2Ch 10 | TpiKJPB | STEP | ¶ Na Reaboam i go long Sekem. Long wanem, long Sekem olgeta Isrel i kam bilong mekim em i king.

2 Chronicles 10

1 ¶ Na Reaboam i go long Sekem. Long wanem, long Sekem olgeta Isrel i kam bilong mekim em i king. 2 Na em i kamap olsem, taim Jeroboam, pikinini man bilong Nibat, husat i stap long Isip, we em i bin ranawe long pes bilong king Solomon, i harim dispela, long Jeroboam i kam bek ausait long Isip. 3 Na ol i salim tok na singautim em. Olsem na Jeroboam na olgeta Isrel i kam na toktok long Reaboam, i spik, 4 Papa bilong yu i mekim yok bilong mipela i strongpela. Olsem na nau yu slekim liklik dispela strongpela wokboi pasin bilong papa bilong yu, na yok bilong em i hevi tru, dispela em i putim antap long mipela, na mipela bai bihainim yu. 5 Na em i tokim ol, Kam gen long mi bihain long tripela de. Na ol manmeri i lusim dispela hap. 6 Na king Reaboam i kisim tok helpim long ol lapun man husat i bin sanap long ai bilong Solomon, papa bilong em, taim em i stap laip yet, i spik, Yupela givim mi wanem tok helpim bilong bekim tok gen long dispela lain manmeri? 7 Na ol i tokim em, i spik, Sapos yu mekim gutpela long dispela lain manmeri, na amamasim ol, na toktok wantaim ol gutpela toktok long ol, ol bai stap ol wokboi bilong yu oltaim oltaim. 8 Tasol em i givim baksait long dispela tok helpim ol lapun man i givim em, na kisim tok helpim long ol yangpela man husat i ol i lukautim inap long ol i bikpela wantaim em, husat i sanap long ai bilong em. 9 Na em i tokim ol, Yupela givim wanem tingting inap long yumi ken bekim tok gen long dispela lain manmeri, husat i bin toktok long mi, i spik, Slekim liklik dispela yok papa bilong yu i bin putim antap long mipela? 10 Na ol yangpela man husat ol i lukautim inap long ol i bikpela wantaim em i tokim em, i spik, Yu bai bekim tok olsem long ol manmeri husat i tokim yu, i spik, Papa bilong yu i mekim yok bilong mipela hevi tru, tasol yu mas mekim dispela long lusim hevi liklik long helpim mipela. Yu bai tokim ol olsem, Liklik pinga bilong mi bai stap patpela moa long namel bilong bel bilong papa bilong mi. 11 Long wanem, we papa bilong mi i putim wanpela yok i hevi olsem antap long yupela, mi bai putim moa long yok bilong yupela. Papa bilong mi i stikim yupela wantaim ol wip, tasol mi bai stikim yupela wantaim ol skopien. 12 ¶ Olsem na Jeroboam na olgeta lain manmeri i kam long Reaboam long namba tri de, olsem king i tok strong, i spik, Kam gen long mi long namba tri de. 13 Na king i bekim tok long ol hatpela. Na king Reaboam i givim baksait long tok helpim ol lapun man i givim, 14 Na bekim tok long ol i bihainim tingting bilong ol yangpela man, i spik, Papa bilong mi i mekim yok bilong yupela i hevi, tasol mi bai skruim moa long en. Papa bilong mi i stikim yupela wantaim ol wip, tasol mi bai stikim yupela wantaim ol skopien. 15 Olsem na king i no harim long ol manmeri. Long wanem, as bilong dispela i kam long God, inap long BIKPELA i ken inapim tok bilong Em, dispela Em i toktok long han bilong man Sailo Ahaisa long Jeroboam, pikinini man bilong Nibat. 16 Na taim olgeta Isrel i luksave long king i no gat laik long harim long ol, ol manmeri i bekim tok long king, i spik, Mipela i gat wanem hap skel insait long Devit? Na mipela i no gat samting papa i givim pikinini insait long pikinini man bilong Devit. Olgeta wan wan man go long ol haus sel bilong yupela, O Isrel. Na nau, Devit, lukluk long hauslain bilong yu yet. Olsem na olgeta Isrel i go long ol haus sel bilong ol. 17 Tasol long sait bilong ol pikinini bilong Isrel husat i stap long ol biktaun bilong Juda, Reaboam i bosim kingdom antap long ol. 18 Nau king Reaboam i salim Hadoram husat i bosim ol takis mani, na ol pikinini bilong Isrel i tromoi ston long em, inap long em i dai pinis. Tasol king Reaboam i go hariap long kisim em yet i go antap long karis bilong em, long ranawe i go long Jerusalem. 19 Na Isrel i bikhet i birua long hauslain bilong Devit i go inap long tude.