Mat 2 | TpiKJPB | STEP | ¶ Nau taim mama i karim Jisas long Betlehem bilong Judia long ol de bilong king Herot, lukim, i gat ol saveman i kam long hap is i kam long Jerusalem,

Matthew 2

1 ¶ Nau taim mama i karim Jisas long Betlehem bilong Judia long ol de bilong king Herot, lukim, i gat ol saveman i kam long hap is i kam long Jerusalem, 2 I spik, Man husat mama i karim King bilong ol Ju i stap we? Long wanem, mipela i bin lukim sta bilong em long hap is, na mipela i kam long lotuim em. 3 Taim king Herot i bin harim ol dispela samting, em i pilim wari, na olgeta Jerusalem wantaim em. 4 Na taim em i bin bungim olgeta bikpris na ol man bilong rait bilong ol manmeri wantaim, em i askim ol strong long mama bai karim Kraist we. 5 Na ol i tokim em, Long Betlehem bilong Judia. Long wanem, rait i stap pinis i kam long profet olsem, 6 Na yu Betlehem, long hap graun bilong Juda, yu no stap liklik olgeta namel long olgeta hetman bilong Juda. Long wanem, ausait long yu bai wanpela Nambawan Gavman i kam, husat bai bosim lain bilong mi Isrel. 7 Nau Herot, taim em i bin singautim ol dispela saveman hait, i wok strong long askim ol long wanem taim dispela sta i kamap ples klia. 8 Na em i salim ol long Betlehem, na tok, Go na wok strong long painim dispela yangpela pikinini. Na taim yupela i bin painim em pinis, bringim tok i kam long mi gen, inap long mi ken kam na lotuim em tu. 9 ¶ Taim ol i bin harim king, ol i lusim dispela hap. Na, harim, sta, dispela ol i lukim long hap is, i go paslain long ol, inap long em i kam na sanap na lindaun antap long hap we dispela yangpela pikinini i stap. 10 Taim ol i lukim sta, ol i wokim amamas tru wantaim bikpela amamas tru i planti moa yet. 11 Na taim ol i kam insait long haus, ol i lukim dispela yangpela pikinini wantaim Maria, mama bilong em, na ol i pundaun, na lotuim em. Na taim ol i bin opim ol samting i dia tru bilong ol, ol i givim ol presen long em, gol, na frankensens, na mur. 12 Na taim God i tok lukaut long ol long wanpela driman long ol i no ken go bek long Herot, ol i lusim dispela hap i go long kantri bilong ol yet long narapela rot. 13 ¶ Na taim ol i go pinis, lukim, ensel bilong Bikpela i kamap ples klia long Josep long wanpela driman, i spik, Kirap, na kisim dispela yangpela pikinini na mama bilong em, na ranawe i go long Isip, na yu stap long dispela hap inap long mi bringim yu tok. Long wanem, Herot bai painim dispela yangpela pikinini long bagarapim em olgeta. 14 Taim em i kirap, em i kisim dispela yangpela pikinini na mama bilong em long nait, na go long Isip. 15 Na ol i stap long dispela hap inap long dai bilong Herot. Inap long em i ken kamap pinis, dispela Bikpela i toktok long en long maus bilong profet, i spik, Mi bin singautim pikinini man bilong mi long kam ausait long Isip. 16 ¶ Nau Herot, taim em i luksave long ol dispela saveman i wokim pani long daunim em, em i belhat tru planti moa yet, na em i salim ol man i go ausait, na kilim i dai olgeta pikinini husat i stap long Betlehem, na long olgeta hap arere bilong en, i stat long tupela krismas na aninit, bilong bihainim dispela taim em i bin wok strong long askim long ol saveman. 17 Nau em i kamap pinis, dispela samting profet Jeremi i toktok, i spik, 18 Long Rama i gat wanpela nek ol i harim, krai sori, na krai tru, na bikpela pasin bilong soim sori, Resel i krai tru long ol pikinini bilong em, na em i no gat laik long kisim bel isi, bilong wanem, ol i no stap. 19 ¶ Tasol taim Herot i dai pinis, lukim, wanpela ensel bilong Bikpela i kamap ples klia long wanpela driman long Josep long Isip, 20 I spik, Kirap, na kisim dispela yangpela pikinini na mama bilong em, na go insait long hap graun bilong Isrel. Long wanem, ol i dai pinis husat i painim laip bilong dispela yangpela pikinini. 21 Na em i kirap, na kisim dispela yangpela pikinini na mama bilong em, na kam insait long hap graun bilong Isrel. 22 Tasol taim em i harim long Akeleas i bin bosim kingdom long Judia long kisim ples bilong papa bilong em Herot, em i pret long go long dispela hap. Tasol, taim God i tok lukaut long em long driman, em i tanim i go long sait i go insait long ol hap bilong Galili. 23 Na em i kam na stap long wanpela biktaun ol i kolim Nasaret. Inap long em i ken kamap pinis, dispela toktok i kam long ol profet, Ol bai kolim em wanpela man Nasaret.