‏ Mark 4

Jisas dana oso wit aig cabina helennu galolo je maden

(Matju 13.1-9; Luk 8.4-8)

1Jisas haun Galili wa gad cagocna dana cajaca je iwaladi maaden. Dana cajaca age mati bahic uqaca humeig talildu cegulein. Eunu uqa wag oso tobi wag macas tatacan ninijen uqa euna bilen. Bibilen dana cajaca cunug age wa cagoc lanna tawein. 2Tatawegin uqa je mati galolo jena iwaladi maaden.

Uqa iwaladec je oso maaden, 3“Dah meiga! Dana oso uqana cabina wit aig helecnu nuen. 4Uqa aig hehelen aig osooso jic cobocna tonen. Odocob man fululec age humeig cedi ji hedoin. 5Aig osooso maha eu meen baibaca maha meca qee euna tonen. Maha eu dunuh qee nol eunu aig eu mahuc qala qahimei nag wasen. 6Odocob cam gagadic taweceb eu cijaden. Odocob bebeig dunuh qee nol eunu qala jajawalen. 7Aig osooso dud geuna tonen. Dud eu mahuc caji ben mimei ceteh cilehdocobil mahulimei aig qee qol. 8Aig osooso eu mulu mahana tonen. Odocob qala qahimei ben mi aig qon. Aig oso qoc 30 ihoc len, osooso 60 ihoc len, osooso 100 ihoc len,” 9odi maadimei maaden, “Oso dah mecnu dahigca je eu dah meiale,” aden.

Jisas uqa eetanu galolo jena madena eu malogom sildiaden

(Matju 13.10-17; Luk 8.9-10)

10Odocob dana cajaca mati bahic age buudu beladi hedocobil Jisas uqa cuhanuc bilen saen euna dana age Jisas gami coboinca uqana malogomca age uqana galolo je sildiadecnu sisildoin. 11Odocobil uqa maaden, “Anut culadeceb age Anutna culnu ceteteh jahunec docnu nijia. Euqa dana cajaca age Anutna cul dunuh qee bilec age hahagum bilegina eu age galolo jena je cunug dah megina. 12Eunu

‘age tului falicdocobil Anut agena silail cagasiadeiaunnu age amagana mele feginaqa
qee fogo adena,
odimeig age dahinigana mele dah meginaqa
qee dogina,’ en,” aden.
(Aisaia 6.9-10)

Jisas wit aignu galolo je gug sildiaden

(Matju 13.18-23; Luk 8.11-15)

13Odimei Jisas maaden, “Age galolo je ina gugnu qee fogo adenafo? Qeefi, age galolo je osooso cunug adi fogo adigian? 14Aig helecnu dana eu uqa Anutna je aig helena. 15Aig eu jicna tonena eu odiwe dana age Anutna je dah mecebil Seten mahuc humei je dana waugna tonen eu cedadi len. 16Aig eu maha meen baibacana tonena eu odiwe dana age Anutna je dah mimeig wawaga ceelecca je eu mahuc ogina. 17Euqa agedodoc bebeigca qee. Age saen nag himec culumen gahidogina. Odocob Anutna jenu aqati tootooadecca temadecca ageca hocob mahuc wawaga meleec tonena. 18Aig eu dud geuna tonena eu odiwe dana age Anutna je dah mecebil 19euqa maha bilecnu jaen aqecca, maha cehewan ocnuca, ceteh filfil ocnuca waug madec eu wawagana humei Anutna je cilehdocob aig qee qogina. 20Euqa aig mulu mahana tonena eu odiwe dana age Anutna je dah mimeig u hewi daugdu aig qogina. Eundec leih age aig qoc 30 ihoc legina, leih age aig qoc 60 ihoc legina, leih age aig qoc 100 ihoc legina,” aden.

Dana age gowoc halna qee jahunegina

(Luk 8.16-18)

21Jisas je tubdu uqana malogom maaden, “Cel ceteh jahunecna nijia eu hibna camasac moqagan. Odocob cel ceteh dana age jahuldoin nijia eu hibna dana cunug foqagan. Eunu oso gowoc umei jo dunuh limei hal dunuh qee tacena, odimei uqa cabal bisalu qee jahunina. Euqa uqa gowoc ohisna caqusena. 23Dana oso dah mecnu dahigcafi je i dah meiale!” aden.

24Uqa je haun maaden, “Oso uqa docca nijia eu Anut uqa haun utigian. Euqa oso uqa docca qee eu Anut uqa uqana doc nag nijia eu cawaldugian. Eunu cel je dah megina eunu batut cisdoigale! Age dana cajaca gesili ganic dogina, gesiladec eu odi himec Anut ameg age wadacadigian. Odocob Anut uqa ceteh haun adigian,” aden.

Qala qahi cajenanu galolo je

26Jisas je haun maaden, “Anutna cul eu odiwe dana oso aig uqana cabina helena. 27Uqa witic us nijina. Cahineg eu cajimei cabi ona. Odocob saen cunug qala qahi bibi bili cajena. Euqa uqa adi qala qahi cajena eu qee dona. 28Maha uqadodoc qala qahi bibi bili suldocob ben mi wasena. Casac bagac wasena, odocob bobog qona. Odocob bobog eu li aig ibuldona. Odocob euna aig qona. 29Aig wal meceb aig cedi haudocnu saen wele calennu dana eu uqa mahuc qetena,” aden.

Mastet aignu galolo je

(Matju 13.31-32; Luk 13.18-19)

30Jisas je haun maaden, “Ege Anutna cul eu cel ceteh cinigwe eqan? Cel galolo jena uqana gugnu sildeqan? 31Anutna cul eu mastet aig cinigwe. Aig eu dana mahana cehena saen euna eu nag bahic, eu mahana aig cunug wooladena. 32Euqa dana ceheceb aig eu wasi ben mimei eu gulgulec caji tawena, eu cehelo cunug wooladena. Eu batac meca helena. Eunu man fululec limeig agena teic salafu euna mudegina,” aden.

Jisas galolo jena himec maaden

(Matju 13.34-35)

33Jisas uqa dana cajaca Anutna je maaden saen euna uqa galolo jena mati maaden. Dana cajaca age dah mimeig ocnu ihoc eundec doin. 34Uqa galolo jena himec maaden. Euqa uqa uqana malogom gami cuhanuc bilec saenna uqa je cunug sildiaden.

Jisas madeceb fufu ben tilien

(Matju 8.23-27; Luk 8.22-25)

35Deel euna dih wesu meceb Jisas uqana malogom maaden, “Gec, hoiga. Wa gad cagoc leti naha isec loqale,” aden. 36Odocob age dana cajaca am eu culadein. Odimeig Jisasna malogom wag tobein. Jisas uqa wele dunuh bibilen age odidih ehudi belein. Wag leihha age gami belein. 37Odocob gugula ben caleceb fufu gagadic bahic fulududu macas qahi wag dunuh nuaden. Wag eu wa cali bigia odon. 38Jisasqa uqa wag bigna ilo hetahet men us ninijen uqana malogom tulidumeig madoin, “Iwalgec, hina ege nag odi fadalecnu ec qee cisdolomfo?” doin. 39Jisas cajimei fufu cahacdu madon. Odimei macas madon, “Malol biliga! Tiliaga!” don. Odocob fufu qee meceb macas tiliec bahic nijen. 40Odocob Jisas uqana malogom maaden, “Age eetanu cucuiegina? Age wawaga meleecca qeefo?” aden. 41Odocob age cumun bahic ein. Odimeig age madocobmadocobeeig madein, “I cel dana? Uqa fufuca macas qahecca uqa co toodu odosina!” ein.