Luk 23 | AEY | STEP | Odocob cunug odi cajimeig Jisas uqa Pailatca ehudi ehi lein.

‏ Luke 23

Jisas uqa Pailat amegna tawen

(Matju 27.1-2, 11-14; Mak 15.1-5; Jon 18.28-38)

1 Odocob cunug odi cajimeig Jisas uqa Pailatca ehudi ehi lein. 2 Odimeig age Pailat amegna um qudec je geh bahic madein, “Dana i egena dana cajaca cunug kobol me qee iwalaaden hewoqa. Uqa takis Sisa cain helowain ec maaden. Odocob uqadodoc madena, ‘Ija Krais, ija king biligen,’ ena,” ein.

3 Odocob Pailat uqa sisildon, “Juda agena king eu hinafo?” don.

Odocob Jisas jejeg hewi madon, “Hina madagana eu odi himec,” don.

4 Odocob Pailat ihanec dana benbenca dana cajaca gelgel amagana maaden, “Ija dana i dewegna cahuldoc oso qee felem,” aden.

5 Euqa eu age gagadic mimeig madein, “Dana eu uqa dana cajaca je maadeceb olohonoga ben. Judia hatu cunugna eu odi odon. Uqa Galili hatu ono sanan mimei hu ene calen,” ein.

Jisas Herod amegna tawen

6 Odocob Pailat eu odi dah mimei oso sisildon, “Dana i uqa Galilidecfo?” don. 7 Saen Pailat uqa Jisas eu Herod maha cul cofdonanadec ec dumei uqa Herodca suldon. Saen euna Herod uqaha Jerusalem ono ilo bibili bilen. 8 Herod uqa Jisas hutan dah men. Odimei saen cecelac bahic figiannu cisdudu bilen. Uqa Jisas kobolkobol odoc oso odocob figiannu cisdon. Eunu uqa Jisas fimei waug ceelen. 9 Eunu Herod sisilec geh bahic Jisas sisildon qa Jisas uqa jejeg qee hewel. 10 Odocob ihanec dana benbenca, loo je iwaladec danaca cemenugca timeig uqanu um qudec je madein. 11 Odocob Herod uqana han danaca age Jisas cih je madodoig ququein. Lotoc gaga me bahic king taqeginawe u taqitumeig suldocobil Pailatca ceselen. 12 Herod Pailatca ale wele cad bilolosi. Euqa deel euna dih danah mesin.

Pailat uqa age Jisas na babalecna tuitu qoiga ec maden

(Matju 27.15-26; Mak 15.6-15; Jon 18.39-19.16)

13 Odocob Pailat uqa ihanec dana benbenca, iwaladec danaca, dana cajaca maadeceb cegulein. 14 Odimei maaden, “Age dana i ija amina ehudi ahumeig uqa dana cajaca age Rom agena ilo qee tooadecnu iwaladi cahuldona eiga. Qila ene age amagana ija uqa sisilduga qa age uqana cahuldoc um qu madeiga eu mele bahic oso qee felem. 15 Herodha uqana cahuldoc oso qee fel. Eunu uqa egeca haun suldocob ceseleia. Dana i uqana cahuldocca qee, gauc cal mecnu ihoc qee. 16 Eunu ijana han dana oso uqa geh bahic qisadocob ija culdecemin nuigian,” aden. [Odocob kobol oso bilen. Pasowa sab jec saen cunugna Pailat gihacdoc dana osol gihacdoc jonadec besitoloi.] ^{▼▼(23.16-17)Age Mak 15.6 feiga.}

18 Odocob dana cajaca am cunug age utaii madein, “Qagadoga! Barabas gihacdocnadec besitoga!” ein. 19 Odocob Barabas uqa taun benna ono han tulidumei dana qagadocob gihacdoc jona mudein.

20 Euqa Pailat Jisas suldocob nuigiannu odon. Odinu uqa dana cajaca am age haun utaadi maaden. 21 Euqa age haun ceseli utai madoin, “Na babalecna tuitu qoga! Na babalecna tuitu qoga!” doin.

22 Odocob Pailat maadi cijeddon, “Eetanu? Uqa cel qisol mec odon? Ija uqa cal mecnu ihoc dewegna cahuldoc oso qee felem! Ija gehca bahic qisadumig culdecemin nuigian,” aden.

23 Euqa eu age jejenega ohisna Jisas na babalecna tuitu qocnu utaii madein. Odocob cit qocna bahic agena utaec aig qon. 24 Eunu Pailat eu agena je toodu Jisas na babalecna tuitu qocnu cois en. 25 Odimei eu age dana gihacdocnadec besecnu madein eu besiton. Uqa dana han tulidumei taun benna ono dana oso qagadon. Uqa odimei agena je toodumei Jisas deweg na babalecna tuitu qoqagannu ebenegana men.

Age Jisas na babalecna tuitu qoin

(Matju 27.32-44; Mak 15.21-32; Jon 19.17-27)

26 Odocob Jisas ehudi belein. Saen eu age bebeli bileig jicna dana oso, ijan Saimon Sairinidec, taun benna ono nunuen ceguldoin. Odimeig cahacdodoig na babalec qatona mitocobil gahidu Jisas toodon.

27 Odocob dana cajaca am ben bahic Jisas Saimonca tooalein. Dana cajaca am eunadec caja leih age Jisasnu qaqajeig due walocca sisili toodoin. 28 Odocob Jisas waldumei maaden, “Jerusalem caja, age ijanu cain qajowain qa agedodocnu agena melnu cois qajeiga. 29 Deel hona euna dana madoqagan, ‘Caja melca qee, mel qee basegina eu age, odocob mel qee su adegina eu age ceeli bileigale!’ oqagan. 30 Saen euna

dana age aluh madoqagan, ‘Toni cilehgaga!’ oqagan.
Odimeig aluh gatic madoqagan, ‘Jahulgaga!’ oqagan.
(Hosea 10.8)

31 Ge, age saen na cebac tatawen ceteh i edi odoginafi na galaleeb saenna age adi odoqagan?” aden.

32 Loo je wooldoc dana lecis ha cedali ehi tein eu Jisasca osoben aqoqagannu cedali ehi tein. 33 Odimeig age cudun, ijan “Ilo Gatic,” ono ti calimeig Jisas dana lecis loo je wooldoc eu aleca na babalec cijedna tuitu aqimeig caqusadecebil caculein. Oso Jisas eben meulana isec na babalecna tuitu qoin, odocob oso eben ansena isec na babalecna tuitu qoin. 34 Jisas maden, “O Mei, age eeta odogina eu qee dogina. Eunu agena silail cagasiadaga,” en.

Odimeig uqana lotoc agedodoc satu udodoig siwi cedein. 35 Odimei dana cajaca ono tawein mecieegin Juda dana agena ilo eu age Jisasnu lelanec je mamadiein, “Uqa leih cahahaaden. Uqa Anutna Kraisfi uqa uqadodoc cahahadoia!” ein.

36 Odimeig han dana ha uqanu lelanec je mamadeig uqa cemenug cocobi timeig wain gad qugiannu uutiein. 37 Odimeig maduduein, “Hina Juda agena kingfi hinadodoc cahahadoga!” ein.

38 Odocob je i uqa ilona ^{▼▼(23.38)Grik jaqec je hilah leihna age je oso tubdu jaqein eu odi: Grik jaqec jena, Latin jaqec jena, Hibru jaqec jenaca} jaqi qoin, “Dana i Juda agena king.”

39 Odocob loo je wooldoc dana lecis na babalecna tuitu aqalein oso uqa Jisas lelandudu madon, “Hina Anutna Kraisfi hinadodoc cahahadumeg eleha cahahalaga!” don.

40 Euqa dana oso eu odi dah mimei cahacdudu madon, “Hinana nun qoc eu odiwe ijana nun qoc. Ele dain ben leccaca oqona. Eunu hina Anut qee cucuidogonafo? 41 Elena cahuldoc ameg owona eu cois qa uqa cahuldoc osoca qee,” don. 42 Odimei uqa Jisas madon, “Jisas, saen hina king calimeg ijanu cisdogale!” don.

43 Odocob Jisas madon, “Ija mele mahigina, qila hina ijaca paradaisna bilewan,” don.

Jisas cal men

(Matju 27.45-56; Mak 15.33-41; Jon 19.28-30)

44 Odocob cam gemo ceheceb cam tu qocob hatu cunug gagatuc menen, ninijen li 3 kilok wesu. 45 Odocob cam tu lelen jajahulen lotoc ben tempelna hamol gunna caqusec tawoloi eu baladu lecisdon. 46 Odocob Jisas jejeg suli u utaii madon, “O Mei! Ija doloni hina ebenna migina!” don. Uqa eu odi dih madimei kis umei cal men.

47 Han 100 cofadec dana eu odi odocob fimei Anut binan sulen. Odimei maden, “Mele bahic, dana i uqa dana ititom bahic!” en.

48 Odocob dana cajaca ceteh calen eu foqaga cegulein eu age odi fimeig qada qaqajeig mugumuga fohifohidodoig ceselein. 49 Cunug osolosol Jisasnu doloig eu ageca, caja Galilidec Jisas toodu hoin eu ageca nag onoca qisacdu tataweig ceteh i calen eu fein.

Age Jisas deweg meen hatinna mudein

(Matju 27.57-61; Mak 15.42-47; Jon 19.38-42)

50 Aria, dana oso, ijan Josef, bilen. Uqa Juda agena jobon nag Arimatiadec. Uqa dana ititom. Uqa Anutna cul hoc saen susumudi bilen. Uqaha Juda agena gesilec tamanec qa uqa agena Jisas qagadocnu je madec odocca eunu cois qee el. 52 Uqa Pailat amegna limei Jisas deweg ganac ugiannu sisildon. 53 Odimei Jisas deweg ganac na babalecnadec hewen toneceb lotoc senenec jeuldeceb ehi nui hatin aluh qeih hunein euna mudein. Heel eu dana oso qee mudec Jisas casac mudein. 54 Deel eu saciadoc deel odocob Juda agena cuha deel gun sanan migia oodon.

55 Odocob caja Jisas Galilidec toodoin eu age Josef toodocobil nuimeig Jisas deweg ganac hatinna adi mudein eu fein. 56 Odimeig age jobon ceseli belimeig mool dedeman meme Jisas deweg ganac joudoqaga bili saciadoin.

Juda agena cuha deel gunna age jaen mudecnu loo je cagoc gagadic madena odi odoin.