‏ Luke 24

Jisas ceseli cajen

(Matju 28.1-10; Mak 16.1-8; Jon 20.1-10)

1Cuhana qasil wele bahic caja eu age mool dedeman meme saciadoin eu cedi heheweig heel Jisas deweg ganac mudein ono belein. 2Beli calimeig meen heel cebec cufa qoc eu olocdu fil mec ninijen fein. 3Euna age dunuh lein qa Jisas Tibud deweg ganac qee felein. 4Age dadanii tatawegin dana lecis lotoc senenec seeecca bahic wele cemenega tawesin. 5Odocob cucuiecca caja eu age jogoii maha mecidoin. Oodogin dana eu ale maadesin, “Age eetanu cal mec agena cudunna dana cebac bilia eu megegina? 6Uqa ene qee nijel. Uqa wele ceseli cajeia. Galili hatu ono bibili maadennu cisdoiga. 7‘Dana Melah uqa dana silailca ebenegana mecebil na babalecna tuitu qocobil cal migian. Odocob deel cijeddocna haun ceseli cajigian,’ aden,” adesin.

8Odocob caja eu age uqana jenu wawaga fogo don. 9Hatin onodec haun ceselimeig malogom 11-pela eu ageca lein. Odocob ceteh amagana fein eu dana cajaca cunug ha maadein. 10Caja age eu Maria Magdaladecca, Joana odocob Maria, Jems anag, eu age caja leihca ceteh eunu malogom maadein. 11Euqa malogom caja age gad je madegina ec cisdoin. Odimeig agena jenu wawaga qee meleel. [Euqa Pita cajimei guguli Jisas deweg ganac mudein heelna nuen. Uqa jogoimei ceteh oso qee fel qa Jisas deweg ganac jelein lotoc eu himec fen. Odimei uqa adi odon ec waug cacaden ceselen.]

Dana lecis ale Emeas jicna cocobosi Jisas fesin

(Matju 16.12-13)

13Deel euna himec eu ale togca odi Emeas jobon belesin, uqana cecelac Jerusalemdec eu 11-pela kilomita eu odi. 14Odocob ale ceteh cunug calen eunu togodudu belesin. 15Saen ale je mamadesi togodudu bebelesin Jisas uqadodoc cemenela leceb osoben cocobi belein. 16Ale fesin qa uqa Jisas ec qee fogo alel. 17Odocob Jisas maalen, “Ale eetanu je togodudu belesina?” alen.

Eu ale olanala gulucqecca tului tawesin. 18Odimesi oso uqa ijan Kliopas sisildon, “Acahna, hina cele dana eundec osoldih uqa ono Jerusalem ceteteh cali hon qila deel leih hedoia eu qee dolfo?” don.

19Odocob Jisas sisilalen, “Cel ceteteh?” alen.

Odocob eu ale jejeg hewi madosin, “Ceteteh Jisas Nasaretdecnu calen eu. Dana eu uqa je hahun madec dana. Odocob uqa Anutca dana cajaca amagana cabi gagadic uu je gagadic mamadi cobon. 20Egena ihanec dana benbenca, cofgec danaca cal migiannu madecebil na babalecna tuitu qoin. 21Euqa wele bahic egena wawige madec eu odi tawen eu uqa himec Isrel dana cajaca cahahagigian ec cisdom. Odocob je oso ha eu ceteh calen eunadec hocob qila eu deel cijed hedoian. 22Eu himec qee. Caja leih egena amnadec ququlubgeeigan. Eu age cocojagen heelna noigan. 23Euqa uqa deweg ganac qee felein. Eu age ceseli bimeig ensel lecis amagana camasac mimesi maadesian eu uqa haun ceseli cajeia ec madeigan. 24Egena amnadec leih heelna limeig caja madeigan odi bahic gulucdoigan qa uqa qee felein,” dosin.

25Odocob Jisas maalen, “Ale gad! Je hahun madec dana agena jenu wawala meleecnu culumenca! 26Anutna Krais uqa dain ben doc i edi uu li uqana kobolkobol ugian ec qee dosinafo?” alen. 27Odimei Jisas uqanu Anutna jaqec je cunugna madenanu sildialen, uqa Mosesna loo jena sanan mimei je hahun madec dana agena jaqec je cunug odi maalen.

28Eu age wele jobon cacali dana lecis eu ale lowasannu lesin eu dodoldoin. Odocobil Jisas uqa jobon eu cuculdi soeceb nuigiannu odon. 29Euqa eu ale cahacdudu madosin, “Cam wele nonon tu hona. Hoga, eleca ene nijuqa,” dosin. Eunu uqa leceb eu ale gami nijein. 30Uqa eu aleca sab jec cabalna bilimeig bred umei eeldoc je maden. Odimei uqa bred fenadimei alen. 31Amala fogo docob Jisas fesin qa eu ale amalana jausen. 32Odocob eu aledodoc togodudu madesin, “Saen jic cuhul je malili Anutna jaqec je sildilelen ele wawile ceeleia!” esin.

33Odimesi eu ale mahuc bahic cajimesi Jerusalem ceseli belesin. Ono ale malogom 11-pela leih gami cegulein bibilegin cali lesin. 34Cali ono lecebil odi maalein, “Tibud eu mele bahic haun ceseli cajeia! Uqa Saimon amegna camasac meia!” alein.

35Odocob dana lecis eu ale jic cuhul cocobosin aleca calennu saadesin. Odocob Tibud bred fenialeceb amala fogo docob fesinnu ha sildiadesin.

Malogom age Jisas fein

(Matju 28.16-20; Mak 16.14-18; Jon 20.19-23)

36Saen eu ale eu odi maaadi tatawesin mahuc bahic Tibud age gemo li tawimei [maaden, “Malol ageca biliale,” aden].

37Euqa age cucuiecca qeleleeig eu dol oso foqona ec cisdoin. 38Euqa uqa maaden, “Age eetanu geh cisdogina? Age eetanu wawaga dadanec ben bahic? 39Ija jaimi ebenica feiga. Odocob fimeig dol age culunugaca tefulunugaca qee. Eunu ija bahic wawaga meleeiale. Euqa ija odica eu feiga. Hewitimeig tebandoiga. Odimeig doqagan,” aden.

40[Uqa odi mamadi jaih ebenca ihacaden.] Euha age wawaga qee meleel eu age ceelecca dadanecca tawein eunu uqa sisiladen, “Age ene sab jecnu osocafo?” aden. 42Age cul dool jana golin oc utein. 43Eu umei uqa amagana jen.

44Odimei maaden, “Ceteteh inu bahic saen ija ageca cocobi bilob maadem. Ceteh cunug ijanu Mosesna loo jena jaqeinca, je hahun madec dana agena jaqecna jaqeinca, odocob Samna jaqeinca eu mele ihoc caligian,” aden.

45Odimei uqa Anutna jaqec jenu wawaga fogo dugiannu cisdoc fogo duaden. 46Odimei maaden, “Anutna jaqec je edi madena, ‘Anutna Krais eu dain ben doc umei cal mecnadec deel cijeddocna haun ceseli cajigian. 47Odocob eu uqa ijanna dana cajaca agena silailnu tului falicdocobil Anut agena silail cagasiadecnu je qasali maadoqagan. Age Jerusalem ene sanan mimei mahamaha cunug ihoc ligiannu age me je qasali maadoqagan,’ ena. 48Age eu ceteteh i wele fein eunu qasali maadeiga. 49Dah meiga, ceteh oso Memige Anut suldocob ageca nigian ec je hahun maden eu ija sulduadigina. Euqa age ene taun benna sumudi bibilebil gagadic odoc ohisdec ageca nigian,” aden.

Anut Jisas ehudi sao jobon ceseli ten

(Mak 16.19-20; Aposel 1.9-12)

50Odimei uqa ehadi taun ben eu cuculdi Betani jobon odi nuein, odimei uqa eben suli umei eeladen. 51Uqa ono eelaaden [Anut ehudeceb cuculadi sao jobon ten.] 52Eu age [gob cehi uqanu cuha fimeig] haun Jerusalem ceelii ceseli belein. 53Odocob age saen cunugna tempelna Anut hetaga doc je madoloig.