Mat 14 | AEY | STEP | Saen euna gabman dana ben Herod Galili hatu cunug cofdoc uqa Jisasna odocnu hutan don.

‏ Matthew 14

Herod uqa Jisasnu uqa Wa Joadec Jon ec cisdon

(Mak 6.14-29; Luk 3.19-20; 9.7-9)

1 Saen euna gabman dana ben Herod ^{▼▼(14.1)Herod i uqa ijan fil osoca, eu Antipas. Uqa Galili hatu cofdon. Uqa King Herod uqa Maria Jisas basecdon saenna king bilen eu uqa melah. Age Matju 2 feiga.} Galili hatu cunug cofdoc uqa Jisasna odocnu hutan don. 2 Dumei uqana cabi dana eundec maaden, “Dana i uqa Wa Joadec Jon. Uqa cal mecnadec ceseli cajen eunu kobolkobol odocnu gagadic odocca odona,” aden.

3 Ge, wele Herod uqa waliag Filip aideg, Herodias, on. Odocob Jon uqa li Herod madon, “Hina walien aideg om eu tutuc qee,” don. Eunu Herod uqana han dana suladeceb age li Jon hewi libimeig gihacdoc jona mudein. 5 Herod uqa Jon qocob cal mecnu waug nijen euqa dana cajaca age Jonnu madi, uqa je hahun madec dana, einnu uqa dana cajacanu cucuien.

6 Herod uqa anag basen deelnu dana mati bahic cegulein. Age ceeli bibili sab jejegin Herodias ateg, eu dana osonadec, uqa hu dana amagana due duen. Oodon eu Herod gale docob 7 uqa je cagoc madon, “Anut amegna mahigina, cel cetehnu matecemfi ihigen,” don. 8 Odocob anag uqa ateg madocob toodu uqa Herod madon, “Hina qila bahic Wa Joadec Jon ilo bohna mimeg ahutaga!” don.

9 Mel aid odi madocob Herod uqa waloc don. Euqa Anut amegna je cagoc madigina cetehnu matecem ihigen don eunuca, dana hoin bibili dah mein eunuca cisdumei 10 uqa han dana suladeceb age gihacdoc jona limeig Jon be cagoin. 11 Cagumeig ahu bohna mi mel aid utecebil mel aid uqa anag ehi liton. 12 Odocob Jonna malogom age humeig Jon deweg loton ehi li heel cisein. Odimeig age li je cunug Jisas sadoin.

Jisas uqa dana 5,000 sab aden

(Mak 6.31-44; Luk 9.10-17; Jon 6.1-13)

13 Jisas uqa je eu dumei jobon eu culimei wagna tobimei wa gad cagoc leti uqa cuhanuc cudun ono isec nuen. Euqa dana cajaca jobonjobon bilegina eu age Jisas wa gad cagoc leti nuia ec dumeig age toodu jaimagana belein. 14 Odimei uqa lanna tonimei dana cajaca am ben tatawegin feciaden. Uqa agenu waug qocob agena hagca me maden.

15 Witicna uqana malogom uqaca humeig madoin, “Aben i filec cagocna bahic, cam wele noia tu mena. Eunu dana cajaca am i age jobonnana belimeig agedodoc sab jecnu fajoqagannu suladaga,” doin. 16 Euqa Jisas malogom maaden, “Eetanu age beloqagan? Age dana cajaca sab adeiga,” aden. 17 Odocob age jejeg hewi madoin, “Ege bred 5-pela cul dool lecisca himec hewoqa,” doin. ^{▼▼(14.17)Bred eu Juda mudoloig eu ben qee, eu foloec. Bred 5-pela eu dana lecis himec jecnu ihoc.} 18 Odocobil Jisas maaden, “Bred cul doolca cedimeig ahuteiga,” aden.

19 Odimei Jisas uqa dana cajaca maadeceb age gigina bilein. Odimei Jisas bred 5-pela cul dool lecisca cedi hewimei sao jobon tatiimei Anut hetaga doc je madon. Odimei bred fenifeni uqana malogom adeceb dana cajaca siwiadecebil jein. 20 Age cunug jecebil ihoc leceb malogom age sab jecefanaga eundec galel 12-pela tacecebil am ben. 21 Dana sab jein eu 5,000, cajaca melca qee sanijelein.

Jisas Galili wa tatacan cobon

(Mak 6.45-52; Jon 6.16-21)

22 Odocob Jisas uqana malogom cesusadeceb age wagna tobimeig age aqunitu Galili wa gad cagoc naha isec beloqagannu belein. Bebelegin uqa dana caja amam qaqacitegin cofaden. 23 Uqa dana cajaca qaciti hedocobil uqa cuhanuc Anut inondudu bilecnu aluh guhidocna ten. Witic memen uqa ono cuhanuc bilen. 24 Euqa saen euna malogom age wagna bebeleig age lan onoca bahic basai coboin. Odocob fufu ben olanagana isec honnu macas ben bahic caji qahen. 25 Odocob walag danigia oodon Jisas uqa wa tatacan cocobi ageca len. 26 Euqa malogom age uqa macasna cocobon fimeig qeleli filiciti madein, “Dol oso cobona,” imeig cucuii euein. 27 Odi odocobil Jisas mahuc maaden, “Ija ihen. Age cain cucuiuwain! Age wawaga toogdoiale!” aden.

28 Pita je eu dumei uqa Jisas jejeg hewi madon, “Tibud, hinafi matecem ija toni wa tatacan hinaca ligen,” don. 29 Odocob Jisas madon, “Cois hogale,” don. Odocob Pita uqa wagnadec tonimei wa tatacan cocobi Jisasca ligian odon. 30 Uqaqa fufu ben wawasen fimei cucuiimei gotoigia odon. Odi oodi eui Jisas madon, “Tibud, cahahatagale,” don.

31 Odocob Jisas uqa mahuc eben heli Pita hewimei madon, “Hina dana waug meleec nagca. Eetanu wawin lecisca meia?” don. 32 Ale lecis wagna tobi tecebil bibilegin fufu tilien. 33 Dana age wagna bibileig Jisas olana gob cecehi uqanu cuha fimeig madoin, “Hina mele Anut Melah,” doin.

Jisas dana cajaca geh bahic Genesaret hatuna me maden

(Mak 6.53-56)

34 Age wa gad cagoc leti hu Genesaret hatuna hoin. 35 Age wag tobocobil dana onodec age Jisas wele fein eunu doin. Odimeig age hatu cunugna je suldocobil age dana caja hagca cunug ehadimeig Jisasca ahoin. 36 Odimeig agena hag me madigiannu ninidoin. Age uqana lotoc bibig himec qududocnu ninidoin. Odocob cunug age uqana lotoc qududoin eu me mein.