Mat 15 | AEY | STEP | Saen euna Farisica loo je iwaladec leihca Jerusalemdec Jisasca humeig sisildu madoin,

‏ Matthew 15

Anutna loo je eu Juda jajanagail agena loo je wooldona

(Mak 7.1-13)

1 Saen euna Farisica loo je iwaladec leihca Jerusalemdec Jisasca humeig sisildu madoin, 2 “Hinana malogom age ebenega qee wasacudec sab jegina. Eunu eetanu ege jajanigeil loo je igein eu tefacdogina?” doin. ^{▼▼(15.2)Malogom age ebenega eu gegehin bahic qee age sab jein. Juda age ceteh oso eu Anut amegna gegehin nijen eu hewimeig ageha Anut amegna gegehinca calowainnu cucuiein. Eunu Farisica Juda dana cunugca age jajanagail agena kobol toodu ebenega casac cusimeig sab joloig. Age ebenega qee cusec sab qee joloig.}

3 Odocobil Jisas jejenega hewi maaden, “Age eetanu jajanagail agena loo je saolal mumudi Anutna loo je gagadicca eu tefacdogina? 4 Ge, Anut je gatiti maden:

‘Hina memen aninca lalan malagale,’ en.
(Kisim Bek 20.12; Loo 5.16)

‘Oso memegfo, anagfo geuldecnu je madecebfi uqa cal migian,’ en.
(Kisim Bek 21.17; Wok Pris 20.9)

5 Ageqa madegina, ‘Oso uqa memegfo, anagfo cesuldocnu meen qaig nijecebfi uqa maalena, “Ija cesulalecnu ceteh nijen eu Anut utigennu abes mem,” alena,’ egina. 6 Odocob dana eu uqa memeg lalan mudecnu qee nijel. Age eu odi madecna agena loo je saolal mumudi Anutna loo je cilehdudu tefacdogina,” aden.

7 “Me hihili coboc age! Je hahun madec dana, Aisaia, uqa agenu je tutuc bahic wele madi maden:

8 ‘Dana cajaca i age conogana binani sulegina
age wawagaqa eu qisactec bilina.
9 Eu age dana agena loo je iwalaadegina eu Anutna loo je, egina.
Eunu age ijanu gauc cuha fegina,’ en,” aden.
(Aisaia 29.13)

Jisas uqa ceteh dana gegehin mudina eunu maden

(Mak 7.14-23)

10 Odimei Jisas uqa dana cajaca utaadeceb hocobil maaden, “Je i dah mimeig du cuhadoigale. 11 Ceteh cona lena eu dana gegehin qee mudina. Ceteh conadec cali hona eu dana gegehin mudina,” aden.

12 Odocob malogom age Jisasca li madoin, “Hina Farisi je maadecem dumeig age hinana jenu gemanaga ben eu dogonafo?” doin.

13 Odi madocobil Jisas jejenega hewi maaden, “Na cunug ija Mei sao jobon bilia uqa qee cehel eu age caji loqagan. 14 Age dana eundec culadeigale. Farisi age amaga galuc mec, age cotogail ha amaga galuc mec iwaladi ehadi cobogina. Dana ameg galuc mec eu cotig ameg galuc mec iwaldu ehudi cobocobfi ale lecis odi helona toni aqaligian,” aden.

15 Euqa Pita Jisas madudu madon, “Galolo je maadem eu sildigagale,” don. 16 Odocob Jisas maaden, “Ageha wawaga qee fogo dol eu adi? Dana waugnadec cisdoc qisol mec cali hona. Dana qocca, dana osona caja occa, wal kobol odocca, heje occa, um qoc madecca, lelanadecca eu dana waugnadec cali hona. Ceteh eu dana gegehin mudina. Euqa ebenega qee wasacudec sab jec euna dana qee gegehin mudina. Eunu ceteh cunug cona lena eu bigna nocob big ititacdocob bahu helegina eu qee feginafo? Euqa conadec cali hona eu waugnadec cali beceb eu dana gegehin mudina,” aden.

Kenandec caja uqa Jisasnu waug meleen

(Mak 7.24-30)

21 Jisas uqa cudun eu culimei li Taia Saidonca alena hatuna nui bilen. 22 Ono Kenan caja oso hatu eunadec hu Jisas utadu madon, “O Tibud, Dewid Melah, hina ijanu walol heiale. Buga me qee eu ija ateni hewen me qee odudina,” don. 23 Odonqa Jisas uqa jejeg qee hewel. Uqa je oso qee madol. Odocob malogom age Jisasca li ninidudu madoin, “Caja uqa ege tootoogigi utaena. Eunu madocom cuculgi nuiale,” doin.

24 Odi madocobil Jisas maaden, “Isrel sihul sipsip fadalec cobogina cesuladecnu eunu himec Anut cabi itimei sulteceb hom,” aden. 25 Euqa caja uqa hu Jisas amegna gob cehi uqanu cuha fimei ninidudu madon, “O Tibud, cesultagale!” don. 26 Odocob Jisas uqa caja jejeg hewi madon, “Mel agena sab cawaladi qa joqagannu helec eu cois qee,” don. ^{▼▼(15.26)Jisas uqa caja i hibemdocnu qee gale dol. Euqa Isrel age Anutna dana cajaca, eunu Jisas uqa Anutna me je eu casac Isrelca leceb cunug docobil hibna dana caja fil age doqagannu gale don. Eunu Jisas uqa galolo je i maden. Isrel sihul eu mel, odocob dana caja fil age qa. Euqa Jisas uqa caja i uqana waug meleec fimei cesuldon.} 27 Odocob caja madon, “Mele Tibud, euqa qa asagul sab jejen jecefan uqana cabalnadec golodocob qa age bisalu hu cedi jegina eu odi qeefo?” don. 28 Caja odi madocob Jisas madon, “O caja, hina wawin meleec eu caunca bahic! Hina madagana eu odihia,” don. Odocob caja uqa ateg saen euna bahic hag medon.

Jisas uqa dana caja hagca mati me maden

29 Jisas onodec Galili wa gad cagocna isec humei uqa aluh osona timei ono bilen. 30 Bibilen dana cajaca mati bahic uqaca hoin. Ageha dana hagca mati bahic cedadi ahoin. Age dewenega laleg mecca, tefulunuga cogogecca, amaga galuc mecca, conoga cufa qocca, dana hag filfilca eu ehi li Jisas jaihna madecebil uqa cunug me maden. 31 Dana age conoga cufa qoc bilein eu je mamadegin, tefulunuga cogogec coboin eu me madeceb bibilegin, laleg mec nijein age caji cocobogin, amaga galuc mec bilein age mecieegin feciadein. Dana cajaca age ceteh eu fimeig tumatumaein. Odimeig age Isrel agena Anut binan sulein.

Jisas uqa dana 4,000 sab aden

(Mak 8.1-10)

32 Jisas uqana malogom utaadeceb uqaca hocobil maaden, “Dana cajaca i age qila deel cijed ija gami biluquna age sab jecnuca qee. Eunu ija agenu walol tena. Ija age sab qee adec gauc ceseli beleiga adecnu culumen tena, age jicna wenene aqeceb toni aqeiaundainnu madigina,” aden. 33 Odocob malogom age Jisas jejeg hewi madoin, “Ege ene wadauna biluqa, dana cajaca mati bahic sab adecnu bred anadec oqan?” doin. 34 Odocobil Jisas sisiladi maaden, “Age bred ganic nijia?” aden. Odocob madoin, “Bred 7-pela, cul dool nagnag euha osooso nijeiga,” doin.

35 Odocobil uqa dana cajaca maadeceb age mahana bilein. 36 Bibilegin uqa bred 7-pela cedimei cul doolha cedimei Anut hetaga dumei fenifeni malogom aden. Odocob malogom age ehi li dana cajaca siwiadecebil jein. 37 Dana cajaca cunug jecebil biniga hon. Odocob age sab jecefanaga golodoin eu mahanadec cedimeig galel 7-pela tacecebil ihoc len. 38 Dana sab jein eu 4,000, cajaca melca qee sanijelein. 39 Odocobil Jisas uqa dana cajaca maadeceb qacitein. Uqadodoc wagna tobimei nui Magadan agena hatuna li bilen.