Luk 14 | TpiKJPB | STEP | ¶ Na em i kamap olsem, taim em i go insait long haus bilong wanpela nambawan hetman bilong ol Farisi long kaikai bret long de sabat, long ol i was long em.

Luke 14

1 ¶ Na em i kamap olsem, taim em i go insait long haus bilong wanpela nambawan hetman bilong ol Farisi long kaikai bret long de sabat, long ol i was long em. 2 Na, lukim, i gat wanpela man long ai bilong em husat i gat sik dropsi. 3 Na taim Jisas i bekim tok em i tokim ol masta kot na ol Farisi, i spik, Em i orait long lo long oraitim sikman long de sabat? 4 Na ol i pasim ol maus bilong ol. Na em i kisim em, na oraitim em, na larim em i go. 5 Na em i bekim tok long ol, i spik, Husat bilong yupela bai gat wanpela donki o bulmakau man i pundaun insait long bikpela hul, na em bai i no inap pulim em i kam ausait kwiktaim long de sabat? 6 Na ol i no inap long bekim tok long em gen long ol dispela samting. 7 ¶ Na em i putim ensel i go ausait wanpela tok piksa long ol dispela husat ol i askim long kam, taim em i luksave long ol i bin makim ol nambawan rum olsem wanem, i spik long ol, 8 Taim wanpela man i askim yu long kam long wanpela marit, no ken sindaun long rum i antap moa olgeta, nogut em i askim wanpela man i gat ona moa long yu long kam. 9 Na em husat i askim yu long kam na em i kam na tokim yu, Givim dispela man ples bilong yu. Na yu stat, wantaim sem, long go long las rum i daunbilo olgeta. 10 Tasol taim em i askim yu long kam, go na sindaun long las rum i daunbilo olgeta. Inap long taim em husat i askim yu long kam, em i ken tokim yu, Pren, go antap moa. Nau bai yu gat lotu long pes bilong ol husat i sindaun long kaikai wantaim yu. 11 Long wanem, husat man i litimapim em yet ol bai daunim. Na em husat i daunim em yet bai ol i litimapim. 12 Nau em i tokim em tu husat i askim em long kam, Taim yu wokim wanpela bikpela kaikai o apinun kaikai, no ken singautim ol pren bilong yu, o ol brata bilong yu, o ol kandere bilong yu, o ol maniman i stap klostu long yu, nogut ol tu i askim yu gen, na ol i mekim wanpela bekim long yu. 13 Tasol taim yu wokim bikpela kaikai, singautim ol rabisman, ol man hap bilong bodi bilong ol i bagarap, ol lek nogut, ol aipas man. 14 Na blesing bai stap long yu. Long wanem, ol i no inap bekim yu. Long wanem, long kirap bek bilong ol stretpela man God bai bekim yu. 15 ¶ Na taim wanpela bilong ol husat i sindaun wantaim em long kaikai i harim ol dispela samting, em i tokim em, Blesing i stap long em husat bai kaikai bret long kingdom bilong God. 16 Nau em i tokim em, Wanpela man i wokim wanpela bikpela apinun kaikai, na askim planti man long kam. 17 Na em i salim wokboi bilong em, long taim bilong apinun kaikai, bilong tokim ol husat em i askim long kam, Kam. Long wanem, olgeta samting i redi nau. 18 Na ol olgeta, wantaim wanpela tingting, i stat long wokim tok nating. Namba wan i tokim em, Mi bin baim wanpela hap graun, na mi mas i gat nid long go na lukim dispela. Mi askim yu plis long lusim mi long dispela singaut. 19 Na narapela i tok, Mi bin baim faipela yok bulmakau man, na mi go long traim ol. Mi askim yu plis long lusim mi long dispela singaut. 20 Na narapela i tok, Mi bin maritim wanpela meri, na olsem na mi no inap long kam. 21 Olsem tasol dispela wokboi i kam, na soim bikman bilong em ol dispela samting. Nau bikman bilong haus, taim em i belhat, i tokim wokboi bilong em, Go ausait kwiktaim long ol rot na liklik rot bilong dispela biktaun, na bringim i kam long hia ol rabisman, na ol man hap bilong bodi bilong ol i bagarap, na ol lek nogut, na ol aipas. 22 Na wokboi i tok, Bikman, em i kamap olsem yu bin tok strong, na spes i stap yet. 23 Na bikman i tokim wokboi, Go ausait long ol bikrot na ol lain banis plaua, na pulim ol strong long kam insait, inap long haus bilong mi i ken stap pulap. 24 Long wanem, mi tokim yu, Long i no gat wanpela bilong ol dispela man husat mi bin askim long kam husat bai testim bikpela apinun kaikai bilong mi. 25 ¶ Na i gat wanpela traipela lain tru wantaim em. Na em i tanim, na tokim ol, 26 Sapos wanpela man i kam long mi, na em i no hetim papa bilong em, na mama, na meri, na ol pikinini, na ol brata, na ol susa, yes, na laip bilong em yet tu, em i no inap stap disaipel bilong mi. 27 Na husat man i no karim diwai kros bilong em, na kam bihainim mi, em i no inap stap disaipel bilong mi. 28 Long wanem, husat bilong yupela, taim em i gat laik long wokim wanpela taua, i no sindaun pastaim, na kaunim kos bilong en, long em i gat inap mani long pinisim dispela o nogat? 29 Nogut sapos, bihain long em i bin slipim ol as ston, na em i no inap long pinisim dispela, olgeta husat i lukim dispela i stat long wokim pani long daunim em, 30 I spik, Dispela man i stat long wokim, na em i no inap long pinisim. 31 O wanem king, taim em i go wokim bikpela pait i birua long narapela king, i no sindaun pastaim, na painim tingting long em i stap inap wantaim 10,000 long bungim em husat i kam birua long em wantaim 20,000 o nogat? 32 O sapos nogat, taim arapela i stap longwe tru yet, em i salim wanpela lain bilong ol mausman bilong gavman, na askim long ol rot bilong wokim bel isi. 33 Olsem tasol, wankain olsem, husat man i stap bilong yupela husat i no givim baksait long olgeta samting em i gat, em i no inap stap disaipel bilong mi. 34 Sol em i gutpela. Tasol sapos sol i bin lusim test bilong en, ol bai givim gutpela test long en wantaim wanem samting? 35 Em i no fit long graun, o yet long hip pekpek. Tasol ol man i tromoi dispela i go ausait. Em husat i gat ol ia long harim, larim em harim.