Psa 5 | TwiNAK | STEP | O Awurade , tie me mpaebɔ ne mʼahomegu.

Psalms 5

Ogye mpaebɔ

1 O Awurade, tie me mpaebɔ ne mʼahomegu.
2 Me Nyankopɔn ne me Hene, tie me sufrɛ na boa me.
3 O,
Awurade, wote me nne anɔpa.
Owia pue a, mebɔ mpae na metwɛn wo mmuae.
4 Wonyɛ Onyankopɔn a adebɔne sɔ wʼani, na womma bɔne ho kwan wɔ wʼanim.
5 Wokyi ahantanfo na wukyi nnebɔneyɛfo nso.
6 Wosɛe atorofo na wubu basabasayɛfo ne asisifo animtia.
7 Nanso esiane wo dɔ bebrebe nti, mitumi ba wo fi.
Mitumi som wo wɔ wʼasɔredan kronkron no mu, na mekotow wo wɔ nidi mu.
8 Awurade, mewɔ atamfo bebree.
Kyerɛ me kwan na menyɛ wʼapɛde; kyerɛ me.
Kyerɛ me kwan na memfa so.
9 Nea mʼatamfo ka no nnim.
Ɔpɛ ara na wɔpɛ sɛ wɔsɛe me.
Nnaadaa ne adɛfɛdɛfɛ wɔ wɔn nsɛm mu, nanso ne nyinaa yɛ awudisɛm.
10 O Onyankopɔn, bu wɔn fɔ, na twe wɔn aso.
Na ma wɔn adwemmɔne mfa wɔn nkɔ ɔsɛe mu.
Esiane wɔn bɔne dodow ne tia a wɔsɔre tia wo no nti, pam wɔn fi wʼanim.
11 Nanso wɔn a wonya wo nkyɛn guankɔbea no ani gye; na daa wobetumi ato dwom anigye so.
Bɔ wɔn a wɔdɔ wo no ho ban.
Esiane wo nti, wɔwɔ anigye.
12 Awurade, wuhyira wɔn a wotie wʼasɛm.
Wo dɔ bɔ wɔn ho ban sɛ kyɛm.