Mar 7 | AEY | STEP | Saen euna Farisica loo je iwaladec leihca Jerusalemdec humeig Jisasca cegulein.

‏ Mark 7

Anutna loo je Farisi agena loo je wooldon

(Matju 15.1-9)

1 Saen euna Farisica loo je iwaladec leihca Jerusalemdec humeig Jisasca cegulein. 2 Farisica Juda dana cunugca age jajanagail agena kobol toodu ebenega casac cusimeig sab jeginanu. Age ebenega qee cusec sab qee jeginanu. Odimeig age idadec cudunna limeig ceseli hu saen euna age ebenega qee cusifeig qee jegina. Juda age kobol geh bahic ha toodu odoginanu. Eu odi age gabin cusegina, hal cusegina, boh bronsna mudec cusegina. ^{▼▼(7.2-4)Grik jaqec je hilah leihna age je oso tubdu jaqein eu odi: Cabal cusegina.} Odocob Farisica loo je iwaladecca age Jisas uqana malogom leih age ebenega gegehin wa qee cusec sab jejegin fein. ^{▼▼(7.2-4)Age je Matju 15.2na nijia eu feiga.} 5 Odimeig age Jisas sisildoin, “Eetanu hinana malogom kobol ege jajanigeil iwalgein eu qee toodu odogina qa ebenega gegehinca sab jegina?” doin. 6 Odocob Jisas jejenega hewi maaden, “Je hahun madec dana, Aisaia, uqa age me hihili coboc dananu mele bahic madi maden. Uqana je odi jaqen:

‘Dana cajaca i age conogana binani sulegina
age wawagaqa eu qisactec bilina.
7 Eu age dana agena loo je iwaladegina eu Anutna loo je, egina.
Eunu age ijanu gauc cuha fegina,’ en.
(Aisaia 29.13)

8 Anut uqa age odi odoiga ec gagadic maaden eu qisacdu bilimeig dana iwaladec gagadic hewegina,” aden.

9 Jisas je haun maaden, “Moses maden:

‘Hina anin memenca lalan malagale,’ en
(Kisim Bek 20.12; Loo 5.16)

Odocob Mosesha maden:

‘Oso memegfo, anagfo geuldecnu je madecebfi uqa cal migian,’ en.
(Kisim Bek 21.17; Wok Pris 20.9)

Ageqa madegina, ‘Dana oso uqa anag memegca cesulalecnu cetehcafi euqa uqa maalena, “Ceteh i ija alecnu ihoc eu, ‘Koban,’ ^{▼▼(7.9-13)Koban eu Aram je. Uqana gug eu “ija Anut utigen.”} ija Anut utigennu wele qagu abes mem,” alena dana eu uqa anag memegca nag oso cesulalecnu cain odoiaun,’ egina. Eunu age kobol jajanagail oin eu odi toodu odoginana Anutna je cilehdogina. Agena kobolha dana leih haun iwaladegina. Age odoc eundec matiha odi odogina. Odimeig age dana agena iwaladec eu toodu odoqagannu age Anut je gagadic maaden eu culegina eu me bahic ec cisdogina!” aden.

Jisas uqa ceteteh dana gegehinca mudina eunu maden

(Matju 15.10-20)

14 Odimei Jisas uqa dana cajaca utaadeceb hocobil maaden, “Ija dah miteiga. Cunugca du cuhadoigale. 15 Ceteh oso dana hibilohu bilina eu dana dunuh limei gegehin qee mudina. Euqa ceteteh dana waug dunuhnadec cali hona eu dana gegehin mudina. [Dana oso dahigcafi je i dah meiale!]” aden.

17 Odimei uqa dana cajaca culadi jo hamol leceb uqana malogom age uqana galolo jenu sisildoin. 18 Odocobil Jisas maaden, “Ageha wawaga qee fogo donafo? Ceteh cunug dana hibilohudec dana dunuh limei eu uqa cul dunuh qee lena qa uqa waug big anag dunuh limei dana bahu nuecna cali hona. Eunu ceteh eu dana gegehin qee mudina eu qee feginafo?” aden. Eunu je euna Jisas uqa Anut amegna sab cunug jecnu soidoc nijia ec maden. 20 Odimei je haun maaden, “Ceteh dana dunuhdec cali hona eu dana gegehin mudina. 21 Ge, dana waug dunuhnadec ceteh gegehinca cali hona eu odi, cisdoc me qeeca, wal kobol odocca, heje occa, dana qocca, dana osona caja occa, 22 ameg qocob ceteh occa, qisol mecca, uhulec jeca, wal kobol majagca qee odocca, um qoc madecca, deboi cobocca, osona ceteh feceb gale docca, gad odocca eu cali hona. 23 Odoc me qee eu cunug dana wawaga dunuhdec cali hona, odocob age dana gegehin mudadegina,” aden.

Caja Finisiadec uqa Jisasnu waug meleen

(Matju 15.21-28)

24 Odocob Jisas cali humei hatu eu culimei Taia Saidonca alena hatuna nui bilen. Odimei uqa jo oso dunuh hamol li bilen. Dana uqa ono bilia eu cain dowainnu gale don qa uqa jahuni bilecwe qee. 25 Euqa mahuc caja oso uqa ateg buga me qeeca uqa Jisas bilennu dumei uqa Jisasca humei jaihna toni mahulen. 26 Caja eu Juda qee, uqa anag Finisia hatu ono basen. Siria age Finisia cofdoin. Odimei uqa Jisas buga me qee ateg deweg bilen eu ititacdocnu ninidon. 27 Odocob Jisas madon, “Mel agena sab cedi qa heliadec eu kobol me qee. Eunu ege mel casac sab adoqona,” don. ^{▼▼(7.27)Juda sihul eu mel. Juda dana qee eundec age qa. Age je Matju 15.26na nijia eu feiga.} 28 Odocob caja jejeg hewi madon, “Mele Tibud, euqa mel sab jejegin jecefanaga golodocob qa age cabal bisalu bilegina eu hu cedicedi jegina eu odi qeefo?” don. 29 Odocob Jisas caja madon, “Hina je me bahic wadacdutaga. Eunu gad ceseli nuugale. Buga me qee hina aten culdi qisacdoia eu fegan!” don. 30 Odocob caja jobon ceselimei uqa ateg cabalna us ninijen fen, buga me qee wele cuculdi qisacdon.

Jisas dana oso uqa dahig coca cufa qoc me muden

31 Jisas uqa Taia agena hatu culimei uqa Saidon taun isec hu jobon 10-pela agena hatuha gemona cocobi Galili wa gad cagocna ceseli hon. 32 Ono hon bibilen age dana oso ehudi uqaca hoin. Dana eu uqa dahig coca cufa qoc, je madecwe qee. Age Jisasca humeig ninidudu madoin, “Hina eben uqa dewegna magale,” doin. 33 Odocob Jisas uqa dana eu ehudi filecna ehi li muden. Jisas dana euca dih bibilesi uqa eben gic dana dahigna mimei ebenha sahalic qumei dana beilah qududon. 34 Odimei uqa tatiimei hooli maden, “Effata,” ^{▼▼(7.34)Je madec i Aram je, eu Jisas uqana je madec gug bahic.} en. Je eu uqana gug eu “Fogo heia,” en. 35 Jisas odi madeceb dana eu dahig fogo don. Uqa beilah qagecwe bilen eu filihicdocob uqa je tutuc maden. 36 Jisas uqa oduden eu dana oso sadowainnu cahacaden. Jisas je eu saadecnu gagadic bahic cahacaden, euqa age feei dana cunug doqagannu saadi coboin. 37 Odocobil dana cajaca age je eu dah mimeig ben bahic tumatumai madein, “Uqa ceteteh cunug me odoin. Ge, dahiniga cufa qoc coboin eu uqa odocob dah megina! Conoga cufa qoc eu uqa odocob je madegina!” ein.