k[Ais 57:19]
Ephesians 2
God hiykwe hreme su Krais so kueir nonaw mon wayr
1Paraw kokwe hmo kamaun sow yor o, hmo weynpaweyn piap-araw o, homkwe hme kokwe lokrue-uwr me hieyn mon wak. 2Enekwei sohiy non kokwe, homkwe ki ohiy so sow piap-araw mo meyki ley, seyr homkwe niohney piap-araw non ko me hiy-wayr-uwr so ok ke lonuayk me. Niohney piap-araw mo makwey-uwr sohokwe uwrsa, God se ma me-puar me hiy-anok anok uwr hiy non. a 3Peyr hrom lowpwarowp mokwe uwrsa senkin me hieyn lwak, seyr hromkwe hromo uron ko arian mo meyki mon-aw ley wayr, hromo owhi hok ma nan koukou-ay senkin. Hrom senkin ma lon wayr mokwe, hromkwe, uwrsa yor piap me ma meio me hieyn, sa God so aw-mar hokwe hreme liy sowkin ley. b4God so uron lowk yor ipey-ar ma lwak hokwe, hiykwe hreme kokwe hyo uron-pi ko-ar yor aiopey hay se po mesair kow. 5Mo hromo kamaun sow yor mokwe hom hreme mon okrue hi, God hiykwe hreme kokwe Krais se nion siraw-aw su po ma-mon wayr. Hme ma me-huonok prosue mokwe, mo God so maym ipey-ar hokwaw-aw. c 6God hiykwe hreme kokwe Krais se nion siraw-aw po mon ok-sian, seyr hremekwe Krais se nion siraw-aw po mon iwak, nonkumey ko kipay lowpwarowp mon. d 7Hiykwe hreme senkin sehe lon, hiy enekwei omok lousne ey se hyo maym ipey-ar se mesair kow e. Maym sokukwe Jisas so uron-pi ko-ar hreme ma mesair kow hok non, seyr maym lowpwarowp mo eir mon lwak. 8Payhokuaw, hme ma me-huonok prosue mokwe, mo God so maym ipey-ar hokwaw-aw. Maym sokukwe hmo owh mon sokwe meio ousne, hom God se ma nan kiykiy-ay sohiy. 9Nan kiykiy-ay yor sokukwe hmo mey arian korey, sawk God hiy hme puraw ma kow hok non. Suw senkin, unsaney prueyn hiykwe hyo uru arian se liy nak-owk nakie ley. e 10Payhokuaw, hrom enkin ma lwak ohokwe, God hiykiaw mon ousne. Krais Jisas so kueir nonaw kokwe, God hiykwe hreme kokwe mey yaprue me-aw meio wayr e monhre. Mey yaprue somokwe, hiykiaw ma mon onhan onhan koruay kow hom non.
Krais hiykwe uwrsa lowpwarowp me uwrku kamon-aw lwak e po me-hokruw
11Uwrkayn irweyk ama, hakwe hme sehe me, homkwe kwa nanpanan, paraw hme hmo ipey hom ma liwak sir pie mokwe, homkwe penkin lwak mo? Hmekwe Juda homkwe senkin me, “Hmo owh-ohi mokwe lei mapru sow pa, hrom ma lei mapru sow enkin.” Sawk lei mapru sow yor sokukwe uwr ki ko hom iha non ma meio hom non. 12Enekwei sohokwe peyr homkwe Krais so meiaw mon lwak. Homkwe uwrsa suwon yier irweyk ko me hieyn lwak, seyr homkwe uwrsa, God hiy ma liaup me nion non-waw-waw pa. Seyr God so sokior-ok, hiy ma me-sakon kawk mokwe, hme hiy-mon wayr pa, ki erey mon kokwe. Seyr paraw, hom ki erey ma lwayr hokwe, homkwe uron hyohyo lon pa, seyr homkwe God lopa lwayr. f 13Sawk pokon enkin ohokwe Krais Jisas so kueir hokwe, hom meiaw mon ma lwak liok mokwe, hmekwe sa Krais so nioh hiykiaw ohriar mon po ma-me-okrar. g14Payhokuaw, Krais hiykiaw kokwe hromo liwak marowhway uwr-ar. Hiykwe Juda o, uwrkayn irweyk o, kamon-aw po non-mon wak. Seyr hiykwe awia-pow mo hir, uwrku kreysyar ke meiaw meiaw-aw ma mon wak kokwe hyo owhi non po kros kuayk. h 15Hiykwe Juda mo sow, me-kupaku-ok non o, lanok anok-ok non o, somokwe papo mon-say. Hiykwe senkin sehe mon, uwrku kreysyar sokwe uwrku iwon kamon-awaw ma-mon wak e, hyo kueir arian non-aw. Yerki sohiy non kokwe, hiykwe liwak marowhway yor se mon ousne. i 16Krais, hiy now mon ma lokrue so yerki nonaw kokwe, uwrku kreysyar sohom mo awia-pow lwak yor kokwe papo lokin kwor krue. Hiykwe uwrku kreysyar sohokwe owhi kamon-aw po ma-me swa-hokruw, God so owh mon kokwe. j 17Sa Krais hiy ma le hokwe, hiykwe liwak marowhway-ok ihey-ar kokwe, uwrsa lowpwarowp uwrkayn irweyk meiaw ma lwak me mesor kow nok, Juda ohriar ma lwak me mesor kow. k 18Krais so kueir hokwe, hrom lowpwarowp, Juda o, uwrkayn irweyk o, Aio so inour mon kokwe Niohney kamon-awaw nonaw liy le.
19Uwrkayn irweyk om, hme kokwe uwrsa senkin ok liy ma-me ley, homkwe uwr suwon, seyr homkwe yier meiaw ko. Sawk homkwe Hakamay so uwrsa mo yier-wayh-ar lwak, seyr homkwe God so uwrku-ar. l 20Hom seyn, hmekwe peir ouon ko, aposel o, profet o, hom ma meio yay hain sohok ko eir mon meio ie. Seyr Krais Jisas hiykiaw kokwe a sohiy so mein-pow ipey-ar, a se nekie kraipakrai iarok ey. m 21A sohokwe, Krais so kueir non-aw lorok kraipakrai. Seyr hyo kueir nonaw meio nonay nonay ie, God so a pekney-weys lwak e. n 22Hom seyn, Krais so kueir nonaw hokwe hmekwe seyr har me nion papo nak-meio sapeykyay, a, God so Niohney hiy ma lwayr mon kokwe. o
Copyright information for
AAU