Joshua 7
1¶ Tasol ol pikinini bilong Isrel i mekim wanpela pasin bilong sakim lo long samting i tambu olgeta. Long wanem, Ekan, pikinini man bilong Karmi, pikinini man bilong Sapdi, pikinini man bilong Sera, bilong lain bilong Juda, i kisim bilong samting i tambu olgeta. Na belhat bilong BIKPELA i kirap na birua long ol pikinini bilong Isrel. 2Na Joshua i salim ol man i lusim Jeriko i go long Eai, dispela i klostu long Bet-aven, long is sait bilong Betel, na tokim ol, i spik, Go antap na lukim dispela hap. Na ol man i go antap na lukim Eai. 3Na ol i kam bek long Josua, na tokim em, No ken larim olgeta lain i go antap. Tasol larim klostu olsem tupela o tripela tausen man i go antap na paitim Eai. Na yu no ken mekim olgeta lain i go hatwok long dispela hap. Long wanem, ol i liklik lain tasol. 4Olsem na bilong dispela lain manmeri klostu 3,000 man i go antap long hap. Na ol i ranawe long ai bilong ol man bilong Eai. 5Na ol man bilong Eai i paitim bilong ol klostu olsem 36 man. Long wanem, ol i ranim ol i lusim ai bilong dua bilong banis, yes, i go long Sebarim, na paitim ol taim ol i go daun. Olsem na ol bel bilong ol manmeri i kuk, na kamap olsem wara. 6¶ Na Josua i brukim klos bilong em, na pundaun long graun antap long pes bilong em long ai bilong bokis kontrak bilong BIKPELA inap long apinun tru, em na ol lapun hetman bilong Isrel, na putim das antap long ol het bilong ol. 7Na Josua i tok, Sori tru, O GOD Bikpela, olsem wanem na Yu bin bringim dispela lain manmeri hapsait long Jordan liklik, long givim mipela i go long han bilong ol lain Amor, long bagarapim mipela olgeta? Gutpela moa em i laik bilong God long mipela i bin tok em inap, na sindaun long hapsait long Jordan. 8O Bikpela, mipela bai tok wanem, taim Isrel i tanim ol baksait bilong ol long ai bilong ol birua bilong ol! 9Long wanem, ol lain Kenan na olgeta husat i stap long dispela hap bai harim long en, na ol bai raunim mipela nabaut, na rausim nem bilong mipela long dispela graun. Na Yu bai mekim wanem long bikpela biknem bilong Yu? 10¶ Na BIKPELA i tokim Josua, Yu sanap. Olsem wanem na yu slip olsem long pes bilong yu? 11Isrel i bin mekim sin, na tu ol i bin kalapim lo bilong kontrak bilong Mi, dispela Mi bin tok strong long ol. Long wanem, yes, ol i bin kisim bilong samting i tambu olgeta, na tu ol i bin stilim, na haitim wantaim giaman tu, na ol i bin putim dispela, yes, namel long ol samting bilong ol yet. 12Olsem na ol pikinini bilong Isrel i no inap long sanap long ai bilong ol birua bilong ol, tasol ol i tanim ol baksait bilong ol long ai bilong ol birua bilong ol, bilong wanem, ol i kamap tambu olgeta. Na tu bai Mi no inap stap wantaim yupela moa liklik, sapos yupela i no bagarapim olgeta dispela samting i tambu olgeta long namel bilong yupela. 13Kirap, mekim ol manmeri i kamap holi, na tok, Mekim yupela yet i kamap holi long redi long tumora. Long wanem, God BIKPELA bilong Isrel, i tok olsem, I gat wanpela samting i tambu olgeta i stap namel long yu, O Isrel. Yu no inap sanap long ai bilong ol birua bilong yu, inap long yupela i tekewe dispela samting i tambu olgeta long namel bilong yupela. 14Olsem na long moningtaim mipela bai bringim yupela i kam bilong bihainim ol lain bilong yupela. Na em bai kamap, long lain husat BIKPELA i kisim bai kam bilong bihainim ol famili bilong en. Na famili BIKPELA bai kisim bai kam long ol hauslain. Na dispela hauslain BIKPELA bai kisim bai kam long wan wan man. 15Na em bai kamap, long em husat ol i kisim wantaim samting i tambu olgeta ol bai kukim olgeta wantaim paia, em na olgeta samting em i gat. Bilong wanem, em i bin kalapim lo bilong kontrak bilong BIKPELA, na bilong wanem, em i bin wokim longlong pasin insait long Isrel. 16¶ Olsem na Josua i kirap long moning tru, na bringim Isrel long ol lain bilong ol. Na BIKPELA i kisim lain bilong Juda. 17Na em i bringim famili bilong Juda. Na Em i kisim famili bilong ol lain Serak. Na em i bringim famili bilong ol lain Serak long olgeta wan wan man, na Em i kisim Sapdi. 18Na em i bringim hauslain bilong em long olgeta wan wan man, na Ekan, pikinini man bilong Karmi, pikinini man bilong Sapdi, pikinini bilong Sera, bilong lain bilong Juda, Em i kisim. 19Na Josua i tokim Ekan, Pikinini man bilong mi, givim, mi askim yu plis, glori i go long God BIKPELA bilong Isrel, na autim sin bilong yu i go long Em. Na tokim mi nau wanem samting yu bin mekim. No ken haitim dispela long mi. 20Na Ekan i bekim Josua, na tok, Em i tru mi bin mekim sin i birua long God BIKPELA bilong Isrel, na olsem na olsem mi bin mekim. 21Taim mi lukim namel long ol kago bilong pait wanpela nambawan klos Babilon, na 200 sekel silva, na wanpela hap gol, hevi bilong en i 50 sekel, nau mi mangalim ol, na kisim ol. Na, lukim, ol i stap hait insait long graun long namel bilong haus sel bilong mi, na dispela silva aninit long en. 22Olsem na Josua i salim ol mausman, na ol i ran i go long haus sel. Na, lukim, em i stap hait insait long haus sel bilong em, na silva aninit long en. 23Na ol i kisim ol ausait long namel bilong haus sel, na bringim ol i kam long Josua, na i kam long olgeta pikinini bilong Isrel, na slipim ol long ai bilong BIKPELA. 24Na Joshua, na olgeta Isrel wantaim em, i kisim Ekan, pikinini man bilong Sera, na silva, na klos, na hap gol, na ol pikinini man bilong em, na ol pikinini meri bilong em, na ol bulmakau man bilong em, na ol donki bilong em, na ol sipsip bilong em, na haus sel bilong em, na olgeta samting em i gat, na bringim ol i go long ples daun bilong Ekor. 25Na Josua i tok, Bilong wanem yu bin givim hevi long mipela? BIKPELA bai givim hevi long yu tude. Na olgeta Isrel i tromoi ol ston bilong kilim em, na kukim ol olgeta wantaim paia, bihain long ol i bin tromoi ol ston bilong kilim ol. 26Na ol i sanapim antap long em wanpela bikpela hip bilong ol ston i stap inap long tude. Olsem na BIKPELA i tanim na lusim strong bilong belhat bilong Em. Olsem na nem bilong dispela ples ol i kolim, Ples daun bilong Ekor, i go inap long tude.
Copyright information for
TpiKJPB