Eze 9 | TpiKJPB | STEP | ¶ Em i singaut tu long tupela ia bilong mi wantaim wanpela bikpela nek, i spik, Mekim ol lain husat i gat wok long bosim biktaun long wok long kam klostu, yes, olgeta wan wan man wantaim samting bilong em bilong pait na bagarapim olgeta samting i stap long han bilong em.

Ezekiel 9

1 ¶ Em i singaut tu long tupela ia bilong mi wantaim wanpela bikpela nek, i spik, Mekim ol lain husat i gat wok long bosim biktaun long wok long kam klostu, yes, olgeta wan wan man wantaim samting bilong em bilong pait na bagarapim olgeta samting i stap long han bilong em. 2 Na, lukim, sikispela man i kam long rot bilong dua bilong banis i antap moa, dispela i stap i go long hap not, na olgeta wan wan man i gat wanpela samting bilong pait bilong bikpela kilim i dai long han bilong em. Na wanpela man namel long ol i werim klos bilong naispela laplap, wantaim wanpela kom bilong holim ing bilong ol man bilong rait klostu long sait bilong em. Na ol i go insait, na sanap klostu long alta bras. 3 Na glori bilong God bilong Isrel i go antap na lusim serup, we Em i stap antap long en, i go long as bilong dua bilong haus. Na Em i singaut long man i werim klos bilong naispela laplap, husat i gat kom bilong holim ing bilong ol man bilong rait klostu long sait bilong em. 4 Na BIKPELA i tokim em, Go long namel bilong biktaun, long namel bilong Jerusalem, na putim wanpela mak antap long ol poret bilong ol man husat i lusim win bilong soim wari na husat i krai long tingim olgeta dispela sting pasin ol man i mekim long namel bilong en. 5 ¶ Na long ol arapela Em i toktok inap long mi ken harim, Yupela go bihainim em namel long biktaun, na paitim. Yupela i no ken larim ai bilong yupela i soim sori, na tu yupela i no ken i gat pasin sori. 6 Kilim i dai olgeta ol lapun na ol yangpela, ol yangpela meri, na ol liklik pikinini, na ol meri wantaim. Tasol yupela i no ken kam klostu long wanpela man husat dispela mak i stap antap long en. Na stat long rum holi bilong Mi. Nau ol i stat long ol lapun man tru husat i stap long ai bilong haus. 7 Na Em i tokim ol, Mekim haus i kamap doti, na pulimapim ol ples op wantaim ol man yupela i kilim i dai. Yupela go ausait. Na ol i go ausait, na kilim ol man i dai insait long biktaun. 8 Na em i kamap olsem, taim ol i wok long kilim ol i dai, na mi stap yet, long mi pundaun long pes bilong mi, na singaut, na tok, Ah GOD Bikpela! Bai Yu bagarapim olgeta olgeta lain i stap yet bilong Isrel taim Yu kapsaitim belhat nogut tru bilong Yu antap long Jerusalem? 9 Nau Em i tokim mi, Sin nogut bilong hauslain bilong Isrel na Juda i bikpela planti moa yet, na dispela hap i pulap long blut, na dispela biktaun i pulap long pasin paul. Long wanem, ol i tok, BIKPELA i bin givim baksait long dispela graun, na BIKPELA i no lukim. 10 Na long sait bilong Mi tu, ai bilong Mi bai i no inap soim sori, na tu Mi bai i no inap gat pasin sori, tasol Mi bai bekim pe long pasin bilong ol antap long het bilong ol. 11 Na, lukim, dispela man i werim klos bilong naispela laplap, husat i gat kom bilong holim ing klostu long sait bilong em, i givim ripot long dispela samting, i spik, Mi bin mekim olsem Yu bin tok strong long mi.