Mat 24 | AEY | STEP | Jisas uqa tempel culimei nunuen uqana malogom uqaca humeig age tempel uqa galeca kobolkobolca cehein taweia eu ihacdocnu odoin.

‏ Matthew 24

Jisas uqa age tempel wagaloqagannu maden

(Mak 13.1-2; Luk 21.5-6)

1 Jisas uqa tempel culimei nunuen uqana malogom uqaca humeig age tempel uqa galeca kobolkobolca cehein taweia eu ihacdocnu odoin. 2 Euqa uqa maaden, “Qila age eu cunug fegina. Ija mele maadigina, meen gel ulugedocob meen oso meen oso tatacanna cilehdoc qee biliaun. Cunug wagalecebil mahana tonoqagan,” aden. ^{▼▼(24.2)Je i je cecelac 5-pela Jisas maaden buk Matjuna nijen eundec 5-peladoc. Je cecelac i 24.2-25.46na nijen. Eu ceteteh eu cit qoc deelna caloqagan eunu madena.}

Jisas uqa culumen mati caligiannu maden

(Mak 13.3-13; Luk 21.7-19)

3 Jisas uqa hibna Oliw Aluhna bibilen uqana malogom cuhanuc uqaca limeig sisildu madoin, “Aadeb eu odi odigian? ec magaga doqa. Cel gaga odocob fimeb hinana ceseli hoc saen cali hona doqan? Adi odocob fimeb mahamaha bilec saen hedugia odona ec doqan?” doin.

4 Odocob Jisas jejenega hewi maaden, “Matica age ija ijanina mamadi hoqagan, ‘Ija Krais, ija dana Anut uqana dana caja cahahaadecnu wele nesili ehuden,’ oqagan. Eu age dana cajaca mati faninadi jic ceja qocna loqagannu dado madoqagan. Eunu oso hu faninadi dado madeceb agena jic ceja qocna lowainnu batut feigale. 6 Age han cadegina ec eunuca han hugian ec eunuca je hutan doqagan. Batut feigale. Ceteh eu cunug odigian. Eunu cain filicituwain. Euqa qee migian ec madecnu qee nijel. Eu cit qoc qee. 7 Ge, dana hatuhatu age cajimeig cilehdocobcilehdocoboqagan. Odocobil dana sihulsihul age cajimeig cilehdocobcilehdocoboqagan. Sabnu cahel bilec saen ha hugian, mim ha maha filfilna nigian. 8 Eu odoc cunugqa caja mel basecnu dain donawe odi himec sanan migian,” aden.

9 “Odi odocob age dewenega tudocnu dana ebenegana madecebil eu age aqecebil cal moqagan. Mahamaha cunug agenu age ija ijani hewegina eunu age agenu gemanaga beceb sagagadoqagan. 10 Odi odocobil mati age ijanu wawaga meleec eundec wawaga lecisca meceb age ob meceb ob meceb i cobimeig sagagdocobsagagdocobi biluqagan. 11 Uhulec je hahun madec dana matica ha camas mimeig age dana cajaca mati faninadi jic ceja qocna loqagannu dado madoqagan. 12 Saen euna Anutna loo je toodu tutuc madec tonigian. Dana age loo je cilehdudu casisic odadec fulusdocob nalug mec eu dana mati wawagana daigian. 13 Euqa oso uqa waug gagadic mumudi hib cit qoc gadacna caligian eundec Anut cahahaadigian. 14 Anutna culnu me je eu mahamaha cunug qasali maadecebil ihoc lili ninijeb dana cajaca cunug dodobil hib cit qoc deel cali hugian,” aden.

Ihulahal mec ceteh bebesacca caligian

(Mak 13.14-23; Luk 21.20-24)

15 Jisas je haun maaden, “Age

‘ihulahal mec ceteh bebesacca’
(Daniel 9.27, 11.31, 12.11)

tempel gunna tataweb foqagan, je hahun madec dana, Daniel, eunu je wele maden eu camas meceb eunu batut feigale,” aden. Dana uqa je i sanijina eu uqa je uqana gug doiale. 16 “Saen euna age ceteh eu fimeig dana cajaca age Judia hatuna bilegina age busali aluhnana toboqagan. 17 Oso jo ohis tatacan bilecnu cudunna bilina uqa tonimei uqana edud cedi jo dunuh lecnu cain cisdoiaun. 18 Oso cabina bilina eu uqa uqana lotoc cecelac cedecnu jobon cain hoiaun. 19 Saen euna caja waugca coboc, caja mel sim su adegina eundec walocca bahic biluqagan! 20 Busalec deel eu duan saenca cuha deelca cali hoiaunnu Anut inondoigale. 21 Ge, saen euna culumen ben bahic hugian. Gug qoc saen maha ifanennadec hocob qila wele culumen eu odi oso qee calel. Hibna ha culumen eu odi oso haun qee caleiaun. 22 Anut saen i gohic qee mudoubmi dana cajaca cunug age fadaloub. Euqa dana cajaca Anut nesili ceden bilegina agenu saen eu gohic migian,” aden.

23 “Saen euna uhulec Kraisca uhulec je hahun madec danaca mati cali humeig age ihocfi dana cajaca Anut nesili ceden bilegina euha faninadi jic ceja qocna lecnu dado madoqagan imeig gaga filfilca kobolkobol benbenca odoqagan. Eunu oso maadecebfi, ‘Feiga, Krais ihen!’ qee, ‘Krais ono bilia!’ adecebfi wawaga cain meleeiaun. 25 Feiga, ceteh qee hoc ninijen ija ceteh eu hugiannu wele maadiga. 26 Amel faleec cam tobi becna sao ohis camas mimei iletec cam toni nocna ihoc lenawe Dana Melah uqa cali hocnu saen odi camas migian. Eunu age maadecebilfi, ‘Krais wadauna ^{▼▼(24.26-27)Age je Matju 3.1na nijia eu feiga.} bilia,’ adecebilfi age ono cain nui fowain, odocob ‘Krais hamol bilia,’ adecebilfi age wawaga cain meleeiaun,” aden.

28 “Dana cal mec deweg ganac huluec oso ninijen man fululec benben cababac cinigwe age euna ceguluqagan,” aden.

Cit qocna Dana Melah hugian

(Mak 13.24-27; Luk 21.25-28)

29 Jisas je haun maaden, “Feiga, saen euna culumen ben eu hedocob

‘cam tu meceb jagel qee fulacdoiaun.
Odocob malaqa age saonadec casili tonoqagan,
odocob saona gagadic odoc eu caji leceb hocob qeleloqagan,’” aden.
(Aisaia 13.10, 34.4)

30 “Odocob Dana Melah uqana camas mec gaga saona camas migian. Odocob dana sihunugail cunug mahana bilegina age qada qaqaji biluqagan. Age Dana Melah gagadic odocca kobolkobol benca sao taenna neneb foqagan. 31 Uqa uqana ensel taul ben fuldocca suladeceb age belimeig uqana nesili cedec bilegina eu cunug cedoqagan. Age cam tobi becnadec cedadi ehadi li cam toni nocnadec ha ehadi ahu gabandoqagan,” aden.

Age na dannu doc oqagan

(Mak 13.28-31; Luk 21.29-33)

32 Jisas je haun maaden, “Age na dan uqana odocnu cisdoigale. Uqa haun majocob age wa hoc saen qila sanan mena egina. 33 Odiwe ha age ceteh eu cunug oodob fimeig Dana Melah hugiannu taun gel jic cebecna taweia eigale. 34 Ija mele maadigina, sihul i qila bilegina ceteh qee cali hoc ninijeb qee qee meiaun. 35 Saoca mahaca qee migian euqa ijana je qee qee meiaun,” aden.

Dana oso ceteh eu cali hugiannu saen doc oso qee bilel

(Mak 13.32-37; Luk 17.26-30, 34-36)

36 Jisas je haun maaden, “Ceteh eu cali hugiannu deelca auaca oso qee dona. Ensel sao jobon ono ha qee dogina. Dana Melahha qee dona. Memige Anut himec dona. 37 Noa bilen saenna dana cajaca bileinwe Dana Melahna hoc saenna odi ha biluqagan. 38 Wa sil ben qee cajec age sab ji wain ji bibilegin dana caja ocobocobi bibilegin leceb Noa wag benna tobec deelna odi odoin, ageqa qee doloin. 39 Odocob wa sil ben cajimei dana cajaca cunug fadaladen. Eu odiwe dana cajaca ageha odi oodobil Dana Melah uqana deelna hugian. 40 Odocob saen euna dana lecis cabina biluwasan. Oso ehudi beloqagan, oso eu tacewudoqagan. 41 Caja lecis ale wit meenna ibuldudu biluwasan. Oso ehudi beloqagan, oso tacewudoqagan. 42 Age agena Tibud aadeb hugian eu age qee dogina. Eunu amaga cebac bileigale! 43 Euqa ceteh i doiga. Dana jo gug uqa heje dana aadeb hu ijana ceteteh heje ugian eu doialumi uqa us qee nijoub, cebac bibili cagucagdoub. Odimei uqa heje dana culdocob uqana jo qeih qatanimei dunuh qee loub. 44 Age Dana Melah uqa qila hugian qee ec saen euna mele hugian. Eunu age saciadoc susumudi bileigale,” aden.

Cabi dana meca cabi dana me qeecanu galolo je

(Luk 12.42-46)

45 Jisas je haun maaden, “Cel cabi dana uqa doc meca uqana cabi cofdu cuhadona? Eu oso uqa uqana meca uqana jo cofdoc muden. Uqa cabi dana cunug cofadigian. Agena sab saennana adigian. 46 Cabi dana eu saen uqana meca jobon ceseli humei odi oodob fecidumei uqa ben bahic ceeligian! 47 Ija mele maadigina, uqana meca uqana ceteh cunug cofdugiannu ebenna migian. 48 Euqa cabi dana me qee eu uqadodoc madimei, ‘Ijana meca uqana hocnu deel cecelac nijia,’ imei 49 cabi dana hijagul eu uqa aqecnu sanan mimei dana eu cedeceb osoben sab jiji wain jiji dalul aqeceb cocobil 50 meca eu hibna deel osona hugian. Eu saen cabi dana uqa hugiannu qee cisdoc saen euna hugian ec qee doc ninijeb hugian. 51 Uqana meca eu odi fimei qeti susul faligiannu ihoc bahic. Odimei cudun dana Anutnu wawaga qee meleec bileginana cabi dana me qee euna mudigian. Ono age qada qaqaji maimaga kicodudu biluqagan,” aden.