Luk 8 | AEY | STEP | Saen osooso hedocob Jisas taun nagca, jobon nagca Anutna culnu me je maadi cobon. Malogom 12-pela age gami belein.

‏ Luke 8

Caja age Jisas toodu coboin

1 Saen osooso hedocob Jisas taun nagca, jobon nagca Anutna culnu me je maadi cobon. Malogom 12-pela age gami belein. 2 Oodogin caja leih buga me qeeca, hagca eundec me maden euha tooadecebil belein. Caja eu age Maria, Magdaladec, uqanadec buga me qee 7-pela dewegnadec ititacaden, uqaca, 3 Joana, uqa Susa aideg, uqa Herodna jona dana cofdoc, uqaca, Susanaca, caja mati agedodoc agena ceteteh euna Jisas uqana malogomca cesuladein, ^{▼▼(8.3)Grik jaqec je hilah leihna age “Jisas uqana malogomca cesuladein,” ec qee jaqelein, euqa age je fil jaqein eu odi: “Jisas cesuldoin”} ageha Jisas gami belein.

Dana uqa aig cabina helen

(Matju 13.1-9; Mak 4.1-9)

4 Odocob dana cajaca jobon cunugnadec odi huhuein. Jobon alildoc toodocobtoodocob hoin. Odocob saen dana cajaca geh bahic cegulecebil Jisas galolo je maaden.

5 Uqa maaden, “Dana oso uqana cabina uqana wit aig helecnu nuen. Uqa aig hehelen aig osooso jic cobocna tonen. Odocob dana age aig eu lahacdocobil man fululec age humeig cedi ji hedoin. 6 Aig osooso maha meen baibaca euna tonen. Odocob maha ganac euna waca qeenu qala bimei galalen. 7 Aig osooso dud geuna tonen. Aig ceteh dudca gami ben memegin ceteh dudca cilehdocobil aig qee men. 8 Aig osooso mulu mahana tonen. Odocob leih qala qahimei ben mi aig qon. Gug osolna aig oso qoc 100 ihoc len,” aden.

Odi maadimei Jisas utai maaden, “Oso dah mecnu dahigca je eu dah meiale,” aden.

Galolo je uqana gugnu maaden

(Matju 13.10-17; Mak 4.10-12)

9 Odocob Jisasna malogom uqa galolo je maaden eu gugnu sisildoin. 10 Odocobil uqa maaden, “Anut culadeceb age Anutna culnu ceteteh jahunec docnu eu nijia. Euqa dana cajaca leih

age amagana foqaganqa
qee fowain,
odocob age dahinigana dah moqaganqa
qee fogo adeiaun.
(Aisaia 6.9)

Eunu age galolo jena je cunug dah megina,” aden.

Dana aig cabina helennu galolo je uqana gug

(Matju 13.18-23; Mak 4.13-20)

11 Jisas je haun maaden, “Galolo je i uqana gug eu odi. Aig eu Anutna me je. 12 Aig eu jicna tonena eu odiwe dana age Anutna je dah mecebil Seten humei age wawaga meleeceb Anut cahahaadecdainnu uqa je dana waugna tonen eu cedadi len. 13 Aig eu maha meen baibacana tonen eu odiwe dana age Anutna je dah mimeig wawaga ceelecca je eu ogina. Euqa age aig bebeig qee mel. Age saen nag odi himec wawaga meleeceb temadec saen hocob toni aqena. 14 Aig dud geuna tonennu madiga eu odiwe dana age je dah megina, euqa age mahana bibileig mahana bilecnu jaen aqecca, maha cehewan ocnuca, amaga qocnu cetehca eu wawagana humei Anutna je cilehdocob agena aig qee wal megina. 15 Aig mulu mahana tonennu madiga eu odiwe dana age Anutna je dah mimeig u hewi daugdu wawaga tutuc mecana mimeig gagadic tatawi aig qogina,” aden.

Gowoc halna jahuldoc galolo je

(Mak 4.21-25)

16 Jisas je haun maaden, “Oso gowoc madacdumei hal dunuh qee tacena, odocob cabal bisalu qee mena. Euqa uqa gowoc ohisna caqusena. Eunu dana cunug age hamol hogina eu age gowoc camas foqagan. 17 Ge, cel ceteh oso jahunecna nijia eu hibna camasna ahu moqagan. Odocob cel ceteh dana age jahuldoin nijia eu hibna dana cunug fimeig doqagan,” aden.

18 “Ge, oso uqa docca nijia eu Anut uqa haun utigian. Euqa oso uqa docca qee eu uqa ija docca cisdona eudihha Anut uqa cawaldugian. Eunu age adi dah megina eunu batut cisdoigale,” aden.

Jisas anag waliagulca age Jisas fecnu hoin

(Matju 12.46-50; Mak 3.31-35)

19 Odocob Jisas anag waliagulca age Jisas fecnu hoin qa dana cajaca geh bahic talildoin. Eunu age uqaca lecnu ihoc qee. 20 Odocob dana oso Jisas madon, “Hina anin walinelca hoiga. Age mecihuqagannu maha gumu taweiga,” don.

21 Odocob Jisas dana cunug maadi maden, “Eu age Anutna je dah mimeig toodu odogina eundec eu ija au walielca,” aden.

Jisas fufu ben madocob tilien

(Matju 8.23-27; Mak 4.35-41)

22 Odocob deel osona Jisas uqana malogomca wag tobimeig bibili bileig maaden, “Gec, hoiga. Wa gad cagoc leti naha isec loqale,” aden. Eunu age wagna naha isecnu leti belein. 23 Age wa gad cagoc gemo lelegin Jisas us nijen. Odocob gugula ben wa gad cagocna neceb fufu gagadic bahic fulududu macas qahi wag dunuh nuaden. Wag eu wa cali bigia odon. Eu ehi li fadalec jicna maden. 24 Odocob malogom Jisasca limeig tulidudu madoin, “Ben, Ben! Ege fadalecnu odoqona!” doin.

Odocob Jisas cajimei fufu gagadic wa hilidoc gagadic qaqahen cahacaadi je maadeceb qee mimeig tiliec bahic nijen. 25 Odimei malogom maaden, “Agena wawaga meleec eu ai?” aden.

Euqa age dumanaga culeceb cucuiein. Odocob age tumatumai madocobmadocobeeig madein, “I cel dana? Uqa fufuca wa qahecca euha maaleceb uqa co toodu odosina!” ein.

Jisas dana uqa buga me qee matica eu me muden

(Matju 8.28-34; Mak 5.1-20)

26 Odocob age wagna nui Gerasa agena hatuna calein. Eu Galili wa gad cagoc naha isec. 27 Odocob Jisas wagnadec mahana toneceb dana oso taun bennadec buga me qee age hewudein uqa Jisas gulucdon. Uqa bical saen cecelac bahic coboloi. Odocob uqa jobon qee biloloi qa uqa qalqal hatinna niji u coboloi. 28 Saen geh bahic buga me qee eu uqa gagadic hewoloi. Euqa Gegesa dana age uqa cofdu cuhadocnu eben jaihca senna qagecebil nijoloi qa uqa sen cagocob buga me qee eu cisdoc ihulahaldutumei odudeceb wadauna nuoloi. Eunu Jisas uqa buga me qee uqa dana dewegnadec nuuga ec madon. Odocob saen uqa Jisas fimei gagadic euimei uqa olana toni mahuli nijimei jejeg u suli u madon, “Jisas, Anut Ohis Bahic Melah! Hina ija cel oditegan? Ija ninihigina, ija deweni cain dain tec itigaun!” don.

30 Odocob Jisas sisildon, “Hina ijain in?” don.

Odocob buga me qee mati bahic uqa dewegna lein eunu uqa jejeg hewi madon, “Ija ijani ‘Mati,’” don. 31 Odocob buga me qee Jisas ititacadeceb maha heel ben eu dunuh bahic non gugca qee euna cain belowainnu ninidoin.

32 Aria, aluh qeihna onoca qee ho am ben oso sab jiji coboin. Odocob buga me qee culadeceb ho dewenegana loqagannu Jisas ninidoin. Odocob Jisas cois aden. 33 Odocob dana eu cuculdeig ho dewenegana lein. Odocobil ho cunugca aluh qeihqeih guguli nu Galili wa gad cagoc dunuh gotoimeig cunugca odi wa jimeig cal mein.

34 Odocobil dana ho cofadoloig eu age eu caleceb fimeig busali limeig taunca, jobonca, cabinaca dana cajaca maaadi coboin. 35 Odocobil dana cajaca cunug je eu dah mimeig age eu feqan imeig belein. Age Jisasca humeig dana dewegnadec buga me qee ititacdon eu Jisas jaihna bibilen fein. Uqa lotoc tacecca, dana cisdoc meca bibilen fimeig cucuiein. 36 Dana age amagana fein eundec dana uqa buga me qee hewudein eu Jisas adi dewegnadec buga me qee ititacadeceb dana qila me men bilen eunu dana cajaca hoin saadein. 37 Odocob dana cajaca Gegesa agena mahanadec cunug age cucui bahic ein eunu Jisas cuculadi nuigiannu ninidoin. Eunu Jisas wag tobocob cuculadi ceseli belein. 38 Dana buga me qeeca Jisas ititacduton eu Jisas ninidudu madon, “Cultecem hinaca belowa!” don.

Euqa Jisas madudu madon, 39 “Hina hinana gunna nuimeg Anut me mihianu saadaga,” dodoi suldocob nuen.

Dana eu taun ben cunug ono Jisas me mudennu cunug maaadi nuen.

Jairas uqa Jisas cesuldocnu madon

(Matju 9.18-19; Mak 5.21-24)

40 Saen Jisas wa gad cagoc naha isecnu leceb dana am age uqa sumudi bilein. Eunu wawaga ceelecca ehudein. 41 Oodogin Juda agena cuha jo ilo oso, ijan Jairas, humei uqa ateg osol bahic uqana cabi gel 12-pela eu uqa cal migia odonnu uqa Jisas jaihna toni mahulimei uqana jona belowasannu ninidon.

Caja oso uqa Jisasna lotoc heweceb me muden

(Matju 9.20-25; Mak 5.25-34)

Jisas uqaca cocobi lelesin dana cajaca geh bahic age Jisas alildudu gesacgesac belein. 43 Jisas cocobi lelen caja oso ono cabi gel 12-pela golac nenen odi hewi coboloi euqa dana oso qee me mudel ^{▼▼(8.43)Grik jaqec je hilah leihna age je oso tubdu jaqein eu odi: Uqa uqana meen qaig cunug dana uqana hag me mudituqaga bili adoloi. Uqa uqana ceteteh cunug qee muden.} 44 eu uqa dana cajaca cegulec gemo limei Jisas hibilohu isec ben. Odimei Jisasna lotoc bibig qududon. Odocob uqa golac noloi eu gatidon. 45 Odocob Jisas sisilaadi maaden, “Info qudutia?” en.

Cunug ija qee ija qee ein. Odocob Pita madon, ^{▼▼(8.45)Grik jaqec je hilah leihna age je fil jaqein eu odi: Pita age uqaca tawein ageca madoin} “O Ben, dana cajaca kitim bahic hina talilheiga taweiga hina cemeincemein legina,” don.

46 Euqa Jisas maden, “Ija gagadic odoc oso deweg cuculdi nueceb tebanduga eunu oso ija qudutia,” en. 47 Caja eu uqa ceteh odon camasac meia eu dumei uqa deweg qeleli Jisasca timei jaihna toni mahulimei nijen. Odimei dana cajaca cunug amagana uqa eetanu Jisas qududoia, odocob uqa mahuc bahic hag medoia eu saaden. 48 Odocob Jisas madon, “Ateni, hina wawin meleec eu me mihia. Wawin malolca nuugale,” don.

Jisas uqa Jairas ateg cal mecnadec tulidocob cajen

(Matju 9.23-26; Mak 5.35-43)

49 Jisas uqa caja je i madodon dana oso Juda agena cuha jo ilona jonadec humei Jairas madon, “Hina aten cal meia. Iwalgec mulug cabi haun cain utugaun,” don.

50 Euqa Jisas dah mimei Jairas madon, “Cain cucuiagaun. Hina dih wawin meleeiale. Odocob aten haun me migian,” don.

51 Odocob Jisas uqa Jairasna jona limei osoca qee culdeceb uqa Pita Jon Jemsca himec, odocob mel aid eu memeg anagca gami hamol lein. 52 Dana cajaca cunug ono cegulein eu age mel aid eunu qada qaqajeig sogoi bilein. Jisas maaden, “Mel aid i qee cal mel. Uqa us nijia! Cain qajowain,” aden.

53 Odocob age mel aid cal meia eu doinnu age asaldoin. 54 Euqa Jisas eben u hewimei utai madudu madon, “Mel aid, cajaga!” don. 55 Uqana cebac bilec kis ceseleceb mahuc bahic cajen. Odocob Jisas sab oso utecebil jigiannu maaden. 56 Mel aid eu memeg anagca tumatumaesin euqa Jisas ceteh odi calen eunu oso cain madowasinnu cahacalen.