Rev 17 | TPZ | STEP | Ka paeh va pa tönim me a poa ankeroß to öt non a toep, nö maß peöß ko soe pan, “Nö mah! Köß vataare a oah a ö ne Sosoenën se vakmis vah va in e köövo apuh rëhrëh vëh. E köövo rëhrëh vëh to vëknöm non a vöön apuh to eok non sinten a ma ruen peo.

Revelation of John 17

A Köövo Apuh Rëhrëh

1 Ka paeh va pa tönim me a poa ankeroß to öt non a toep, nö maß peöß ko soe pan, “Nö mah! Köß vataare a oah a ö ne Sosoenën se vakmis vah va in e köövo apuh rëhrëh vëh. E köövo rëhrëh vëh to vëknöm non a vöön apuh to eok non sinten a ma ruen peo. 2 A ma teß susunön varih po oeh to nok voh a ma taateß teßteßvaasiß ^{▼▼A taateß teßteßvaasiß to vëknöm non a ma teß sunön to këh ee pe Apuh e Sosoenën, pare vasunön ne a ma sosoenën vapikpiuk.} vaßpeh me e köövo pamëh. A ma napan pet varih po oeh to nonok vavoh e ne nën. Ee teß va ne manih pee to kaak vörep o voaën ko kokoman pee nun.”

3 A Tuvuh Vasioß to puh non manih peöß, ko me en peöß manuh pa moeh upin. Manih pa ö pamëh, eöß to ep in a köövo to ihoß non pa tah poa ereraß to teß me non a ma moeh kiun peo to sosoe vavahat non e Sosoenën, to kiun non manih pa sionin a tah poa. Eß to teß me non a tönim me a pöök pasun me a havun köm. 4 Eöß to ep in e köövo to ohop non o pöök vu ohop ereraß, pareß ohop non a ma vu vatëk nee to nok pa gol, me a ma mök ep vavih nee to nok voh pa vös voen vapeah. Pareß öt non a kap gol, ka manih koman a kap a ma vu taateß hat, me taateß rëhrëh pe köövo pamëh, ee kurus to puh ne pa kap. E Sosoenën to hikta iu rakah non a ma taateß poë varih. 5 Manih pa nain e köövo to kiun non o ëhnan to teß non a soe vapipinoß. O ëhnan pamëh to soe va non manih pan,

“Vöön Apuh Babiron Eß To Vasinan Non A Ma Moeh Köövo Rëhrëh Me A Ma Vu Taateß Hat Kurus Rakah Varih Po Oeh.”

6 E köövo pamëh to ip vamët voh a napan pe Sosoenën, me a napan varih to vaman ne e Ieesuß, ko vavatvus voh ne a soe peß. E köövo pamëh to kaak voh o eraß pee ko kokoman peß nun. Eöß to ep in a tah pamëh, ko toksean ko pah kokoman vörep e noß.

7 Ka ankeroß soe ka neöß pan, “Suk ataeah, kën toksean vörep nom? Eöß se soe ka oah a pusun in a soe vakokoaan pe köövo vëh. Me a pusun in a soe vakokoaan pa tah poa vëh to teß me non o tönim me a pöök pasun, me a havun köm, ko teßteß vah non e köövo. 8 A tah poa vëh nën to ep moaan voh nom, eß voh a toßtoß, ka kuru vëh, eß to hikta teß non. Ivëhkëk, amot eß se tavus këh en maß pa koveß ruruvun hikto noton, ko peah en maß ko ro en. ^{▼▼A tah poa se ro, suk a Soneß Sipsip se miröß en peß, keß ro avoes en.} A napan to teß ne manih po oeh ne Sosoenën to hikta kiun voh a ëhnëëre po puk va po toßtoß tamoaan po poen neß to nok voh o oeh. A napan poë varih se pah töhkak ee pa ö nee se ep a tah poa pamëh. Suk ataeah moaan voh, eß to teß non, ka kuru eß hikta teß non, ivëhkëk, eß se tavus hah en ka napan se ep e peß.

9 “A napan to teß me ne o kokoman vih maaka, ee se nat rakah ee pa tah vëh. O tönim me o pöök pasun, eß to vëknöm non a tönim me a poa tope vëh ne köövo to ihoß non. 10 Ka tönim me a poa pasun, eß to vëknöm non a tönim me a pöök teß sunön. A tönim teß sunön to ro voh ee, ka vatönim me a paeh teß ivëh to teß non kuru, ka vatönim me a pöök se tavus en maß. Ivëhkëk, o poen neß se tavus, a matop peß hikta se teß varë non. 11 Ka tah poa vëh nën to ep moaan voh nom, eß voh a toßtoß, ka kuru vëh eß to hikta teß non, eß a vatönim me a kukön teß sunön. Eß me to teß hop non pa tönim me a poa teß sunön, eß me se ro pet en.

12 Ka havun köm varih nën to ep voh to vëknöm non o havun teß sunön, ee to hikta tavus teß sunön avoeß ne. Ee se kon kikis, pare tavus o teß sunön vaßpeh me a tah poa, ivëhkëk, a matop pee to kökööt rakah. 13 O havun teß sunön poë varih se vapöh kokoman ee, ko heß o kikis me a tasun manih pa tah poa. 14 Ee se vapus me a Soneß Sipsip, ka Soneß Sipsip onoah raoe. A Soneß Sipsip to vateß a ma teß koman peß, a ma teß poë varih to pënton a Soe Vih, me ee to vaman ko vatet ne a soe man peß. Ee kurus a napan poë varih se onoah po vapus. Suk ataeah, eß e Sunön va pa ma vu susunön, me eß e Topoan va pa ma teß totopoan kurus varih po oeh.”

15 Ka ankeroß pamëh soe ka neöß pan, “Eën to ep eom pe köövo rëhrëh vëh to vëknöm non a vöön apuh to eok non sinten a ma ruen. A ma ruen varih to vëknöm ne a ma napan, me a ma vu to, me a ma vuteß kurus, me a napan kurus varih po oeh. 16 Ka havun köm, me a tah poa vëh nën to ep voh, ee se vakihat me ne e köövo rëhrëh. Ee se ihan këh poë a ma ohop peß, keß pehpeah en, pare ëën a sionineah, pare ës poë po suraß. 17 E Sosoenën to heß voh o teß sunön o kokoman marën a nok a tah vaßih, keß tavus vamanih pa ö neß to soe moaan vavoh. Ee se vapöh kokoman ko heß a tasun pee manuh pa tah poa. Ee se nonok va ne nën, keß öök pa ö ne Sosoenën to soe a ö seß öök. 18 Ke köövo vëh nën to ep voh nom, eß to vëknöm non a vöön apuh to matop non a ma teß sunön varih po oeh avoes.”