Ahikta pah teß to antoen non a vatok pet na ta meh soe manih pa soe vaman ne Sosoenën to heß voh maß. Ahikta meh teß to antoen non a panih a soe vaman pamëh.16Moaan voh ne Sosoenën to nok voh a soe vaman peß to soe non pan, amot no a ma moeh tah vihvih se tavus ee maß. Ka soe vaman pamëh ne Sosoenën to nok voh manih pe Abraham, me e supnaiß peß vëh to meß avoeß e non pa tavus maß. O Puk pe Sosoenën to hikta sosoe suk voh non a kën supnaiß peo peß. Ahik, eß to sosoe varoe suk voh non a paeh a supnaiß ro peß, ivëh, e Ieesuß Kristo. 17Ka pusun in a soe peöß to teß va non manih. Moaan voh ne Sosoenën to nok o vatompoan peß pen Abraham. Ko poen no 430 kirismas to oah, ko Vavaasis pe Mosës pah tavus poß maß. O Vavaasis pamëh to hikta antoen non a vahik o vatompoan vëh ne Sosoenën to nok voh, pareß hikta onöt me non a vahik a soe vaman vëh ne Sosoenën to nok voh. 18Ea se keh vavatet rakah no o Vavaasis ne Mosës to heß voh a ra, marën a ö na se kon a ma tah ne Sosoenën to vaneah voh a ra, a, ea to hikta antoen no a kon koe manih pa taateß va pa soe vaman. Ivëhkëk, ea to nat e no pe Sosoenën to nok voh a soe vaman peß, pan eß se heß koe ka maß ra, a ma tah poë varih manih pe supnaiß pe Abraham vëh, e Ieesuß.
E Sosoenën To Heß Voh A Soe Vaman Peß Manih Pe Abraham, Ivëhkëk, O Vavaasis Peß Neß To Heß Koe Ke Maß Manih Pe Mosës
19Eß se keh teß va non nën, ataeah poß no Vavaasis pe Mosës to teß suk non? Eß to teß va non manih pan, e Sosoenën to iu non a pusun in a taateß hat se tavus vamaaka, ivëh, ko vasuksuk in a ö neß to heß vahik en pa soe vaman peß, e Sosoenën to heß me en po Vavaasis peß. Eß to iu non pan, o Vavaasis peß se teß non ko antoen po poen no e supnaiß pe Abraham se tavus maß. Moaan voh ne Sosoenën to soe vaman voh en pan, eß se heß a ma tah kurus peß manih pe koaß pamëh. E Sosoenën to heß voh a ma Vavaasis peß manih po ankeroß, kee vatvus a ma Vavaasis poë varih manih pa teß vatopnin vëh, e Mosës. Ke Mosës heß pet en pea. 20Ivëhkëk, a teß vatopnin to hikta teß me non ta kiu pa ö no a pah teß ro se keh teß non, ke Sosoenën varoe ko a pah teß to teß non.O Vavaasis Pe Mosës To Teß Va Non Manih Pe Tamaara Se Me A Ra Manuh Pe Kristo
21Eöß se poß soe vahvanih, o Vavaasis ne Sosoenën to heß voh e Mosës antoen kës e non pa vakihat me a soe vaman vëh ne Sosoenën to heß voh e Abraham? Ahik rakah! E Sosoenën to hikta heß voh a ra o Vavaasis pe Mosës, pan eß se heß a ra o toßtoß tamoaan. Me a taateß va pa vatet o Vavaasis pamëh, eß me to hikta antoen non a nok a ra, ka tavus o teß totoopin manih po epep pe Sosoenën. 22Ivëh, no Puk pe Sosoenën to soe suk ka rora pan, a taateß hat to nohnoh voh en pa napan kurus to teß ne manih po oeh vëh, kee hikta onöt ne a vatet vahik a ma soe va po Vavaasis pe Mosës. Ivëh, ne Sosoenën to soe vaman suk voh pan, etereh to vaman ne e Ieesuß Kristo, ee se kon ee pa Tuvuh Vasioß.23Moaan voh, no a taateß vaman to hikta tavus avoeß non maß, ko Vavaasis pe Mosës iu matop kurus e non pea. Ea to teß va no manih po teß nohnoh, keß öök na po poen no a taateß vaman se tavus vamaaka maß, ka vaman a teß vëh se nö maß pa hehe a ra. 24O Vavaasis pe Mosës to teß va non manih pa teß to ut ka rora, pareß vovoh ka rora, keß öök na po poen ne Ieesuß Kristo se nö maß. Ka vaman eah. Ke Sosoenën pokaß en pea a nap totoopin manih pa epep peß.
25Ka kuru vaßih no a taateß vaman e Ieesuß Kristo to tavus vamaaka en manih pea, ka vaman ee peß, para hikta teß hah no manih pa teß vëh to ut voh ka rora sih, ivëh o Vavaasis pe Mosës.
O Vaman Pea To Nok A Ra Ka Tavus O Pus Koaß Pe Sosoenën
26Eöm varih a napan to vaman voh e Ieesuß Kristo, paröm vatös me eah. Eöm to tavus em o pus koaß pe Sosoenën. 27Po poen nee to pupui a neöm manih pe Ieesuß Kristo, eß to teß va non manih pan, eöm to vatös me em peß. Ka vatös peöm ke Kristo, eß to vatoe va e non manih pan, eöm to kon em pa taateß voon pe Kristo vamanih pa teß to ohop o ohop voon peß. 28Ka manih pa napan varih to vaman ne Ieesuß Kristo, a hikta tah to ki vakëh non raoe, kee hikta teß hah ne o Jiuß me o teß varih to hikta teß ne pan ee ro Jiuß. Ee hikta teß hah ne o teß kikiu akuk, me o teß varih to teß vavih ne. Ee me to hikta teß va ne manih po köövo, me ro voe. Ee to vatös me voh e Ieesuß Kristo, pare tavus paeh ee. 29Eöm se keh teß nem manih po kum pe Ieesuß Kristo, eöm to tavus rakah em o pus koaß pe Abraham. Ke eöm rakah kuru o teß poë varih se kon akuk a ma tah ne Sosoenën to soe vaman ke voh e Abraham.
Copyright information for
TPZ