Est 6 | TpiKJPB | STEP | ¶ Long dispela nait king i no inap long slip, na em i tok strong long bringim ol buk bilong tokaut bilong ol stori. Na ol i ritim ol long ai bilong king.

Esther 6

1 ¶ Long dispela nait king i no inap long slip, na em i tok strong long bringim ol buk bilong tokaut bilong ol stori. Na ol i ritim ol long ai bilong king. 2 Na ol i lukim long rait bilong en, long Mordekai i bin tokaut long tingting bilong Biktana na Teres, tupela bilong ol man bilong king i bosim ol rum, ol wasman bilong dua, husat i painim rot bilong putim han long king Ahasuerus. 3 Na king i tok, Wanem ona na bikpela namba yumi bin mekim long Mordekai bilong bekim dispela? Nau ol wokboi bilong king husat i wokim wok long em, i tokim em I no gat wanpela samting yumi bin mekim bilong bekim em. 4 ¶ Na king i tok, Husat i stap long ples op? Nau Haman i kam pinis insait long ples op ausait bilong haus bilong king, bilong toktok long king long hangamapim Mordekai long dispela ples bilong hangamapim man em i bin redim bilong em. 5 Na ol wokboi bilong king i tokim em, Lukim, Haman i sanap long ples op. Na king i tok, Larim em i kam insait. 6 Olsem na Haman i kam insait. Na king i tokim em, Yumi bai mekim wanem long man husat king i gat gutpela amamas long givim ona long em? Nau Haman i tingting insait long bel bilong em, King i ken gat gutpela amamas long givim ona long husat moa long mi yet? 7 Na Haman i bekim tok long king, Long man husat king i gat gutpela amamas long givim ona, 8 Larim ol i bringim ol naispela klos bilong king, dispela king i werim bipo, na dispela hos king i save ran antap long en, na dispela hat king i sindaun antap long het bilong em. 9 Na larim ol givim dispela naispela klos na hos long han bilong wanpela nambawan hetman bilong king i gat biknem moa, inap long em i ken putim klos olgeta long man husat king i gat gutpela amamas long givim ona, na bringim em antap long baksait bilong hos namel long ol rot bilong biktaun, na go pas long em na autim toksave, Olsem tasol bai em i kamap long man husat king i gat gutpela amamas long givim ona long em. 10 Nau king i tokim Haman, Go hariap, na kisim dispela naispela klos na dispela hos, olsem yu bin tok, na mekim olsem, yes, long Ju Mordekai, husat i save sindaun long dua bilong banis bilong king. No ken larim wanpela samting i fel long olgeta samting yu bin toktok. 11 Nau Haman i kisim dispela naispela klos na dispela hos, na putim klos long Mordekai, na bringim em antap long baksait bilong hos i go namel long rot bilong biktaun. Na em i go pas long em na autim toksave, Olsem tasol bai kamap long man husat king i gat gutpela amamas long givim ona long em. 12 ¶ Na Mordekai i kam gen long dua bilong banis bilong king. Tasol Haman i hariap i go long haus bilong em wantaim bel i soim sori, na taim em i karamapim het bilong em. 13 Na Haman i tokim Seres, meri bilong em, na olgeta wantok bilong em long olgeta wan wan samting i bin pundaun long em. Nau ol saveman bilong em na Seres, meri bilong em, i tokim em, Sapos Mordekai i stap bilong tumbuna pikinini bilong ol Ju, long ai bilong husat yu bin stat long pundaun, yu bai i no inap winim em, tasol tru tumas, yu bai pundaun long ai bilong em. 14 Na taim ol i toktok yet wantaim em, ol man bilong king bilong bosim ol rum i kam, na wok hariap long bringim Haman i go long dispela bikpela kaikai Esta i bin redim.