2Ch 17 | ZomZIV | STEP | Ama tapa Jehoshaphat in a kumpi za luah a, Israel langah a kithakhauhsak hi.

2 Chronicles 17

Judah Kumpi Jehoshaphat

1 Ama tapa Jehoshaphat in a kumpi za luah a, Israel langah a kithakhauhsak hi. 2 Amah in kulha ki-um Judah khuapite khempeuh ah galkapte omsak a, Judah sung le a pa Asa in a laksa Ephraim khuapi sungah khuapi cingte a koih hi. ^a

3 Jehoshaphat in a neu lai-in a pa David zuihsa lampi tawn ahi manin TOPA in amah a ompih hi. Amah in Baal thu dong loin 4 Israel-te gamtatnate sangin a pa’ Pasian zongin a thupiakte a zuizaw hi. 5 TOPA in ama ukna nuai-ah a kumpi-gam kipsak a; neihsa tampi nei-in a kipahtawi nadingin Judah khempeuh in Jehoshaphat letsong a puak uh hi. 6 TOPA lampite ah a lungsim a pia hi; tua tham loin amah in Judah panin munsangte le Asherah khuamte a phiatkhia hi.

7 A kumpi suah zawh a kum thumna kumin a uliante Ben-Hial, Obadiah, Zechariah, Nethanel le Micaiah-te Judah khuapite ah thuhilh dingin a sawl hi. 8 Amaute tawh Levi-te ahi - Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah - le Tob- Adonijah - le siampite ahi Elishama le Jehoram a paikhawmsak hi. 9 Amaute in TOPA Thukham Laibu keng uh a Judah gam sung khempeuhah hilhin; Judah khuapite khempeuh ah pai kawikawi uh a, mite a hilh uh hi. ^b

10 Amaute in Jehoshaphat a do loh nadingun Judah gam kimkot a kumpi-gam khempeuh ah TOPA kihtakna a tung hi. 11 Philistia-te pawlkhat in letsong le siahin ngun puak uh a, Arab-te in ganhon: tuutal tul sagih le za sagih le keel tul sagih le za sagih amah a puak uh hi. ^c

12 Jehoshaphat vanglian semsem a; Judah sungah kulhte le van koihna khuapite lamin 13 Judah khuapite ah huhna tampi a puak hi. Amah in galdo siamsate zong Jerusalem ah omsak hi. 14 Amaute a innkuan kuanun a nuai-a bang ahi hi: ^d

Judah pan, 1,000 a uk galkap mangte:
Galkap mangpa Adnah, Galkap mi 300,000 tawh;
15 azom, galkap mangpa Jehohanan, galkap mi 280,000 tawh;
16 azom TOPA nasem dingin a kipia Zicri tapa Amasiah, mi 200,000 tawh;
17 Benjamin pan: ^e
A thahat galkappa Eliada thal le lum tawi mi 200,000 tawh;
18 azom, Jehozabad galhiam tawi mi 180,000 tawh ahi hi.

19 Hihte in Judah gam buppi-a kulha ki-um khuapite a, a omsakte banah kumpipa nasemte ahi uh hi. ^f