Gen 10 | sml_BL_2008 | STEP | Ya na itu salsila panugsugan si Sēm, si Hām maka si Japet, ya anak si Nū. Aniya' na anak sigām puwas bay min latap.

Genesis 10

1 Ya na itu salsila panugsugan si Sēm, si Hām maka si Japet, ya anak si Nū. Aniya' na anak sigām puwas bay min latap.

Kapanubu'an si Japet

2 Na, ya na itu saga anak si Japet l'lla, maka ōn bangsa isab ya patubu' min sigām: si Gomer, si Magog, si Maday, si Jaban, si Tubal, si Mesek maka si Tiras. 3 Tubu'an si Gomer ya na saga a'a Askenas, a'a Ripat maka a'a Togarma. 4 Tubu'an si Jaban ya na saga a'a Elisa, Tarsis, Kīt, maka Rodan. 5 Manjari tubu'an si Jaban tahinang saga bangsa ya maglahat ma bihing tahik maka ma kapū'-pū'an. Kaniya-kaniya sigām magsaddī-saddī lahat maka bahasa sigām.

Kapanubu'an si Hām

6 Na, ya na itu saga anak si Hām l'lla, maka ōn bangsa isab ya patubu' min sigām: si Kūs, si Misil, si Pūt maka si Kana'an. 7 Tubu'an si Kūs, ya na saga a'a Seba, Habila, Sabta, Ra'ama maka Sabteka. Tubu'an si Ra'ama isab ya na saga a'a Seba maka Dedan. 8 Aniya' isab anak si Kūs dakayu', ōnna si Nimrud. In si Nimrud itu dahū min a'a kamemon akosog angagaw lahat maitu ma dunya. 9 Abantug isab iya ma sabab kosogna magpana' sattuwa. Angkan na pinagbahasa h'lling itu, “Bang pa'in ka pasali' ni si Nimrud ya akosog magpapana' ma sabab tabang min PANGHŪ'-Yawe.” 10 Na, ya tagna'an da'ira ^{▼▼Da'ira: ‘lungsud’ bang ma Sama kasehe'an.} pinagbaya'an e' si Nimrud itu, ya na Babilon, Erek, Akkad maka Kalne, ya bay mahē' ma lahat Babilon. 11 Pinaluha isab pagnakura'na sampay ni lahat Assiriya ati mahē' iya amahinang da'ira Niniba maka Rehobot-Ēl maka Kala. 12 Bay pahinangna isab da'ira Resen ma tonga'an Niniba maka Kala, ya da'ira aheya ōnna.

13 Manjari panubu' si Misil isab, ya na saga a'a Lūd, Anam, Lehab, Naptu, 14 Patrus, Kaslu maka Kiriti. A'a Kiriti ^{▼▼A'a Kiriti: atawa a'a Kaslu.} itu ya na paluwasan bangsa Pilistin.

15 Si Kana'an taga-anak l'lla, si Sidun ya siyaka, bo' pasunu' si Hīt. 16 Si Kana'an isab ya pang'mbo'an saga a'a Jibus, Amor, Gilgas, 17 Hīb, Arka, Sīn, 18 Arbad, Semar maka Hamat. Pasaplag asal saga bangsa paltubu'an si Kana'an itu, 19 min lahat Sidun sampay ta'abut lahat Gerar ya ma kasekotan lahat Gasa. Pasampay isab sigām tudju ni lahat Sodom, Gomora, Adma maka Seboyim, ya ma kasekotan lahat Lasa. 20 Na, ya du ilu saga panubu' si Hām ya tahinang palbangsa-bangsahan. Kaniya-kaniya sigām magsaddī-saddī lahat maka bahasa.

Kapanubu'an si Sēm

21 Na, si Sēm isab, siyaka si Japet, ya na pang'mbo'an si Eber sampay panubu'na kamemon. 22 Saga anak si Sēm l'lla ya na si Elam, si Assur, si Alpaksad, si Lūd maka si Aram. 23 Saga panubu' si Aram ya na saga a'a Ūs, Hūl, Geter maka Mesek. 24 Manjari si Alpaksad ya mma' si Sela, bo' si Sela ya mma' si Eber. 25 Si Eber itu duwa anakna l'lla. Ya pangōn ma anakna dangan inān si Peleg ^{▼▼Ya ōn Peleg itu, hatina bang ma bahasa Hibrani ‘abahagi'’.} sabab binangsa manusiya' bay abahagi' ma deyom masana. Si Joktan ya danakan si Peleg. 26 Manjari ya panubu' si Joktan ya na saga a'a Almodad, Selep, Hasamabet, Jera, 27 Hadoram, Usal, Dikla, 28 Obal, Abimail, Seba, 29 Opir, Habila, maka Jobab. Panubu' si Joktan asal sigām kamemon itu. 30 Ya paglahatan sigām ma lahat Mesa sampay ta'abut lahat Separ, ya lahat kabūd-būran tampal ni sobangan.

31 Ya na ina'an saga panubu' si Sēm. Kaniya-kaniya sigām magsaddī-saddī lahat maka bahasa.

32 Na, panubu' si Nū saga a'a kamemon ya tasabbut inān, kaniya-kaniya sigām magsaddī-saddī panugsugan. Lāgi, damuli pa'in min latap, pasaplag ma dunya saga kabangsa-bangsahan kamemon, luwas min panganak si Nū.