Dan 5 | ZomZIV | STEP | Kumpi Belshazzar in a uliante tulkhat tawh pawi lianpi kham a, zu a dawn khawm uh hi.

Daniel 5

Kawm tunga Lai Kigelh

1 Kumpi Belshazzar in a uliante tulkhat tawh pawi lianpi kham a, zu a dawn khawm uh hi. 2 Belshazzar in zu a dawn kawmin amah le a uliante, a zite uh le a zinote uh tawh zu dawnna-a a zat dingun a pa ^{▼▼5.2 Ahikeh na pusawn uh ahikeh na luahte uh tg. 11,13 le 18 ah zong} Nebuchadnezzar in Jerusalem biakinnpi pana a lak ngunhai-tung le kham hai-tungte a lak nadingun thu a pia hi. 3 Tua ciangin amaute in Jerusalem a Pasian biakinnpi pana kila kham hai-tungte paipih uh a, kumpipa, a uliante, a zite le a zinote in tuate in a dawn uh hi. 4 Zu a dawn kawmkawm un kham, ngun, sumngo, sik, sing le suanga kibawl pasiante a phat uh hi. ^b

5 Thakhatin mihing khut mete kilang a, kumpi inn sung meivak tunna gei, za kizutsa kawm tungah lai kigelh hi. Tua khut in lai a gelh laitakin kumpipa in a mu gige hi. 6 A mai daang a, lau lua mahmah ahi manin a khukte gel kitat gaugau a, a khete a koncip hi.

7 Kumpipa in aisan siamte, aksi-en siamte ^{▼▼5.7 Ahikeh Chaldea-te tg.11 ah zong} le khongkhai siamte samsak a, hih Babylon mipilte kiangah, “Hih lai kigelh sim thei-a, a khiatna hong gen theite puan dupsan silhsakin a ngawngah khamkhi ka oksak dinga, kumpi-gam sungah a sangpen pan a thumna-in ka koih ding hi,” a ci hi. ^d

8 Tua ciangin kumpipa mipilte khempeuh lut uh a, ahi hangin amaute in lai kigelh sim theih loin a khiatna zong a gen thei kei uh hi. 9 Tua ciangin Kumpi Belshazzar lauthawng semsem a, a mai adaang pha semsem hi. A uliante in lah a cih nading uh a thei kei uh hi. ^e

10 Kumpinu ^{▼▼5.10 Ahikeh Kumpipa’ nu} in, kumpipa le a uliante aw a zak ciangin pawi khamna inn sungah lut a, “Kumpipa aw, na khan sawt hen! Patau lua kei in! Tua zahin daang zawzen kei in! 11 Na gam sungah a siangtho pasiante kha a nei mi khat a om hi. Na pa hun lai-in pasiante bangin thuthuk theihna, ciimna le pilna a nei mi khat a om hi. Na pa ka cih - Kumpipa Nebuchadnezzar in amah - mitphial siamte, aisan siamte, aksi-en siamte khongkhaite ukpi-in a koih hi. 12 Tua Daniel, kumpipa in Belteshazzar a cih pa, a lungsim navakin theihna le theihtelna nei a, mang zong khia thei in, dotna haksa pipi dawng thei a, thu haksa pipi vengsak thei hi. Daniel samsak lecin lai kigelh a khiatna hong gen thei ding hi,” a ci hi.

13 Tua ciangin kumpipa mai-ah Daniel kipaipih a kumpipa in a kiangah, “Ka pa kumpipa in Judah gama saltang hong lakte lakah khat Daniel na hi hiam? 14 Nang sungah pasiante kha omin thusim theihna le pil tangtuamna na neih lam ka za hi. 15 Hih lai kigelh sim ding le a khiatna gen dingin mipilte, aisan siamte ka mai-ah hong kipaipih khin hi, ahi zongin amaute in a gentel thei kei uh hi. 16 Tu-in nang in khiatna neite khia thei-in thu haksa pipite vengsak thei hi, ci-in ka za hi. Hih lai kigelh na sim theih a, a khiatna zong na gen theih leh puan dupsan hong silhsakin na ngawngah khamkhi hong ki-oksak dinga kumpi gam sunga alian pen thumna-in hong kikoih ding hi,” a ci hi. ^g

17 Tua ciangin Daniel in kumpipa kiangah, “Na letsongte nang kem inla, na pahtakmante midang khatpeuh pia in. Tua hi taleh kumpipa adingin lai kigelhte kong simsak dinga a khiatna zong kong gen ding hi. ^h

18 “Kumpipa aw, Sang Pen Pasian in na pa Nebuchadnezzar a lianpipenin koih a, liatna, minthanna le thupinate a pia hi. 19 Ama piaksa a sanna hangin mite khempeuh, minamte le kampau tuamtuamte in na pa lipkhapin kihta uh hi. Kumpipa in a thah nopte thatin a hawi nopte hawi hi; a sansak nopte sangsakin a niamsak nopte a niamsak hi. 20 Ahi hangin ki-uangsakin, kiphasaka lungkhauh ahi manin a kumpi tokhom panin kikhinkhia a, a minthanna kihawkkhiatsak hi. 21 Mite lak panin kihawlkhiamang a, ganhing lungsim kineisak hi; gamsung sakolte tawh tengkhawma, bawnghonte bangin lopa a ne hi; tua ciangin vana daituite in a pumpi kawtsak a, mihing kumpi-gam ah Sang Pen Pasian a lianpen hi-a, a deih khatpeuh kumpi a suaksak hi, ci-in a telsiang theih matengin tua bangin a om hi. ⁱ

22 Ahi hangin nang a tapa ^{▼▼5.22 Ahikeh ama suante ahikeh a zalaihpa} Belshazzar aw, hihte khempeuh na theih hangin na kiniamkhiat tuan kei hi. 23 Tua sangsikin nang le nang vantung Topa langah na pang hi. Ama biakinnpi-a hai-tungte na kiangah la-in nang le na uliante, na zite le na zinote in tuate zangin zu na dawn uh hi. Bangmah a mu thei lo, a za thei lo, a telcian thei lo, kham, ngun, sumngo, sik, sing le suang-a kibawl pasiante na phat uh hi. Ahi hangin na nuntakna le na vaite khempeuh a khut sunga a len Pasian na pahtawi kei hi. 24 Tua ahi ciangin amah in tua lai a gelh khut khat hong sawl hi.

25 “Tua a kigelh laimal hih ahi hi.

MENE, MENE, TEKEL, PARSIN ^{▼▼5.25 Aram pau in UPARSIN (tua pen AND PARSIN)}.

26 “Laimalte a khiatna hih ahi hi:

Mene: ^{▼▼5.26 Mene cihteh kisim ahikeh mina (dangka tang min) hikha ding hi.} Pasian in na kumpi sepna nite sim khina, beisak ta hi.
27 Tekel: ^{▼▼5.27 Tekel cihteh tawikhai ahikeh shekel cihna hikha ding hi.} Nang hong kitawikhai khina, na leek zo kei hi, ⁿ
28 Peres: ^{▼▼5.28 Peres (Parsin khata genna) cihteh kihawm khin ahikeh Persin ahikeh mina lang ahikeh shekel lang cihna hikha ding hi.} Na kumpi-gam kikhenthang khina, Media-te le Persia-te kipia khin hi,” a ci hi. ^p

29 Tua ciangin Belshazzar thupiakna tawh Daniel puan dupsan kisilhsakin, a ngawngah khamkhi ki-oksak a, kumpi-gam sungah a sangpen thumna dingin kitangko hi.

30 Tua zan mahmah in Babylon-te ^{▼▼5.30 Ahikeh Chaldea-te} kumpipa Belshazzar kithat a, 31 kum sawmguk le nih a pha Media mi Darius kumpi a suak hi. ^r