Jer 35 | TpiKJPB | STEP | ¶ Dispela tok i kam long Jeremaia long BIKPELA long ol de bilong Jehoiakim pikinini man bilong Josaia, king bilong Juda, i spik,

Jeremiah 35

1 ¶ Dispela tok i kam long Jeremaia long BIKPELA long ol de bilong Jehoiakim pikinini man bilong Josaia, king bilong Juda, i spik, 2 Go long hauslain bilong ol lain Rekap, na toktok long ol, na bringim ol i go insait long haus bilong BIKPELA, i go insait long wanpela bilong ol rum, na givim ol wain long dringim. 3 Nau mi kisim Jasanaia pikinini man bilong Jeremaia, pikinini man bilong Habasinaia, na ol brata bilong em, na olgeta pikinini man bilong em, na hauslain olgeta bilong ol lain Rekap. 4 Na mi bringim ol insait long haus bilong BIKPELA, i go insait long rum bilong ol pikinini man bilong Hanan, pikinini man bilong Ikdalaia, wanpela man bilong God, dispela i klostu long rum bilong ol hetman, dispela i antap long rum bilong Measeaia, pikinini man bilong Salum, wasman bilong dua. 5 Na mi putim long ai bilong ol pikinini man bilong hauslain bilong ol lain Rekap ol sospen i pulap wantaim wain, na ol kap, na mi tokim ol, Yupela dringim wain. 6 Tasol ol i tok, Mipela bai i no inap dringim wain. Long wanem, Jonadap, pikinini man bilong tumbuna papa bilong mipela Rekap, i tok strong long mipela, i spik, Yupela no ken dringim wain, yupela, o ol pikinini man bilong yupela oltaim oltaim. 7 Na tu yupela no ken wokim ol haus, o planim pikinini kaikai, o planim gaden wain, o gat wanpela. Tasol olgeta de bilong yupela yupela mas stap long ol haus sel, inap long yupela ken stap laip planti de long dispela hap we yupela stap ol ausait man. 8 Olsem tasol mipela i bin bihainim nek bilong Jonadap, pikinini man bilong tumbuna papa bilong mipela Rekap, long olgeta samting em i bin givim tok long mipela, long mipela i no ken dringim wain olgeta de bilong mipela, mipela, ol meri bilong mipela, ol pikinini man bilong mipela, o ol pikinini meri bilong mipela, 9 O bilong wokim ol haus bilong mipela long stap long en. Na tu mipela i no gat gaden wain, o bikpela gaden, o pikinini kaikai. 10 Tasol mipela i bin stap long ol haus sel, na mipela i bin bihainim tok, na mekim bilong bihainim olgeta samting papa bilong mipela Jonadap i tok strong long mipela. 11 Tasol em i kamap olsem, taim Nebukadresar, king bilong Babilon, i kam antap insait long dispela hap, long mipela i tok, Kam, na larim yumi go long Jerusalem, long wanem, yumi pret long ami bilong ol lain Kaldia, na long wanem, yumi pret long ol ami bilong ol lain Siria. Olsem na mipela i stap long Jerusalem. 12 ¶ Nau tok bilong BIKPELA i kam long Jeremaia, i spik, 13 BIKPELA bilong ol ami, God bilong Isrel, i tok olsem, Go na tokim ol man bilong Juda na ol man i stap long Jerusalem, Ating i yes long yupela bai kisim skul bilong harim ol toktok bilong Mi, BIKPELA i tok? 14 Ol toktok bilong Jonadap, pikinini man bilong Rekap, dispela em i tok strong long ol pikinini man bilong em long ol i no ken dringim wain, ol i bihainim. Long wanem, inap long tude ol i no dringim liklik, tasol ol i bihainim tok strong bilong papa bilong ol. Tasol Mi bin toktok long yupela, taim Mi kirap long moning tru na toktok, tasol yupela i no harim long Mi. 15 Mi bin salim tu long yu olgeta wokboi bilong Mi, ol profet, taim Mi kirap long moning tru na salim ol, i spik, Yupela tanim bek nau, olgeta wan wan man long lusim pasin nogut bilong en, na stretim pasin bilong yupela, na no ken go bihainim ol arapela god bilong stap aninit long ol, na yupela bai stap long dispela hap Mi bin givim long yupela na long ol tumbuna papa bilong yupela. Tasol yupela i no bin lindaunim ia bilong yupela, o harim long Mi. 16 Bikos ol pikinini man bilong Jonadap, pikinini man bilong Rekap, i bin bihainim tok strong bilong papa bilong ol, dispela em i tok strong long ol, tasol dispela lain manmeri i no bin harim long Mi, 17 Olsem na God BIKPELA bilong ol ami, God bilong Isrel, i tok olsem, Lukim, Mi bai bringim antap long Juda na antap long olgeta man i stap long Jerusalem olgeta dispela samting nogut Mi bin kolim bilong birua long ol. Bilong wanem, Mi bin toktok long ol, tasol ol i no bin harim. Na Mi bin singaut long ol, tasol ol i no bin bekim tok. 18 Na Jeremaia i tokim hauslain bilong ol lain Rekap, BIKPELA bilong ol ami, God bilong Isrel, i tok olsem, Bikos yupela i bin bihainim tok strong bilong papa bilong yupela Jonadap, na holimpas olgeta strongpela lo bilong em, na mekim bilong bihainim olgeta samting em i bin tok strong long yupela, 19 Olsem na BIKPELA bilong ol ami, God bilong Isrel, i tok olsem, Jonadap, pikinini man bilong Rekap, bai i no inap sot long wanpela man bilong sanap long ai bilong Mi oltaim oltaim.