Lev 26 | ZomZIV | STEP | 1 “’Milim ahikeh lim khat ahikeh suang siangtho khatpeuh bawltawm loin amai-ah kuna na biak dingun suang kikhuak zong phut kei un. Keimah TOPA note Pasian ka hi hi.

Leviticus 26

Thuman’na Hanga Pahtakman

1 1 “’Milim ahikeh lim khat ahikeh suang siangtho khatpeuh bawltawm loin amai-ah kuna na biak dingun suang kikhuak zong phut kei un. Keimah TOPA note Pasian ka hi hi. ^a

2 “‘Ka Sabbath-te tang unla ka munsiangtho zahtak un. Keimah TOPA ka hi hi. ^b

3 “‘Note in ka thukipte zui-a kong thu piakte limtaka na man uh leh, 4 a hunin guah kong puak dinga, leitang in gah gahin lo sunga singkungte a gah ding hi. 5 Na buh cil hun uh lenggah lawh hun tawh kizomsuakin, lenggah lawh hun pen lo pawi hun tawh kizomsuak dinga, an na duh peuhpeuh ne-in na gam sunguah lungnuamtakin na ne ding uh hi. ^c

6 Gamsung kong kilemsak dinga kuamah in hong lauthawngsak loin na lum hithiat ding uh hi. Keimah in gamsung panin gamsa gilote ka nawhkhia dinga, na gamsung uh namsau in a nawkkha kei ding hi. 7 Na galte uh na delh ding uh a, note mai-ah namsau ma-in a tuk ding uh hi. 8 Note nga in za khat na delh ding uh a, za khat in tulsawm delhin na mai uah na galte uh namsau in a puk ding uh hi. ^d

9 “‘Note hong angvanin kong cing dinga, hong ciphasakin kong khangsak dinga note tawh ka thukhun ka kiplet ding hi. 10 Anthak kep nadingin anlui na kepkhiat dongun kumlui an na ne ding uh hi. 11 Note lakah ka omna mun ^{▼▼26.11 Ahikeh ka mun siangtho} ka koih dinga note kong kih kei ding hi. 12 Note lakah vakin na Pasian uh ka hi dinga, note ka mi na hi ding uh hi. 13 Keimah TOPA note Pasian, Egypt-te sila a suak nawn lo dingin Egypt pana hong paikhiatpihpa ka hi hi; na hakkolte uh ka kuaitan-a, ngawng tangsa in kong pai theisak hi. ^f

Thuman’ lohna hanga Gawtna

14 “‘Note in ka thu mang loin hih ka thupiakte khempeuh na puaseh uh a, 15 ka thukipte niala, ka thukhamte kihin, ka thupiakte na puaseh uh a, tua ciangin ka thukhunte na palsat uh leh 16 note tungah hihte ka tungsak ding hi: Note tungah patauhna, hong vattum ding cinatnate le na khuamuhna uh siasakin na nuntakna uh a khitkang ding cisa natna kong tungsak ding hi. Lo na pawi uh hangin a mawkna hi ding hi, bang hang hiam cih leh na galte un a ne ding uh hi. 17 Na galte un hong zawh nadingun kong maigumsan ding hi; no hong mudahte in hong uk ding uh a, kuama delh lohpi-in na taikek ding uh hi.

18 “‘Hihte khempeuh nungin ka thu nong man kei lailai uh leh na mawhna uh hangin sagih vei dan kong tuaksak beh lai ding hi. 19 Na lungkhauh kisak theihna uh ka sumang dinga, na tungua van sik tawh kibangin na nuai-ua lei sumsan ka bangsak ding hi. 20 Na hatna uh a mawkna-in kizang ding hi, bang hang hiam cih leh na leitang hoihte un gah gah loin gam sunga singte a gah kei ding hi.

21 “‘Kei nong langbawl lailai uh a, ka thu nong man nop kei uh leh na mawhnate uh tawh kituakin na thuaknate uh a zah sagih valin ka sahsak ding hi. 22 Gamsa gilote kong dosak dinga na tate uh hong tuahsakin na ganhonte uh ne ding uh a, note tawm mahmah in na lampite uh gamkhing a suak ding hi.

23 “’Hih bang teng hi napi kong thuhilhna na man nop kei uh a nong langbawl lailai uh leh 24 kei mahmah in note kong langbawl dinga, na mawhnate uh hangin a zah sagih valin kong thuaksak ding hi. 25 Thukhunte na palsatna uh pulakna-in note tungah namsau kong tungsak ding hi. Note khuapi sungah na nung kik uh ciangin note lakah pulpi kong tungsak dinga, na galte uh khut sungah hong kipia ding hi. 26 Anlum hong puakte ka khaktan ciangin numei sawm in thuk khatah anlum em thei ding uh a, teh tektekin a hawm ciipciip ding uh hi. Na ne ding uh a ahi hangin na kham zo kei ding uh hi.

27 “’Hih bang teng hi napi ka thu hong mang lo lai-in kei nong langneih lailai uh leh 28 tua ciangin ka heh dinga note hong langneihin kei mahmah in note na mawhna uh hangin a zah sagih vei val dan kong tuaksak ding hi. 29 Note in na tanute na tapate uh sa na ne ding uh hi. 30 Na munsangte uh ka susia dinga, na gimnamtui biakna-taute uh phuk-in, nuntakna a nei lo na milimte uh tungah na luangte uh ka vumsak dinga note kong kih ding hi. 31 Na khuapite uh ka susiamang dinga, na munsiangthote uh a mawkna suaksakin, na biaknate uah lungkimna ka nei kei ding hi. 32 Na leitang uh a mawkna ka suaksak dinga tua lai-a tung na galte nangawn uh a mulkim ding uh hi. 33 Minamte lakah note kong thehthang dinga, ka namsau dokin note kong delh ding hi. Na gam uh kimawk nusiat dinga na khuapi uh a kisia dikdek ding hi. 34 Tua ciangin na gam uh a kinusiat hun sungteng le na galte uh gam sunga na om hun sungteng uh sabbath kumin tang dinga, nuam a sa ding hi. Tua ciangin leitang tawlnga-in sabbath nuam a sa ding hi. 35 Gam in ama tunga na ten lai-ua na ngahsak loh uh tawlngakna sabbath hunte khempeuh gamkhinga a om sungin a ngah ahi hi. ^g

36 “’Note lak pana kinusiakhate ahileh amaute galte leitang ah a lungsim uh ka lauthawngsak mahmah dinga, nahteh huih muta gingin a maute a taisak ding hi. Amaute kuama delh lohpi-in namsau kihta a tai bangin tai ding uh a, a puk ding uh hi. 37 Amaute kuamah in delh lo napi namsau kihta a tai bangin khat le khat a kiphupai ding uh hi. Tua bangin na galte uh mai-ah na nang thei kei ding uh hi. 38 Minamte lakah na mangthang ding uh hi; na galte uh leitang in no hong nawmvalh ding hi. 39 Note sung pan galte leitanga omlaite amau mawhna hangin beimang ding uh hi; amau pate mawhna hangin zong amaute beimang ding uh hi.

40 “‘Ahi hangin amaute in amau mawhna le a pate uh mawhnate a pulak uh leh - amaute, kei langah a zuautatnate uh, kei langa hong langneihnate uh - 41 amaute a galte uh leitanga ka puak theih nadinga amaute hong langneihsaknate - tua ciangin vun at loh amaute lungsim panin kiniamkhiat-a, a mawhna man uh a piak uh ciangin 42 Jacob tawh ka thukhun, Isaac tawh ka thukhun, Abraham tawh ka thukhun, ka phawk gige dinga a leitang zong ka phawk gige ding hi. 43 Ahang in, amaute in a gam uh nusia ding uh a, amaute teng loin gamkhinga a om sungin a gam in sabbath-te a tang ahi hi. Amaute in a mawhna man uh a pia ding uh hi, bang hang hiam cih leh amaute in ka thukhamte nial uh a ka thukipte a kih zo uh hi. 44 Tua hi napi in amaute in a galte uh leitanga a om sung nangawnun amaute susiamang ding zahin amaute nial lo kih loin amaute tawh ka thukhun ka pelh kei hi. Keimah TOPA amaute Pasian ka hi hi. 45 Ahi hangin amaute Pasian ahi dingin, minamte muhin Egypt pan ka paikhiatpih-a, a pu a pate uh tawh ka thukhun ka phawk gige hi. Keimah TOPA ka hi hi,’ ci in,” a ci hi.

46 Hihte pen TOPA in Moses tawna amah le Israel-te kikala a kipsak thukipte, thukhamte le zuih ding ngeinate ahi hi. ^h