1Ch 15 | TpiKJPB | STEP | ¶ Na Devit i wokim ol haus bilong em insait long biktaun bilong Devit, na redim wanpela ples bilong bokis kontrak bilong God, na sanapim wanpela haus sel bilong en.

1 Chronicles 15

1 ¶ Na Devit i wokim ol haus bilong em insait long biktaun bilong Devit, na redim wanpela ples bilong bokis kontrak bilong God, na sanapim wanpela haus sel bilong en. 2 Nau Devit i tok, I no gat wanpela i ken karim bokis kontrak bilong God, ol lain Livai tasol. Long wanem, BIKPELA i bin makim ol long karim bokis kontrak bilong God, na long wokim wok long Em oltaim oltaim. 3 Na Devit i bungim olgeta Isrel wantaim long Jerusalem, bilong bringim bokis kontrak bilong BIKPELA i kam antap i go long ples bilong em, dispela em i bin redim bilong en. 4 Na Devit i bungim ol pikinini bilong Eron, na ol lain Livai. 5 Bilong ol pikinini man bilong Kohat, Uriel nambawan, na ol brata bilong em 120. 6 Bilong ol pikinini man bilong Merari, Asea nambawan, na ol brata bilong em 220. 7 Bilong ol pikinini man bilong Gersom, Joel nambawan, na ol brata bilong em 130. 8 Bilong ol pikinini man bilong Elisafan, Semea nambawan, na ol brata bilong em 200. 9 Bilong ol pikinini man bilong Hibron, Eliel nambawan, na ol brata bilong em 80. 10 Bilong ol pikinini man bilong Usiel, Aminadap nambawan, na ol brata bilong em 112. 11 Na Devit i singautim long ol pris Sedok na Abaiatar, na long ol lain Livai, long Uriel, Asea, na Joel, Semea, na Eliel, na Aminadap, 12 Na tokim ol, Yupela stap ol nambawan bilong ol tumbuna papa bilong ol lain Livai. Mekim yupela yet i kamap holi, yupela na ol brata bilong yupela wantaim, inap long yupela i ken bringim bokis kontrak bilong God BIKPELA bilong Isrel i kam antap i go long dispela ples mi bin redim bilong en. 13 Long wanem, bikos yupela i no mekim dispela long pastaim, BIKPELA, God bilong yumi, i wokim wanpela bruk antap long yumi, long dispela, yumi no painim Em i bihainim rot stret bilong en. 14 Olsem na ol pris na ol lain Livai i mekim ol yet i kamap holi long bringim bokis kontrak bilong God BIKPELA bilong Isrel i kam antap. 15 Na ol pikinini bilong ol lain Livai i karim bokis kontrak bilong God antap long ol sol bilong han bilong ol wantaim ol stik bilong en, olsem Moses i tok strong long ol, bilong bihainim tok bilong BIKPELA. 16 Na Devit i toktok long ol nambawan bilong ol lain Livai bilong makim ol brata bilong ol long stap ol man bilong singim song wantaim ol samting bilong wokim musik, ol kain gita, na ol harp na ol simbol, long wokim nois, taim ol i litimapim nek wantaim amamas tru. 17 Olsem na ol lain Livai i makim Heman, pikinini man bilong Joel, na bilong ol brata bilong em Esap, pikinini man bilong Berikaia, na bilong ol pikinini man bilong ol brata bilong ol Merari Etan, pikinini man bilong Kusea, 18 Na wantaim ol brata bilong ol bilong nambatu lain, Sekaraia, Ben, na Jeasiel, na Semiramot, na Jehiel, na Uni, Eliap, na Benea, na Measeaia, na Matitaia, na Elifele, na Mikneaia, na Obet-idom, na Jeiel, ol wasman bilong dua. 19 Olsem na ol man bilong singim song, Heman, Esap, na Etan, ol i makim bilong wokim nois wantaim ol simbol bilong bras, 20 Na Sekaraia, na Asiel, na Semiramot, na Jehiel, na Uni, na Eliap, na Measeaia, na Benea, wantaim ol kain gita antap long Alamot, 21 Na Matitaia, na Elifele, na Mikneaia, na Obet-idom, na Jeiel, na Asasaia, wantaim ol harp antap long Seminit bilong kamap gutpela olgeta. 22 Na Kenanaia, nambawan bilong ol lain Livai, em i bilong song. Em i skulim ol man long sait bilong song, bilong wanem, em i pulap long save long wokim. 23 Na Berikaia na Elkana em ol wasman bilong dua bilong bokis kontrak. 24 Na Sebanaia, na Jehosafat, na Netanel, na Amasai, na Sekaraia, na Benea, na Eleasar, ol pris, i bin winim wantaim ol biugel long ai bilong bokis kontrak bilong God. Na Obet-idom na Jehaia em ol wasman bilong dua bilong bokis kontrak. 25 ¶ Olsem na Devit, na ol lapun hetman bilong Isrel, na ol kepten i bosim ol tausen, i go bilong bringim bokis bilong kontrak bilong BIKPELA i kam antap ausait long haus bilong Obet-idom wantaim amamas tru. 26 Na em i kamap olsem, taim God i helpim ol lain Livai husat i karim bokis bilong kontrak bilong BIKPELA, long ol i ofaim sevenpela bulmakau man na sevenpela meme man. 27 Na Devit em i werim wanpela longpela saket bilong laplap i naispela tru, na olgeta lain Livai husat i karim bokis kontrak, na ol man bilong singim song, na Kenanaia, bosman bilong song wantaim ol man bilong singim song. Devit tu i gat antap long em wanpela ifat bilong naispela laplap. 28 Olsem tasol olgeta Isrel i bringim bokis bilong kontrak bilong BIKPELA i kam antap wantaim singaut, na wantaim nois bilong kornet, na wantaim ol biugel, na wantaim ol simbol, na wokim wanpela nois wantaim ol kain gita na ol harp. 29 Na em i kamap olsem, taim bokis bilong kontrak bilong BIKPELA i kam insait long biktaun bilong Devit, long Mikal, pikinini meri bilong Sol, i lukluk i go ausait long wanpela windo na lukim king Devit i danis na pilai. Na insait long bel bilong em, em i tingim em olsem em i samting nating.