Rev 16 | TPZ | STEP | Eöß to pënton o vaato apuh to taneß maß pa teß to teß non pa Iuun Hinhin Apuh pe Sosoenën vöh pa vöön va kin, to nö non pa tönim me a poa ankeroß to soe non pan, “Eöm se nö paröm koßkoß a tönim me a poa toep varih to teß ne o vakmis pe Sosoenën kee takoß kunah manuh po oeh!”

Revelation of John 16

A Tönim Me A Poa Toep Gol To Teß Ne O Vakmis Pe Sosoenën

1 Eöß to pënton o vaato apuh to taneß maß pa teß to teß non pa Iuun Hinhin Apuh pe Sosoenën vöh pa vöön va kin, to nö non pa tönim me a poa ankeroß to soe non pan, “Eöm se nö paröm koßkoß a tönim me a poa toep varih to teß ne o vakmis pe Sosoenën kee takoß kunah manuh po oeh!”

2 Ka ankeroß vamomoaan nö, pareß koep kunah en pa toep peß manuh tonun o oeh. Ka ma vu piß kamis, me a ma teß ro ep vahat rakah tavus manih pa napan varih to teß me ne o vëknöm va pa tah poa, me manih pa napan to vasunön ne a tah nößnës peß.

3 Ka vapöök ankeroß koep en pa toep peß manih tahiß. Ka tahiß ereraß en, vamanih po eraß va pa teß ip, ka ma tah toßtoß kurus varih tahiß mët vahik ee.

4 Ka vakön ankeroß koep en pa toep peß manih pa ma ruen apaßpuh, me pa ma teß a sosoneß. Ka ma ruen tavus ereraß kurus rakah ee. 5 Keöß pënton a ankeroß vëh to matop non a ma ruen to soe ke na e Sosoenën pan,

“Eën a vivihan rakah, ka kiiki pën to totoopin,
parën teß e nom kuru, me eën to teß moaan voh e nom.
6 A napan varih to ip vamët voh a ma teß vanënën soe pën, me a ma meh napan pën, ko eraß pee to takoß voh.
Ivëh, kën se heß o eraß manih pa ma napan hat poë varih, kee se kaak o eraß vëh ^{▼▼[... kee se kaak o eraß vëh ...] A soe pamëh, eß a soe vapipinoß pa ö ne Sosoenën se vakmis rakah a ma napan hat.} to piun non a taateß hat nee to nok voh.”
7 Keöß tënan o vaato to taneß maß pa pok, to soe maß pan,

“Oman rakah, Apuh, eën E Sosoenën A Kikis Vi.
Eën to kiiki nom sih a ma napan, ka kiiki pën to totoopin, pareß vih vörep.”
8 Ka vataanaß ankeroß koßkoß en pa toep peß manih pa potan, ke Sosoenën vaonöt ko hivaß va pa potan ës en pa ma napan. 9 O hivaß apuh va pa potan to ororan vörep, ko ës en pa ma napan. Ka napan soe vavahat, ko vavovoeak avoeß e ne pe Sosoenën to teß me non o kikis, marën a nok a ma ta hat poë varih. Ivëhkëk, a napan to hikta panih a ma taateß hat pee, pare kë a ëhnan e Sosoenën.

10 Ka vatönim ankeroß nö ko koep en pa toep peß manuh pa ö ihihoß pa tah poa. Ka popoen kopös en pa napan varih to vavatet ne a tah poa. Ka napan poë varih kon vahat ko kokot e ne pa ma riurivoeere, suk o kamis to apuh rakah. 11 Ee to kokoman ne o kamis me a ma piß pee, pare sosoe vavahat e ne pe Sosoenën vöh pa vöön va kin. Ivëhkëk, ee to hikta panih a ma taateß hat pee.

12 Ka vatönim me a paeh ankeroß koep en pa toep peß manuh pa ruen apuh Iupretis. Ka ruen anaß rakah en to vamatop non a hanan no a nap susunön to taneß maß pa ö no a potan to pepeah ke no maß, se koe maß. 13 Keöß ep in a kukön tuvuh hat to ep va ne manih, po rökrök to tavus taneß maß pa rivon a kuruß apuh, me manih pa rivon a tah poa, me manih pa rivon a teß vanënën soe pikpiuk. 14 A ma tuvuh hat poë varih to nonok ne sih a ma vu tah vatoksean. Ee to nö manuh pa nap susunön kurus varih to teß ne po oeh, ee to iu ne pan, o teß susunön se ununun a nap vëvënsun pee, kee se vapus po poen apuh pe Sosoenën A Kikis Vi, pa ö neß se kiiki non a ma napan.

15

“Pënton öm! Eöß e Ieesuß se nö nös vamanih pa teß kakaveo, köm se hikta nat nem po poen poanheh nöß se nö maß manih peöm. Vaeö rakah, pa teß vëh to opoep non, pareß rara non o rara peß, ko hikta nönö pehpeah vah non matëëra ma napan!”

16 Ka ma tuvuh hat poë varih ununun ee, pa nap susunön manih pa ö oeh vëh nee to popokaß ne po to Hibru pan, Armagedon.

17 Ka vatönim me a vapöök ankeroß koep en pa toep peß manih akis pa tuvuh. Ko vaato apuh taneß maß manuh pa Iuun Hinhin Apuh pa ö vasioß ihihoß pe Sosoenën, to soe no maß pan, “Eß to hik en!” 18 Ka muhin vakës ka kara kon en, ko vatoeßnën, me a rikrik apuh to ip en maß. Moaan voh a hikta rikrik to tavus voh to teß va non manih, taneo no maß po poen ne Sosoenën to nok voh o oeh vëh. A teß rikrik pamëh to apuh ko parin a hat oah rakah. 19 Ka vöön apuh vëh a Babiron takök en po kukön hum, ka ma meh vöön apuh pa ma meh napan to takök ko hat rakah ee. Ke Sosoenën kokoman avoeß e non pa taateß hat no a napan varih pa vöön vëh nee to popokaß ne Babiron Apuh to nok voh, ivëh, keß vakaak en pa Babiron po voaën peß. O voaën pamëh, eß o vakmis pe Sosoenën. 20 A rikrik apuh pamëh to ip, ka ma to, me a ma tope hik kurus ee. 21 Ka ruiß tutuvuh eh to antoen non o 50 kilogram to taru taneß maß akis ko oon en pa napan. Ivëhkëk, a napan to hikta panih a ma taateß hat pee. Ee to vavovoeak ko sosoe vavahat avoeß e ne pe Sosoenën, suk a ruiß tutuvuh eh vëh to taneß maß akis ko oon raoe.