Mat 9 | AEY | STEP | Jisas uqa wagna tobimei wa gad cagoc leti hagen naha isec nuen. Odimei uqa uqana jobon calen.

‏ Matthew 9

Jisas uqa dana laleg mec oso me muden

(Mak 2.1-12; Luk 5.17-26)

1 Jisas uqa wagna tobimei wa gad cagoc leti hagen naha isec nuen. Odimei uqa uqana jobon calen. ^{▼▼(9.1)Saen euna Jisas uqana cudun eu Kapaneam. Age Matju 4.13 feiga.} 2 Odocob dana leih age dana laleg hagca oso gabagabna ninijen Jisasca hehewi ehudi ahoin. Saen Jisas agena wawaga meleec eu ben bahic fimei dana laleg eu madon, “Melami, hinana silail cagasihiga qee meia eunu wawin toogdoiale,” don.

3 Odocob loo je iwaladec dana leih age togodudu madein, “Dana eu uqa Anut cewudec je madeia,” ein.

4 Euqa Jisas uqa agena cisdoc dumei maaden, “Age wawagana cisdoc qisol je eetanu madegina? 5 Cel je madec cacanigca qee ija madigen? Ija madigen, ‘Hinana silail cagasihiga qee meia,’ ecfo, qee ‘Cajimeg coboga,’ ec madigenfo? 6 Euqa Dana Melah mahana silail cagasiadecnu gagadic odoc ebenna nijia eu doqagannu ihacadigen,” aden. Odimei uqa dana laleg hagca madon, “Cajimeg hinana gabagab eu qahimeg hewi hinana jobon nuuga,” don. 7 Odocob dana eu cajimei uqana jobon nuen. 8 Odocob dana ono cegulein age odi oodon fimeig cucuiein. Odimeig Anut uqa gagadic odoc eundec dana aden eu binan sulein.

Jisas uqa Matju utadocob toodon

(Mak 2.13-17; Luk 5.27-32)

9 Jisas uqa jobon eu culimei uqa cali li dana oso, ijan Matju, uqa takis cedec jona bibilen fen. Fimei madon, “Tootaga,” don. Odocob uqa cajimei Jisas toodu nuen.

10 Odocob hibna Jisas uqa jo euna sab jejei bilen. ^{▼▼(9.10)Dana mati age jo eu Matjuna jo ec cisdogina, euqa leih age jo eu Jisasna jo ec cisdogina.} Bibilen takis cedec danaca, silail danaca mati hocobil age Jisas uqana malogomca gami sab jein. 11 Odocob Farisi age Jisas odi oodon fimeig Jisasna malogom maadein, “Eetanu agena iwaladec uqa takis cedecca silail danaca eundec gami sab jegina?” adein. ^{▼▼(9.11)Farisi age agena loo je mati toodu odoin. Eunu age cel dana uqa loo je eu qee toodu odona dana eu uqa silail mena, odimeig uqa Anut amegna gegehinca bilina ec cisdoin. Odocob Juda dana qee eundec age dana eu gami bilecebilfi euha dana eu gegehin mudina ec cisdoin. Takis cedec dana age gaid Rom dana gami bilein. Rom age Juda dana qee eundec, age haiden dana. Eunu Farisi age Juda dana age Rom agena takis cedein eu dana gegehinca bahic Anut amegna bilein ec cisdoin.}

12 Euqa Jisas uqa je eu dumei maaden, “Hagca qee age hag me madec danaca qee legina. Qeeo. Hagca himec age hag me madec danaca legina. 13 Ija ititom dana cajaca ‘Age agena silailnu wawaga tului falicdoigale,’ ec utai maadecnu qee holom. Euqa ija silail dana cajaca ‘Age agena silailnu wawaga tului falicdoigale,’ ec utai maadecnu hom. Eunu age je i Anutna jaqec je nijia eu uqana gugnu doc eu li oiga. Je eu odi madena:

‘Ija age gauc ihantecnu qee gale tena.
Ija age dananu wawaga qocca biluqagannu gale tena,’ ena,” aden.
(Hosea 6.6)

Jisas uqa sabnu qagu bilec kobol eunu maden

(Mak 2.18-22; Luk 5.33-39)

14 Saen euna Jonna malogom age Jisasca humeig sisildoin, “Eetanu egeca Farisica ege gaid esuesu sabnu qagu biluquna qa hinana malogom eu qee sabnu qagu bilegina?” doin.

15 Odocobil Jisas maaden, “Age dana caja ocobocobecna cegulein bilegina eunu age caja oc dana eu gami bibileig adi qada qajec biluqagan? Euqa saen oso hibna dana leih hu caja oc dana cawaladecebil deel euna age sabnu qagu biluqagan,” aden.

16 “Odocob oso uqana lotoc hilah giloccanu eu eeldugia bili, uqa lotoc fan haun qee cusec tatacan qee faldona. Eu odi odoubmiqa age lotoc cusecebil fan haun eu nag meceb eu gesacna haun ceseli balahadu bendoub. Wele balahadon eu wooldu qatanoub. 17 Odiha wain haun jool mecmec ganacna mudec hilahna qee o danegina. Jool mecmec ganacna mudec hilah eu wele galalec eunu odoubmiqa wain eu jool ganacna mudec qatanoub, wain basecdu cusdoub, odocob jool ganacna mudecha qatani cusdoub. Qeeo, age wain haun jool ganacna mudec haunna o danecebil euna lecisca odi me nijuwasan,” aden. ^{▼▼(9.16-17)Juda age mecmec qumeig bilacdumeig ganacna gisimeig jool mudoloig. Age jool ganacna mudec euna wain o danoloig. Age wain haun jool mecmec ganacna mudec haun o danecebil saen cecelac nijimei wain tinca me bahic caloloi. Saen euna wain eu jool ganacna mudec didon. Odocob jool ganacna mudec eu wele galalenfi eu qatani qee men. Aria, je i galolo je. Lotoc hilahca jool mecmec ganacna mudecca eu loo je iwaladec Farisica agena iwaladec je. Wain haun eu Jisas uqana iwaladec je.}

Juda agena ilo dana uqa Jisas cesuldocnu madon

(Mak 5.22-24; Luk 8.41-42)

18 Jisas uqa odi maaaden Juda agena ilo dana oso uqa humei Jisas amegna gob cecehi uqanu cuha fimei madon, “Ija ateni qila cal meia. Euqa humeg eben dewegna mudecem uqa cebac biligian,” don. 19 Odocob Jisas cajeceb uqa uqana malogomca age ilo dana eu toodu belein.

Hagca caja oso Jisasna lotoc heweceb me muden

(Mak 5.25-34; Luk 8.43-48)

20 Jisas cocobi lelen caja oso ono cabi gel 12-pela golac nenen odi hewi coboloi eu uqa dana cajaca cegulec gemo limei Jisas hibilohu isec ben. Uqadodoc maden, “Ija uqana lotoc dih qududocominfi ija hag metigian,” en. Odimei Jisasna lotoc bibig qududon. 22 Odocob Jisas waldumei caja eu fimei madon, “Ateni, hinana wawin meleec eu me mihia eunu wawin toogdoiale,” don. Mahuc bahic caja eu hag medon.

Jisas uqa Juda agena ilo dana ateg tulidocob ceseli cajen

(Mak 5.35-43; Luk 8.49-56)

23 Odocob Jisas uqa Juda agena ilo dana uqana jona calimei uqa dana cololo fuldodogin dana cajaca age dahoc fafalegin eu fimei 24 maaden, “Mel aid i qee cal mel. Uqa us himec nijina! Isa qoiga!” aden. Odocob age asaldoin. 25 Euqa age dana cajaca ititacadecebil maha gemo lecebil Jisas uqa jo dunuh len. Odimei uqa mel aid eben u heweceb caji bilen. 26 Odocob Jisas odonnu je hatu naha isec eu cunug ihoc leceb dana cajaca doin.

Jisas uqa dana lecis amala galuc mec me malen

27 Jisas uqa cudun eu culimei nunuen dana lecis amala galuc mec ale Jisas toodu utadudu madosin, “O Dewid Melah, elenu walol heiale,” dosin. ^{▼▼(9.27)Juda dana cajaca age dana Anut uqana dana caja cahahaadecnu wele nesili ehuden eu uqa Dewidna sihuldec caligian ec doin. Dana lecis amala galuc mec i ale Jisas uqa dana i Isrel age sumudeinnu wawala meleen, eunu ale madosin, “O Dewid Melah,” dosin.} 28 Jisas uqa jona leceb dana lecis amala galuc mec ale uqaca lecebil sisilali maalen, “Ale ija odi odalecnu ihoc wawala meleenafo?” alen. Odocob madosin, “Ese Tibud, ele eunu wawile meleena,” dosin. 29 Odocobil Jisas ebenna amala qududumei maalen, “Wawala meleecna odaleia,” alen. 30 Odi maaleceb ale amala fogo docob ceteh fesin. Odocob Jisas uqa cahacali maalen, “Batut fesiale, dana oso ija odaliga eu cain sadocobil doiaun,” alen. 31 Euqa dana lecis ale hatuhatu cunug cocobi Jisas odalen je eu dana cunug saadecebil doin.

Jisas uqa dana oso co cufa qoc me muden

32 Dana lecis nunuesin age dana oso ehudi Jisasca hoin. Dana eu buga me qee hewen uqa co cufa qon. 33 Jisas uqa buga me qee eu ititacdocob dana eu cuculdi nueceb dana eu je maden. Dana cajaca age eu fimeig tumatumaimeig madein, “Uqa odona odoc odiwe dana wele Isrel gemona oso qee odocob folom,” ein. 34 Euqa Farisi age madein, “Uqa buga me qee agena ben uqana gagadic odocna buga me qee ititacadena,” ein.

Jisas uqa dana cajacanu waug qon

35 Jisas uqa jobon nagnag benbenca cocobi Juda agena cuha jona limei dana cajaca iwaladen. Uqa sao cul jobonnu me je qasali maadimei agena hag filfil aqecca dewenega laleg mein eundecca eu me maden. 36 Uqa dana cajaca meciaden. Age jaen aqecca eu oso cesuladecca qee bilein. Age sipsip cofadecca qee cobogina odiwe bilein. Eunu agenu waug qon. 37 Odimei uqana malogom maaden, “Cabina ceteh mati bahic cedi haudocnu wal men nijia, euqa cabi dana mati ceteteh cedi jo bisna mecnuca qee bilegina. 38 Eunu sab cedi haudocnu gug uqa cabi dana suladeceb sab haudocnu inondoigale,” aden.