Heb 3 | TPZ | STEP | Ivëh, kën kea vivihan peöß, e Sosoenën to vateß a neöm a ma teß koman peß, ke eöm se nö manuh pa vöön peß vöh kin. Eöm se vavatet nem e Ieesuß vëh ne Sosoenën to va nö maß, keß teß non a Teß Susun po Teß Ësës Heß vëh, na to vaman no ko kë no a ëhnaneah.

aSng 95:7-11

bSng 95:7-8

Hebrews 3

A Tasun Pe Ieesuß to Apuh Oah E Non Pa Teß Tasun Pe Mosës

1 Ivëh, kën kea vivihan peöß, e Sosoenën to vateß a neöm a ma teß koman peß, ke eöm se nö manuh pa vöön peß vöh kin. Eöm se vavatet nem e Ieesuß vëh ne Sosoenën to va nö maß, keß teß non a Teß Susun po Teß Ësës Heß vëh, na to vaman no ko kë no a ëhnaneah. 2 E Ieesuß to vavatet vavih rakah e non po iu pe Sosoenën, vamanih pa ö ne Mosës to nonok vavoh non. E Mosës to nonok voh non a ma tah ne Sosoenën to iu non, pareß matop non a napan va Israël. 3 A teß to eok a iuun to kon o ëhnan apuh, to apuh oah e non pa iuun neß to eok. Eß to vatoe e non pe Ieesuß to kon voh pa tasun to apuh oah e non pa teß tasun pe Mosës. 4 A ma iuun kurus to teß ne, a teß to eok. Ivëhkëk, e Sosoenën to nok voh a ma moeh tah kurus. 5 E Mosës to vavatet voh non o iu pe Sosoenën. Pareß vanënën non a ma tah ne Sosoenën to sosoe non, se tavus amot. Pareß nonok non a kiu manih pa iuun pe Sosoenën. 6 Ivëhkëk, e Kristo, eß e Koaß pe Sosoenën. Eß to teß me non a kiu va pa matop a napan, ka napan to teß va ne manih pa iuun pe Sosoenën. Ea se teß no a napan peß, pa ö na se keh ötöön vakis no o vaman pea manih pe Ieesuß, ko anoeh no eah, keß öök po poen na se mët.

7 Ivëh, ka Tuvuh Vasioß soe pan,

“Po poen nöm to pënton a soe pe Sosoenën,
8 paröm nat nem teß va nem manih po teß vatösoe,
vamanih pa ö nöm to pënton varo vavoh nem e Sosoenën,
vamanih pa ma sipuineöm to teß voh ne pa moeh upin, ko pupunöß a ne neoß.”
9 E Sosoenën to soe koe manih pa Tuvuh Vasioß pan,

“A kën sipuineöm to pupunöß voh a ne neoß.
Ivëhpëhkëk, ee to ep voh e ne pa ma tah nöß to nonok noß po 40 kirismas.
10 Eß a pusun in a tah, nöß to heve suk voh noß raoe,
suk a ma kokoman pee to teß ke voh e ne.
Kee vatösoe e ne pa ma soe peöß.
11 Eöß to vovoh paröß soepip vakis rakah eoß pee pan,
‘Eöm se nat nem nö pa vanot manih pa muhin va Keenan vëh, nöß se heß a neöm.’” ^a
12 Kën kea peöß, eöm se matop nem po kokoman hat peöm. Eöm to vanun o vaman peöm, paröm këh ke e Ieesuß, e Sosoenën toßtoß tamoaan. 13 Eöß to hikta iu noß ta paeh va peöm se vatösoe non, ka taateß hat vanun a neöm, köm taum a punis. Ivëhkëk, a ma poen kurus nöm se teß nem, eöm se vavaßaus hah a nem pa vaman a soe pe Sosoenën. 14 O poen na to taneo vaman e Ieesuß ko vatet eah, para vaman no eah, eß se vaßaus en pea. Ivëh, ka se keh vaman vakis avoeß rakah e no peß, ea se vatös me eah pa ma tah koman peß, po poen neß se hah maß.

15 Ivaßih a tah no Puk Vapenpen to soe suk voh non,

“Kuru eöm se tënan a soe pe Sosoenën,
paröm koe a vatösoe vamanih pa ö no a kën sipuineöm to pënton varo vavoh ne e Sosoenën.” ^b
16 A napan varih ne Mosës to me tavus këh voh maß raoe a muhin va Isip, to heß tonun voh e Sosoenën, pa ö nee to pënton varo a soe peß. 17 A napan poë varih ne Sosoenën to heve voh non raoe po 40 kirismas. Eß to heve voh non o teß varih to nonok hat voh ne, pare mëtmët ee manih pa koman a moeh upin. 18 Ke Sosoenën soe vakis hah va en manih pan, “Ee voh ivarih a napan to pënton varo voh a soe peöß. Ee hikta se tavus ne manih po oeh vëh, nöß se heß raoe, kee kon a vanot.” 19 Ivëh, ka nat ee pee to hikta vaman vakis voh ne e Sosoenën, to tavus manuh pa ö neß se heß raoe, kee kon a vanot.