Psa 56 | TpiKJPB | STEP | I go long namba wan man bilong wokim Musik antap long Jonat-elem-rekokim, Miktam bilong Devit, taim ol lain Filistia i bin kisim em long Gat. ¶ Sori long mi, O God. Long wanem, man i laik daunim mi olgeta. Olgeta wan wan de em i save pait na givim hevi long mi.

Psalms 56

I go long namba wan man bilong wokim Musik antap long Jonat-elem-rekokim, Miktam bilong Devit, taim ol lain Filistia i bin kisim em long Gat.

1 ¶ Sori long mi, O God. Long wanem, man i laik daunim mi olgeta. Olgeta wan wan de em i save pait na givim hevi long mi. 2 Olgeta wan wan de ol birua bilong mi ol i laik daunim mi. Long wanem, O Yu Man i stap Antap Olgeta, ol man i laik pait birua long mi ol i planti. 3 Long taim mi pret, bai mi putim bilip bilong mi long Yu. 4 Long God bai mi litimapim nem bilong tok bilong Em. Mi bin putim bilip bilong mi long God. Bai mi no pret long samting man inap mekim long mi. 5 Olgeta wan wan de ol i krungutim ol tok bilong mi. Olgeta tingting bilong ol i birua long mi bilong mekim pasin nogut. 6 Ol i bungim ol yet wantaim. Ol i haitim ol yet. Ol i lukluk long wokabaut bilong mi, taim ol i wet long tewel bilong mi. 7 Ating long sin nogut bai ol i ranawe? O God, long belhat bilong Yu, Yu mas daunim ol manmeri. 8 ¶ Yu save long ol wokabaut raun bilong mi. Yu mas putim ol ai wara bilong mi long botol bilong Yu. Ating ol i no stap long buk bilong Yu, a? 9 Taim mi singaut long Yu, orait ol birua bilong mi bai i tanim i go bek. Mi save long dispela, long wanem God i stap bilong helpim mi. 10 Long God bai mi litimapim tok bilong Em. Long BIKPELA bai mi litimapim tok bilong Em. 11 Mi bin putim bilip bilong mi long God. Bai mi no pret long samting man inap mekim long mi. 12 O God, ol strongpela promis bilong Yu ol i stap antap long mi. Bai mi givim biknem long Yu. 13 Long wanem Yu bin tekewe tewel bilong mi long i dai pinis. Ating bai Yu no tekewe ol lek bilong mi long pundaun? Olsem na mi ken wokabaut long ai bilong God long lait bilong ol man i stap laip.