Ezr 6 | ZomZIV | STEP | Tua ciangin Kumpi Darius in thu pia a, Babylon-a van manpha kholna sunga thuciamtehna kholna amaute in a zong uh hi.

Ezra 6

Darius Khensat Thukipte

1 Tua ciangin Kumpi Darius in thu pia a, Babylon-a van manpha kholna sunga thuciamtehna kholna amaute in a zong uh hi. 2 Media gama Ecbatana kumpi innah laizial khat kimu-a a sungah hih kimu hi: ^a

Ciamtehna-kho:

3 Kumpipa Cyrus a kum masapen kumin Jerusalem a Pasian biakinnpi tawh kisai thukip khensatna kumpipa in koih hi:
Biakinnpi a munah kilam kikin innbul kinga henla biakna kipia hen. A sanna pi ^{▼▼6.3 Aramaic in tong sawmguk (meter 27 bang)} sawmkua hi-in a zaina pi sawmkua mah hi dinga, 4 suangtum lianpi dawl thum le singluang dawl khat hi ding hi. Sumbeite kumpi sumkholna panin kipia ding hi. 5 Nebuchadnezzar in Jerusalem biakinnpi pan lakhia a Babylon a, a puak ngun le khama kibawl Pasian inn a vanzatte Jerusalem biakinnpi a, amau mun ciat ah kipuak kik ding hi; tuate Pasian inn sunga a omna ngei tekah kikoih ding hi. ^c
6 Tua ciangin tu-in, Euphrates-Gal ukpipa Tattenai le Shethar-Bozenai le nang, tua gam ulian amaute lawmte na kihemkhia ding uh hi. 7 Hih Pasian biakinnpi nasep nawngkaisak kei un. Jew-te ukpipa le Jew upate amau omna mun ngei ah Pasian inn lamsak kik un.
8 Tua ban ah hih Jew upate in Pasian inn na lam nadingun thukip kong pia hi:
Nasep a kibansap loh nadingin hih mite zat khempeuh Euphrates-Gal leitang siahkholna kumpi sum kholna pan a vekin kipia ding hi. 9 A kisam peuhmah - vantung Pasian tunga meihal biakna-a piak dingin bawngtalno, tuutal, tuupano, le mangbuh, ci, zu, sathau, Jerusalem a siampite nget bangbang - nisimin kibansam loin kipia pelmawh ding hi, 10 tua pen amaute in vantung Pasian a lungkim nadingin a piak theih nading uh le kumpipa le a tapate a cidam nadingun thu a ngetsak theih nading uh ahi hi. ^d
11 Tua ban lai-ah hih thukip a khel khatpeuh a om leh a innkhuam khat kibot dinga, a tungah amah kihencipin kikhai ding hi. Hih a bawl mawhna hangin ama inn ninkholna kisuaksak ding hi. 12 Hih thukip a khel ding le Jerusalem a biakinnpi a susia dingin a khut a liik khatpeuh, ama Min ten nading a bawl Pasian in lawnthal ta hen. ^e
Keimah Darius in thukip kong pia hi. Keima piak bang tektekin kisem ta hen.

Biakinnpi Mansiangna le Apna

13 Tua ciangin Kumpipa Darius thukip a kikhak bang tektekin Euphrates-Gal ukpipa Tattenai le Shethar-Bozenai le amaute a huhte in a sem uh hi. 14 Tua bangin kamsangpa Haggai le Iddo suante Zechariah thuhilhna zui-in Jew upate in inn lam zom uh a, ama uh a telh mahmah uh hi. Amaute in Israel Pasian thupiakna le Persia kumpite - Cyrus, Darius le Artaxerxes thukipna bangin biakinnpi lam a mansiang uh hi. 15 Kumpi Darius in a uk a kum gukna Adar kha a nithumna ni-in biakinnpi kizosiang hi. ^f

16 Tua ciangin Israel mipite - siampite, Levi-te le adang sal suaktate khempeuh in lungnuam-takin Pasian inn apna pawi a bawl uh hi. 17 Hih Pasian inn ap nadingin amaute in bawngtal zakhat, tuutal zanih, tuuno apa zali le Israel beh’ khat ciangin keel apa khat ta - mawhna hanga biakna-in Israel-te khempeuh in keel apa sawm le nih a pia uh hi. 18 Tuateh Jerusalem a Pasian nasepna ah Moses Laibu a kigelhsa tawh kizui-in siampite amau khen omna munah semsakin Levi-te amau pawl sepna mun mah ah a semsak kik uh hi. ^g

Paisan Pawi

19 A kha masa a ni sawm le nilina ni-in salsuaktate in Paisanna pawi a bawl uh hi. 20 Siampite le Levi-te amau le amau kisiansuah uh a thukham kalh bangin a vekun a siang uh hi. Levi-te in sal suakta khempeuh, amaute sanggam, siampite le amau mahmah adingin Paisan tuuno a go uh hi. 21 Tua ciangin amau’ Gentile vengte tawh a nin a sepna uh hanga amau le amau a kikhenkhiate in TOPA Israel-te Pasian a zon theih nadingun amaute khempeuh tawh salsuahna pana a ciah kik Israel-te khempeuh in an a nekpih khawm uh hi. 22 Amaute in ni sagih sung Silngo-sawhloh Anlum Pawi lungnuamtakin pawi a bawl uh hi; bang hang hiam cih leh Israel-te Pasian, Pasian inn lam nasepna ah a huh dingin TOPA in Assyria kumpipa ngimna heisak-a, amaute a lungnuamsak hi.