‏ John 3

Sisas i Nikodemus i mo sihiag ahfena

1Afa mungu el heafna unehlagba Nikodemus eba Ju elni misog el. Afa ehe mingnag Godna mo anwena elim wangafena afa enaig el seflig farisi el.

2Afa sinaini ehe Sisasim nangwagim blonam sihina og, “Saglag, kagel anwenafig ne tisa God ehe nem ningihiag. Afa el Godna feg fwainigba asa ehe mas enaig kigmog ogfuni asa ne eseg.”

3Afa Sisas sihina og, “Ka nem nufunam sihinag afa el sa pese ikanam ninganai luwal fe fwainigba asa enag el mas Godna bog megam nangui.”

4Afa Nikodemus sahna og, “Haisegba asa watiaug el pese ikanam ninganai luwal fefe. Afa ehe mas afagna wula la sefunam asa pese wanigai. Afa el bigel mas enaig esi.”

5Afa Sisas pese sihina og, “Ka nem nufunam sihinag afa el asa buna afa Godna Sungwabugni ninganai luwal feg fwainigba eba ehe mas Godna bog megam sefukai.

6Afa luwal alagafagna mungu usumu la afohieg eba alagafagna membug la eseg asa luwalna eligim nofkenagag faig. Afa el Godna mungu usumu la afohieg eba Godna Sungwabug eseg asa elni sungwabugim nofkenagag faig.

7Nofeka sineminafe ka nem enaig sihifenag sa ne pese ikanam ninganai luwal fe.

8Afa Godna Sungwabug eba efef lofug. Afa efef blogim afa el ehena mina mas anwenafeg mo ehe haig blofeg afa hiag ikafeg. Godna Sungwabug enaig eseg asa elim yimieg nofkenagag faig enaig ninganai luwal lofeg.”

9Afa Nikodemus ehe mas anwenafena mo asa sahna og, “Haisegba sama enag enaig eseg?”

10Afa Sisas og, “Atiaho ne Israelnai elni tisa haisegba ne kana mo mas anwenafeg mo.

11Ka nem nufunam sihinag mangwal asa kagel anwenafig afa nengelim sihigonug afa mangwal asa kagel nangug nengelim sihig asa nengel kagelni mo mas higigonig mo.

12Afa ka nem bitenaina lasug mo sihinigba asa heven la nai gawigim ogfunig asa ne mas ena mo higig mo afa ka nem oflanaina mo sihinaiba, sa ne higi? Amo, eba mas ne enam gafa higi.

13Afa mas amban el Godna latuim nangug mo, kike mungu. Kaba Nufunam El afa ka enanai yi fwahanam asa hwa bite la pe blog.

14Afa ne anwenafeg autunam Moses mwakwal sombine kapa kegna gafugafena asa aga la kikenam sisi yi fingi fena asa amban gih el enam nangwafenaba gih suialafefena. Afa Nufunam Elim gafa kikenam aga sisi yi fingi fifi.

15Asa amban el ehem olug oningigba sama wahkig nofenagag fli.

16“Afa God mungwali elim fwina membini asa heafna Leg mungu nemug hwa bite la ningihiana. Asa amban el ehem olug oningig sama wahkig nofkenagag fli afa ehe mas awaiye.

17Afa God heafna legim ningihiana mango kwefihiagegim afa susug fai enaigim blo mo eba awai God ehem ningihiana sama ehe elim kwagani.

18Afa amban el legim olug oningig afa enag el kwefihiagegim mas kuskufe. Afa amban el enag Godna legim mungu mas olug oninginag mo eba enaig God ehem ati kwefihiageg.

19Afa enag mina God elim kwefihiageg afa ombusug ati blog asa mungwali elim ambala ogfunig ehengelni auguiagim. Afa el ehe ombusugim mas membinag mo afa heafgelni nihe amtakwalig patalfug asa ehengel og ka sa sikulufeg la afohiefim.

20Afa el amtakwaligim esig ehe ombusugim mas membeni asa ombusugim mas muhla feni. Afa ehe enaig esig asa ehengel embefig enag ombusug heafgelni amtakwalig nihe ambala ogfufe.

21Afa amban el nufunam mo patalku eba ombusug yi go afa ehe mas embefe. Sama enag ombusug heafna gafugagim ambala ogfunai eba Godna membug la ehe enaig eseg.”

Jon Sisasna mo ambala sihina

22Afa maia enaig esenaba Sisas afa heafna patalfuiag el provins Judia afuna. Enanai yi auguiafenaba asa elim bu la laitigonugini.

23Afa Jon Ainon kembig la gafna eba Salim muhla go. Enanai yi kaksag buna feg afa el ehem nangugim ambena asa ehe gafa ehengelim bu la laitina.

24Afa enanam Jon mas kalabus lala gofena mo.

25Afa mingnag Jonna patalfuiag el Ju elim mo esuni. Afa ehengel Ju elni bula sug nihem sihiageni.

26Afa ehengel Jonim nangunim asa sihini og, “Tisa, autunam enag mungu elim ne sihina asa Jordan bum magim ne yi ahwagfena. Sa hig, mungwali el enag elim nangum afuiaba asa ehe bu la laitife.”

27Afa Jon wahigi sihina og, “Mungwali mangwal el asa flag eba God ehem faig.

28Nengel nimbe ati higig ka nem enaig esoni og, ‘Kaba mango Godna Gisfu Fwahag El mo kaba gof mina esug tola blog.’”

29Afa Jon enaig lasug mo pese sihina og, “Afa el angwafig flagim ofeba asa heafna hihe buyis numwehiagena. Afa enag hihe mas angwafig flai asa ehe gafugafenagim enag angwafig flag elim ningenago. Afa maia ehe angwafig flag elni mengigim higinam asa sifakalefe. Afa ka ati Sisasna mengigim higinam asa ka gafa gwenaig sifakaleg.

30Afa ka oningig ehe kwaniafeba afa kaba wetifefe.

31“Afa el heven lanai blog eba sisi fenig bitenai elim. Afa el bitenai feg ehe bitenai mo sihiagig. Afa el Godna kembig la nai blog ehe mungwalim sisi fenig.

32Afa mangwal ehe ati nangug afa higig asa sihinig. Afa el heafna mo higigim asa mas fli.

33Afa amban el heafna mo kehlag asa enag ogfunag Godna mo eba nufunam.

34Afa enag el God ningihiag eba God ehena Sungwabug ehem mungwali faig asa heafna mo eba Godna mo.

35Afa Alag Legim fwina membegim asa mungwali ehena ninga la fwahiag.

36Afa amban Legim olug oninginafe ehe ati wahkig nofkenagag flag. Afa amban Legim masig fatig eba mas nofkenagag flai asa Godna ninimu ehenai yi wahkig gofife.”