James 5
Eöm A Nap Öt Ö Se Matop Nem
1Pënton öm, eöm a nap öt ö vörep! Eöm se ook, paröm tamak suntan, suk a ma punis se nö maß manih peöm. 2A ma moeh tah peo vörep peöm se koaß vahik ee, ko kökörös ëën vahik ee pa ma ohop peöm. 3A ma moeh gol, me silvaß peöm se ratoß ee. Ko ratoß pamëh se vataare en peöm to nok voh em pa hat. Eß se ëën va in a ma sionineöm manih po suraß. Eöm to ununun voh em pa ma moeh takoek vihvih peöm, keß öök non kuru ko vatët non po Poen hah pe Sunön. 4Pënton vavih öm! O voen ne eöm to hikta heß voh a nap kiu varih to rëp karas manih po tökiu peöm, ee to okook ke ne pe Sosoenën pan, eß se piun a ma taateß hat peöm. Ke Sunön A Kikis Vi to pënton en pa ook pa nap kiu. 5A ma poen kurus nöm to teß nem manih po oeh, eöm to öt vörep voh nem a ma moeh tah vihvih, paröm vaeö ko iu voh nem a ma tah kurus poë varih. Eöm to teß voh nem pa ëën vörep, ka ma komëneöm ponot vamanih pa vönaß, nee to vamatop e ne pa ip vamët. 6Eöm to vahoß voh em pa nap totoopin po vahutët, ko vateen em pee pa hat, paröm ip vamët raoe to hikta teß me ne ta hat. Kee hikta onöt ne a vapus me a neöm.Ea Se Teß Me No A Taateß Anoeh
7Kën kea me kën vamen, eöm se teß me nem a taateß anoeh, keß öök po Poen ne Sunön se hah maß. Eöm to nat e nem, a teß to teß non a rak to anoeh non sih a ma taëën vih, peß se pu taneß po oeh. Eß to teß vaes rakah non sih ko anoeh non a uhön me a potan se vapu a taëën, keß voaß a ma voaß vih. 8Ke eöm me se teß vaes nem, ko anoeh nem. Ko teß a ma punis to tavus manih peöm. Suk o Poen hah pe Sunön to öök vatët en.9Kën kea me a kën vamen, eöm se koe a varek suk a ma meh upöm peöm, me a vöhioß tonun raoe. E Sosoenën tomeß tavus vamanih pa Teß kiiki vahutët, pareß kiiki a neöm, ko vateen a neöm pa hat. Ka Teß kiiki vahutët pamëh to vamatop e non pa nö maß! 10Kën kea me vamen, eöm se vavatet nem o vavaasis po teß vanënën soe varih, to vavaasis suk voh ne e Apuh. Ee to kon kamis voh pa ma tah, ivëhkëk, ee to teß vaes voh e ne, pare anoeh ne. 11Ea to sosoe no pan, ee to teß vaeö e ne, suk ee to hikta koe rom voh. Eöm to pënton voh em pe Job to teß me voh non a taateß anoeh. Paröm nat e nem, po vasuksuk ne Apuh to nok voh a taateß vih manih peß. Ea to nat e no, e Sunön to puh rakah non po ururuan, me a taateß kamöß.
Matop Nem Pa Ma Tah Nöm To Sosoe Nem
12Kën kea me a kën vamen, a tah apuh oah ivëh, eöm se nat nem nonok nem a soe kikis, vamanih pa ö neöm to iu soe nem oman. Koe a pokaß o ëhnan va pa vöön va kin, keß, o ëhnan vëh o oeh, keß, a meh tah pa vakikis a soe nöm to soe. Ka tëëm nöm to iu soe nem “oman”, eöm se soe varoe kuru, “oman”, pö neß se keh teß non “oman”. Keß, “ahik”, pö neß se keh teß non “ahik”. Ivëh, ke eöm hikta se teen nem ta hat, po poen ne Sosoenën se kiiki a neöm.O Kikis Va Pa Taateß Hin
13Eteh to teß me non a ma punis, eß se hinhin non. Keteh to haraß vaeö non, eß se vaëhëh, ko kë a ëhnan e Sunön. 14Keteh to haraß non a moeh, eß se vaoe a nap susunön va po rotuß. Kee se hin suk poë, pare hë o vanom manih pa teß pamëh pa ëhnan e Apuh. 15Ko hin vëh nee to hin me o vaman se vavih a teß vëh to haraß non a moeh. E Apuh se vatoß en pa teß pamëh. Keß se keh teß me non ta hat, e Sosoenën se ihan anoe en pa hat peß. 16Eöm se vatvus vapiun a ma hat peöm, paröm teß me nem a taateß hin vapiun, marën e Sosoenën se vatoß a neöm. A teß va po vaman se keh hin, a ma tah apaßpuh rakah se tanok. 17E Elaëjaß voh a teß to teß va e non manih pea. Eß to hinhin suk voh non a uhön se nat non nus, ka uhön hikta nus voh manih po oeh po kukön kirismas me a tönim sivö me a paeh. 18Ke Elaëjaß hin hah, ka uhön nus maß, ko vömru o oeh, keß vapu vavih hah en pa ma moeh tah.A Taateß Va Pa Vaßaus Hah A Teß To Nö Vapiun
19Kën kea me a kën vameneoß, ta paeh va peöm se keh nö varo këh a soe man, ka meh kea vaßaus a teß pamëh, keß hah maß, 20eöm se nat vakis nem a tah vaßih. Eteh to me hah maß a teß nonok hat këh a taateß hat, eß to kon hah en pa apen a teß nonok hat pamëh, keß këh en maß pa mët. Ivëh, ke Sosoenën se ihan anoe en pa ma hat peo rakah.
Copyright information for
TPZ