Psa 25 | TwiNAK | STEP | O, wo Awurade na mebɔ wo mpae;

Psalms 25

Akwankyerɛ ne ogye mpaebɔ

1 O, wo Awurade na mebɔ wo mpae;
2 wo mu, me Nyankopɔn, na mahotoso wɔ.
Gye me fi nkogu animguase mu.
Mma mʼatamfo ani mmmere me.
3 Wɔn a wɔde wɔn ho to wo so no nni nkogu, na mmom wɔn a wɔsɔre tia wo no.
4 Kyerɛ me wʼakwan,
O Awurade; da no adi kyerɛ me.
5 Kyerɛ me na mentena ase wo nokware mu; efisɛ, wo ne me Nyankopɔn a wugye me nkwa.
Daa mede me ho to wo so.
6 Kae,
O Awurade, wʼadɔe ne wo dɔ a efi tete woada no adi akyerɛ me no.
7 Fa me mmabun mu bɔne ne mfomso kyɛ me.
Kae me wo dɔ a wode dɔ me daa no,
Awurade!
8 Esiane sɛ Awurade yɛ ɔtreneeni na oye nti, ɔkyerɛ nnebɔneyɛfo kwan a wɔmfa so.
9 Ɔkyerɛ ahobrɛasefo ɔkwan pa ne nʼapɛde.
10 Ɔde nokware ne ɔdɔ di wɔn a wodi nʼapam ne ne mmara so no anim.
11 Di wo bɔhyɛ so,
Awurade, na fa me bɔne kyɛ me, efisɛ, ɛdɔɔso.
12 Wɔn a wotie Awurade no behu ɔkwan a ɛsɛ sɛ wɔfa so.
13 Wobenya nkɔso daa, na wɔn mma afa asase no.
14 Awurade fa wɔn a wotie no no nnamfo, na ɔne wɔn hyɛ nʼapam no mu den.
15 Mede me ho to Awurade so sɛ ɔmmoa me daa nyinaa; ogye me fi amane mu.
16 Dan wʼani hwɛ me,
O Awurade, na hu me mmɔbɔ efisɛ, meyɛ ɔbaakofo a mayɛ mmerɛw.
17 Yi me dadwene ne me haw nyinaa fi me so.
18 Dwen me mmɔborɔyɛ ne mʼamanehunu ho na fa me bɔne nyinaa kyɛ me.
19 Hwɛ atamfo dodow a mewɔ; hwɛ ɔtan a wɔtan me.
20 Bɔ me ho ban na gye me nkwa.
Yi me fi nkogu mu.
Merebɛpɛ guankɔbea wɔ wo nkyɛn.
21 Me trenee ne me nokware nhwɛ me so efisɛ, mewɔ wo mu ahotoso.
22 O,
Onyankopɔn, gye wo man Israel fi wɔn haw mu.